A ʼYAXKONNÍ je chjoónxti xonaskánakji, xi yasí tífinrʼoe je David. Abigail tsakʼin. Nda koanle kisikjaʼaitsjen, kʼoa je tsakʼéchjoa nga tsínni kʼoakisʼin David xi chʼaotjín. Tonga, nga kjesa ʼyajian jmeni, kui kjoanla kataʼya jméni xi koanle David nga kjesa kʼoamajin.

Kʼianga je tsangale Saúl, je David ya kikʼejnaʼma jngo ngijao. Je xtindsʼe kʼoa kao ngatsʼi yaniʼyale kichonrʼoe jña tsakʼejnani. Kʼoa ñola siento chjota xi kʼoati kichonrʼoe, kʼoa jé David tsakasentítjonle. Je David kikonle je xi rey tíjna ya Moab kʼoa kitsole: “Jngo kjoanda sijéle, tʼaiʼndelai je pa̱na kao ma̱na nga i̱ katabatiokaoli saʼnda nga skoe jmeni xi koa̱nna”. Xijekoan, David kʼoa kao chjotale ya tsakatioʼma jña nindo tjín.

Nga koanskanni, David tsabexkon je Abigail. Je xʼinle Abigail, Nabal tsakʼin, nyiná koan kʼoa nʼio nkjín nangi kisʼele. Jan jmi barré kʼoa jngo jmi tindso kisʼele. Chjota tsʼen koan je Nabal. Tonga je chjoónle nʼio naskánakisʼe. Kʼoa xi ijngosani, kui kʼoakisʼin je xi ndatjín. Ñandia kʼianga saʼnda tsakʼasjentjai je yaniʼyale. Kataʼyala jókisʼin.

Je David kʼoa kao chjotale tsakakóle kjoanda je Nabal. Tsakinyakao nga kisikuinda je barréle. Ñandia kʼianga David kisikasén chjotale nga jngo kjoanda kisíjéle je Nabal. Je chjotale David kichó jña tíjna Nabal, kʼoa je Nabal kao choʼndale, ntsjale barréle tjíobate. Sʼuí tíjnale Nabal, kʼoa nʼio nkjín tsojmi xi ma chine tjíole. Kʼoa je chjotale David kitsole Nabal: “Nda chjota koainjin xi kao ji. Kʼoa nijngojinla barréli kinichaijin, tosa kinikuindakaolaijin. Tʼiain kjoanda tʼai choanaijin xi ma chine”.

Je Nabal kitso: “Ali kʼoakjoan chjota xi tsojmi tsjoale”. Én tsʼen kinchja kʼoa chʼaosʼin kisikʼaxki David. Kʼianga kʼoakitsole David je chjotale jokitso je Nabal, nʼio koanjtile, kʼoa kitso: “¡Chjoao kicha espadano!” Kʼoa ki nga kisíkʼien je Nabal kao chjotale tsakai.

Kʼianga kinrʼoé jngo chjotale Nabal je én tsʼen xi kinchja, kʼoakitsole Abigail jmeni xi koan. Je Abigail kjitʼanangi tsakatíonda je tsojmi xi ma chine, kisikatíosonle je búrróle kʼoa ki. Kʼianga kiskajin je David, kitjojenle je búrróle, tsakjenjen jko̱ kʼoa kitso: “Tʼiain kjoanda, ji nai, ali jejin koenta nʼiai je xʼinna, Nabal. Nga chjota chininí, kʼoa likui male nga ndasʼín. Tsojmi yʼa kjoatjaole. Tʼiain kjoanda, chjoai, kʼoa nichatʼanaijin je xi kama”.

Je David kitsole: “Nʼio nda mali nikjaʼaitsjain. Kabʼechjoani nga kasikʼien je Nabal, xi totʼatsʼe kjoatsʼenle. Tʼinla nandani ndʼiali”. Nga koanskanni, nga je kʼien Nabal, je Abigail kʼoati chjoóle koan David.