TOSʼA jin nóle Josías kʼianga rey tsakʼejnale nga jao ntje̱le Israel. Jngo xi sʼa kʼoatjín nóle nga rey kʼoéjna sʼa nʼio choa. Kʼoa kuinga je tsakasenkaosíni nga títjon xi je chjota jchínga nga tsakatéxomale naxinandá.

Kʼianga je ñato nó tíbatéxoma rey Josías, jé Jeobá tsakásjai. Tsʼe choa̱ kitjenngi je rey xi nda kisʼin joni tsa David, Josafat kao Ezequías. Kʼianga sʼa xtisa, tjín xi kisʼin xi kjoanʼiojin koanchjénle.

Nʼio nkjín nó nga me ngatsʼi chjota israelita nga tsʼen koan. Niná ndiso tsakʼétsʼoale. Xkóson tsakinyále xkóle. Kuinga je Josías kʼoa kao chjotale tsakjaʼáxínsíni je kjoaʼyaxkón ndiso ya naxinandá. Ñʼai tíjna xá jebi, kʼoajin nga nʼio nkjín chjota xi niná ndiso tsakʼétsʼoale. A tiʼyaní ibi je Josías kao chjotale nga tjíosíxkoa̱ je xkóson.

Xijekoan, je Josías jan chjota tsakánele nga kʼoendaya je yo̱ngo̱le Jeobá. Kinijéle taon je naxinandá kʼoa je tsakʼaile chjota xokjoan nga ya sichjénle yo̱ngo̱. Kʼianga tjíosíxá ya yo̱ngo̱, je naʼmi ngʼajko̱ Hilquías jngo tsojmi xi nʼio chjíle koansjaile: je xo̱n kjoatéxoma xi je Jeobá kʼoakitsole Moisés nga kiski nichxin kjoatse, kʼoa likui ʼyale jña kijna xo̱n jebi tsakai.

Kʼianga kichanile xo̱n jebi je Josías, kʼoakitso nga katasʼexkiale. Nga je kinrʼoé, je Josías tsabe nga tsín tjíosítjoson naxinandá je kjoatéxomale Jeobá. Nʼio ba koanle, kuinga tsakʼéjndasíni najñole, josísʼin matsen ibi. Kitso: “Je Jeobá nʼio jtile xi tʼatsaan, nga je xijcháná likui kisitjoson je kjoatéxoma xi nroatʼa xo̱n jebi”.

Josías kʼoakitsole je naʼmi ngʼajko̱ Hilquías nga katakjonangi jméni xi sikao Jeobá je naxinandá. Hilquías je kikjonangile jngo chjoón xi kinchjaya tʼatsʼe Niná, xi Huldá tsakʼin. Je chjoón jebi kui én jebi kitsjoale xi tʼatsʼe Jeobá tínroani nga kʼoakatatsole Josías, kitsole: “Jerusalén kʼoa kao ngatsʼi chjota naxinandá kjoañʼai kʼoaile nga niná ndiso tjíobʼétsʼoale kʼoa nga kjoatsʼen kijnakitse naxinandá. Tonga ji, Josías, nga kui xi ndatjín kʼoatinʼiai, je kjoañʼai jebi kʼia saʼnda kjoaʼai nga ji xi je kuiyái”.