KJOAʼMIYA 111
Jngo tiʼndí xi tsakajnafe
¡CHÓTSENLALAI! Jméni xi kjima ibi. A nʼio kitsiʼaon tsokʼoa je tiʼndí xi kijnatsʼotjensí ibi. ¡Chótsenlalai, je chjota xi kabitjosí ndʼia jéní Pablo! A tiʼyaní tsanda je Timoteo. A ya ventana kakangi tsokʼoa je ti xosíkji.
Jaon, ya ventana kiskangi. Je Pablo ya tínchjayajinle je chjota tjenngile Jesús xi ya tsʼe Troas. Je Pablo be nga nʼio tse nga tsínti skoeni chjota jebi nga jngo chitso koaikao nga koa̱nnyaonni. Kuinga tsakjákaosíni saʼnda kichoka basen nitjen.
Je ti xosíkji, je xi Eutico ʼmi, ya tsakʼejnajchxo ya ventana, kʼoa tsakajnafe. ¡Janla piso tjínle jña kiskangi! Kuinga nʼio kjaojinsínile chjota xokjoan. Kʼianga je kiskomitjen chjota je tiʼndí xokji, kʼoakoan josʼin tjíosíkjaʼaitsjen. ¡Kijnakʼien je tiʼndí!
Kʼianga tsabe Pablo nga kijnakʼien je tiʼndí xokji, tsakajnane kʼoa kitsoakjá. Xijekoan, kitso: “Ali nikjaojinjion. ¡Nda tíjna!” ¡Kʼoatjín jokitso Pablo! ¡Jngo kjoaxkón jebi! ¡Kisikjaʼáyale Pablo! Nʼio tsjoa koanle je chjotankjín.
Ijngokʼa kimini ngatsʼi ya jña tjío kʼoa tsakjen. Tojo tínchjasa Pablo saʼnda nga kisʼesén. ¡Tonga likui jao tjínná kʼianga je Eutico likuiti tsakajnafeni! Xijekoan, je Pablo, Timoteo kʼoa kao xi tjenkao ya chitso tsakin. A ʼyaní jñani ki.
Kʼia tífetʼale Pablo je xi majanni kʼa nga kjin tsakakóyason. Xi toyala naxinandá Efeso jan nó tsakʼejna nga kʼia. Ngisa kjin kikakóyason nga kʼia tikʼoajinni xi majao kʼani.
Kʼianga je kitjoni ya Troas, ya tsakatio choatse ya Mileto. Ya chrianle Efeso, je Pablo kinchjale je xi chjota jchínga sʼin tjío ya jtín xi tíjna ya Efeso nga tokʼoasatjín koan tsakjákao. Xijekoan, kʼianga je kikao je chitso, ¡nʼio ba koanle kʼianga kʼoasʼin ki je Pablo!
Xijekoan, ya kikao ijngokʼani je chitso ya Cesarea. Kʼianga ya tíjna Pablo ya ndʼiale je chjota tjenngile Jesús xi Felipe tsakʼin, je Agabo (Ágabo) xi kinchjaya tʼatsʼe Niná kʼoakitso nga ndoyá chaní Pablo nga kuichó ya Jerusalén. Kʼoa kʼoakoan jokitso je Agabo. Kʼianga je jao nó tsakʼejnaʼya ndoyá ya Cesarea, ya kinikasén Roma nga kisijtsoʼa je César xi ya tíbatéxoma. Kataʼyala jméni xi koan nga ki ya Roma.
