JE TI xi tíjnakaosí ibi je pastro Pablo jéní Timoteo. Ya Listra tjíokaoni xijchále. Je na̱le Eunice tsakʼin kʼoa majchále Loida tsakʼin.

Je i̱ jannile kʼa Pablo nga kichó ya Listra. Nga kʼia jela jngo nó tjínle nga kichokakóya títjon Pablo kao Bernabé. Kʼoa jé Silas tjenkao ndʼaibi xi miyole mani.

A ʼyaní jméni xi kitsole Pablo je Timoteo, kitsole: “A meli kjuinroakaonaijin Silas kao an. Koa̱n kuisenkaonaijin nga kʼuinyasonle chjota ya ʼnde jñani nʼio kjin”.

Timoteo kitso: “Jaon, mena kjuia”. Kuinga xijekoanni, kisikatío xijchále kʼoa jé Pablo kao Silas kikao. Tonga nga kjesa ʼyajian jókoan kʼianga je ki, kataʼyala jméni xi koanle je Pablo. Nga kʼia je kjoan xjaʼaonjao nó tjínle, nga tsʼatsenle Jesús ya Damasco.

A faʼaitsjenli, je Pablo kuiná xá kini tsakai Damasco nga kjoañʼai tsjoále chjota tjenngile Jesús, tonga chjota tjenngileni Jesús koan tsanda je. Xijekoan, tjío kʼa chjota kontrale Pablo xi tsakásjai nga sikʼien, tonga je chjota tjenngile Jesús tsakasenkao kʼianga tsakanga. Jngo ni̱si̱nyá kisikʼéjnaya, kʼoa ya kiskanijen xjáo xi kjindai naxinandá kʼoa kʼoasʼin tsakʼaonsje.

Xijekoan, je Pablo ya jaʼa Antioquía nga tsakakóya. Kʼoa yaa Antioquía nga chjota tjenngile Cristo tsakʼin títjonle je xi koankjainle tʼatsʼe Jesús. Xijekoan, je Pablo kao Bernabé ya tjen Antioquía kinikasénni nga kjin naxinandá kikakóyason. Jngo naxinandá jña ki ya Listra, jñani tsakʼejna Timoteo.

Mela jngo nó nga koanskanni, je Pablo ti kichóngáni Listra xi koanni jao kʼa nga kjin tsakakóyason. Kʼianga je kikao Timoteo je Pablo kao Silas, a ʼyaní jñáni ki. Chótsenlalai sén jñasíni tjíotʼa naxinandá, kataʼyala jñani ki.

Títjon ya Iconio ki, jñani nga chrian, xi koanjaoni naxinandá jña ki ya jña Antioquía ʼmi. Xijekoan, ya ki ya Troas, jaʼato ya Filipos, kʼoa ki Tesalónica kao Berea. A tiʼyaní jña tíjna Atenas. Ya tsakakóya Pablo. Xijekoan, jngo nó basen tsakakóya ya Corinto. Xi jetʼani ya tsakatio choatse ya Efeso (Éfeso). Xijekoanni chitso tsakatioyale nga ki ijngokʼani ya Cesarea, kʼoa kʼia kimi ya Antioquía, ya jña tsakʼejna Pablo.

Kʼoa nʼio kjin jñani tsakʼamje Timoteo nga tsakasenkao Pablo nga tsakakóyason je «énnda chjotse» kʼoa nga nkjín jtín tsakʼétsʼiakao. Kʼianga je koa̱njchíngai, a kʼoasʼin choʼnda kixile Niná koa̱in joni tsa Timoteo.