ATIʼYANÍ jméni xi kama ibi. Jé tiʼndí kabʼasjentjai barréʼndí xokji. Je oso xokji je kikao tsakai je barréʼndí nga skine. Tonga kitjenngile je tiʼndí, kʼoa kitjotsʼoa oso nga tsakjáʼale je barréʼndí. ¡Kʼianga tsakasenndo je oso, je tiʼndí kisikiʼaon kʼoa kisikʼien! Je tiʼndí xokji jesa tsakʼasjentjai jngo barré nga jngo xa tíkjine tsakai. A tsí nʼio tjínle kjoanʼiojin tiʼndí xokji nga kʼoakisʼin, jósi ngai ji. A ʼyaní ʼyáni tiʼndí xokji.

Jéní David. Kʼoa ya tsakʼejna ya naxinandá xi Belén tsakʼin. Pajchále koan Obed, je tile Rut kao Booz. A faʼaitsjenli xi tʼatsʼe. Kʼoa je nʼaile David, Isaí (Jesé) tsakʼin. Je David barréle nʼaile kisikuinda. Kʼia kitsin David nga je tele nó Saúl nga rey sʼin kiskoejin Jeobá.

Kichó nichxin kʼianga Jeobá i̱ kitsole je Samuel: “Jngo siti chjoai kʼoa tʼin ya ndʼiale Isaí xi tíjna ya Belén. Jngo tile tikjoejian xi rey koa̱n”. Kʼianga tsabe Samuel je Eliab, je tijchíngale Isaí, kitso: “Je jin xokji”. Tonga Jeobá kitsole: “A likuijin chotsenlai jokji ngʼa, kʼoa jonaskánakji. Likui je tikjoejian nga rey koa̱n”.

Je Isaí kinchjale je tile xi Abinadab tsakʼin kʼoa kichokaole Samuel. Tonga Samuel kitso: “Mai, kʼoati likui je tíkjoejin Jeobá”. Xijekoan, je Isaí kichokaole je tile xi Samah tsakʼin. Samuel kitso: “Mai, kʼoati likui je tíkjoejin Jeobá”. Je Isaí ñato xtile kichokaole Samuel, tonga Jeobá nijngojinla xi kiskoejin. Je Samuel kitsole Isaí: “A to kʼoatjín mani je xtili”.

Isaí kitso: “Tíjnasa je xi maʼndí. Tonga barré tísíkuinda nitsian”. Kʼianga kichokaole David, je Samuel tsabe nga naskánakji. Je Jeobá kitsole Samuel: “Jé xokji, tʼejtensuin siti je jko̱”. Kʼoa je Samuel kʼoakisʼin. Nga je ki nichxin chan je rey sʼin tsakʼejna David ya Israel.