AʼYANÍ ʼyáni chjota xokjoan kʼoa jméni xi tjíosʼín. Kjoajchán tjíofi. Kʼoa je chjota xi tjentítjonsí tjíose. Tsakui nichxin i̱ tisi: “Ánni nga tsín yʼasíni kicha espada kʼoa kao lanza xi sichjén nga skaan je xi tjíosesí”. Kataʼyala.

Josafat (Jehosafat) rey tsakʼejnale xi jao ntje̱le Israel. Kʼoati kʼia tsakʼejna nichxin nga tsakʼejna je rey Acab kao Jezabel xi tsakatéxomale je xi te ntje̱le Israel. Tonga je rey Josafat nda tsakatéxoma, kʼoa kʼoati nda kisʼin Asa (Asá) je nʼaile. Kuinga nʼio nkjín nó nda tsakatiosíni je xi jao ntje̱le Israel.

Tonga tjín xi koan kʼoa kitsokjon chjota. Chjota xi kichonrʼoe Josafat kitsole: “Nʼio nkjín chjota kjoajchán xi ya tsʼe Moab, Ammón kʼoa kao nindo Seír nroanrʼoeli”. Nkjín chjota israelita xi ya koanxkó Jerusalén nga tsakásjai nganʼiole Jeobá. Ya ki ya yo̱ngo̱, kʼoa ya tsakʼétsʼoa Josafat, kitso: “Ji Jeobá Ninánajin, likui ʼbe jme xi sʼian. Likui jme xi koa̱n sʼiainjin kao chjota kjoajchán xosichon. Ji tisenkaonaijin”.

Jeobá kinrʼoéle, kʼoa jngo choʼndale kisikasén xi kitsole naxinandá: “A litsa tsaonjion kjoajchán jebi, tsʼení Niná. A litsa jonjin kuixkaon. Tochótsenño, kʼoa kataʼyao jósʼin kʼoasjentjaino Jeobá”.

Kʼianga je koannyaonni Josafat kitsole je naxinandá: “¡Je Jeobá tinʼiotʼao!” Xijekoan, jé chjota xi se kisikinyátítjonle je chjota kjoajchánle, kʼoa nga ki tjíosekaoni nga tjíobʼasjengʼa Jeobá. A ʼyaní jméni xi koan nga je kichochrian jña skaan. Je Jeobá tijé kisikjánni chjota kjoajchán xi ngikʼa. ¡Kʼianga je kichó je chjota israelita, toje kjiokʼien ngatsʼi chjota kjoajchán kontrale!

Chjine koan Josafat kʼianga je Niná kisinʼiotʼa yaole, a tsí jaon. Kʼiatsa kʼoati sʼian tsandañá, chjineñá.