¡CHÓTSENLALAI, tíkangindá chitso xokji! ¡Kjimaxkoa̱! A tiʼyaní je chjota xi yasí tjíojin nandá. Tjínkʼa xi je tjíobichó ya ndainandá. A ya tíjna Pablo. Kataʼyala jméni xi koanle.

A faʼaitsjenli, je jao nó tíjnaʼya ndoyá je Pablo ya Cesarea. Xijekoan, je Pablo kʼoa kʼasa chjota ndoyá jngo chitso kinikatíoya xi fi ya Roma. Kʼianga je kichochrian ya ʼnde xi Creta ʼmi xi ya tíjnajin ndáchikon jngo ntjao̱nʼio jaʼa, a likui tibeni josʼin kikao chitso je chjota. Kʼoa likuiti tsabeni je Tsʼuí nga nichxin kʼoa nga jnjio likuiti tsabe je niño. Xijekoanni, nga je nkjín nichxin tjíotsomason ya nandá, je chjota xi tjíoya chitso likuiti kiskoyanile tsa kuitjontjai.

Xijekoan, tsakisótjen Pablo kʼoa kitsole: “Nijngojinla xi kuiyá; toje chitso xi jcha̱. Jngo ánkjele Jeobá kafaʼainrʼoena natinitjen kʼoa katsona: «¡Li nokjonjin Pablo! Ya kʼuinkisejnai ngixko̱n César xi tíbatéxoma Roma. Kʼoa Niná kʼoasjentjai ngatsʼi xi tjenkaoli»”.

¡Nga je koan teñoni nichxin, kʼianga basen nitjen, saʼnda nga kʼoasʼin jaʼai je ntjao̱nʼio, je xi tjíosíxákao chitso tsabe nga likui na̱nga̱ kjijna je nandá! Kitsokjon tsa jngo naxi satétʼa nga jnjio chon, kʼoa kisikʼatsaongindá je kichaʼbale. Nga je koannyaonni jngo ʼnde tsabe jñani to nya je nandá. Ya kikao je chitso saʼnda ya ndaindáchikon.

Kʼianga je kichochrian ya ndaindáchikon, je chitso ya kichosatétʼa jñani to tsomí nya kʼoa kisʼejnanʼio. Kʼoa nga kitjomingʼa je nandá kitsotsjá, kʼoa koanxkoa̱ je chitso. Je chjota títjonle soldado kitso: “Ngatsʼio je xi mano nandá, tangion ya ndaindáchikon; kʼoa je xi tsín mano skan chjíjion nandá, kʼoa kui tichjaon je xkoa̱le chitso”. Kʼoakisʼin, je xi jao siento kao jankan kao xjaʼaonjngo chjota xi tjíoya ya chitso ndasʼin kichó saʼnda ya ndaindáchikon, jokjoan kitsole ánkje je Pablo.

Ya kichó jngo ʼnde xi ya tíjnajin ndáchikon xi Malta ʼmi. Nʼio nda chjota je xi ya tsʼe, kʼoa tsakasenkao je xi ya jaʼaiya chitso. Kʼianga je koanndachonni, kjaʼai chitso kinikʼéjnaya je Pablo kʼoa Roma kikao je chjota.