KʼIANGA je kitjoni Pedro kao Juan ya tsjó jñani kisʼeñe yaole Jesús, toje María tsakʼejna kʼoa kiskiʼndá. ¡Kiskotsensʼen ya tsjó kʼoa jao ánkje tsabe! Je ánkje kitsole: “Ánni tichjiʼndásíni”.

María kitso: “Tjín xi kafikao je Naina, kʼoa likui ʼbe jña kijnale”. Xijekoan, ki kʼoa jngo chjota kiskajin. Je chjota kitsole: “ʼYáni xi tifasjai”.

Jé choʼnda xi síxájin tsojmintje koanle María, kʼoa tsakui nichxin je kikao yaole Jesús kitso. Kuinga kitsosínile: “Tsa ji kaʼmikoai, kʼoatʼinnai jñáni kanikájnai”. Tonga chjota jebi jéni Jesús. Likui tsabe María tsa jé Jesús nga kjaʼai kji. Tonga kʼianga je kinchja jaʼainle, kʼia tsabe nga jéni Jesús. Kjoan kitokanrʼoe je chjota tjenngile Jesús nga tsakʼéyanajmíle, kitsole: “¡Je kaʼbe Nainá!”

Xijekoan, kʼianga nichxin, jao chjota tjenngile xi ya tjíofi ya naxinandáʼndí Emaús, jngo chjota kitsjenkao yandia. Je chjota tjenngile nʼio ba tjíole xi tʼatsʼe kjoabiyale Jesús. Kʼianga tjíofi yandia, je chjota jebi nkjín koya tsakʼéyanajmíle xi tsʼe Biblia kʼoa nda kisatio kon. Xijekoanni, kʼianga tsakatiokjáya nga koakjen, kʼiani tsabe nga jéni Jesús chjota xi tjíofákao. Kisicha yaole, kʼoa je chjota tjenngile ki ijngokʼani Jerusalén nga kisíkʼéjnaʼénle je pastro.

Kʼianga kʼoakjima, kʼoati tsʼatsenle Jesús je Pedro. Nʼio tsjoa koanle xi ngikʼa nga je kisʼejinle jebi. Nga jao chjota tjenngile xi tsabe Jesús ya ki Jerusalén kʼoa ya kisatejin je pastro. Kʼoakitsole nga ya kisatejin Jesús ya yandia. Kʼianga tjíobʼéyanajmíle jebi, a ʼyaní jmeni xi tokʼoamaná xi koan.

Chótsenlalai sén xi faʼaitʼasí ibi. Ya tsʼatsen Jesús ya cuarto jña tjíoʼya, ninga tíchjoanʼio je xo̱ntjoa. ¡Nʼiojin tsjoa koanle chjota tjenngile nga kui nichxin! A koa̱n kʼoéxki jótjín kʼa je tsʼatsen Jesús. A aon kʼa.

A likui ya tíjna je pastro Tomás nga tsʼatsen Jesús. Kuinga, chjota tjenngi xi ngikʼa kitsosínile: “¡Je kaʼyaijin Nainá!” Tonga Tomás kʼoakitso nga tokʼia koa̱nkjainle tsa ñaki jesoa skoe. Nga je koanjinni nichxin ijngokʼa tiya tjíoʼyangáni je cuarto kʼoa tíchjoanʼio, kʼoa nga kʼia ya tíjna Tomás. Toxijña, tsʼatsen Jesús. Kʼia koankjainle Tomás.