CHÓTSENLALAI je chjota xi yasí tíjnajin nandá. Tse kjoa tífaʼatojin, a tsí jaon. ¡Yajin skójen je jti̱ xosíkji! A ʼyaní ʼyáni chjota xokji. Jonás tsakʼin. Kataʼyala jókoanni kʼianga kʼoasʼin tse kjoa tsakʼejnajinsíni.

Jonás, xi nchjaya tsʼe Jeobá koan. Tosʼa choatse jaʼato nga kʼien Eliseo nga i̱ kitsole Jeobá je Jonás: “Tʼin ya naxinandá Nínive, je koantse kjoatsʼenle chjota xi ya tjín, kʼoa mena nga kʼoakʼuinlai xi tʼatsʼe jebi”.

Tonga koankaile Jonás nga ki. Tosa tojngo chitso tsakʼejnayale xi tsín tsa ya Nínive ki. Je Jeobá likui kisasenle nga kʼoasʼin tsakanga Jonás. Kuinga jngo jtsíntjao̱nʼio kisikasénsíni. Saʼnda me kisikʼatjenngindá je chitso. Je chjota xi síxákao chitso nʼio kitsokjon, kʼoa kiskiʼndáxále ninále nga katabinyakao.

Xijekoan, Jonás tochan i̱ kitsole: “Je Jeobá bʼetsʼoale, je Niná xi kisinda ngʼajmi kao Sonʼnde. Kui tibangale jmeni xi kitsona Jeobá nga sʼian”. Xi síxákao chitso kitsole: “Jméni xi sikaolaijin nga katabʼejnajyo je jtsíntjao̱nʼio”.

Jonás kitso: “Tikʼatjenngindánao, kʼoa je ndáchikon kʼoéjnajyo”. Je chjota xi síxákao chitso koankaile nga kʼoasikao, tonga kʼianga ngisa ti nʼio kʼoakoanngáni je jtsíntjao̱nʼio, kisikʼatjenngindá Jonás. Kʼoa kjitʼanangi tsakʼejnajyo je jtsíntjao̱nʼio, kʼoa tsakʼejnajyo ijngokʼani je ndáchikon.

Kʼianga je kiskasʼenngindá Jonás, jngo jti̱ xi nʼioje kji kiskojen. Tonga likui kʼien. Jan nichxin kʼoa jan nitjen tsakʼejnaya yatsʼoa̱ je jti̱. Kʼiani kʼoakoanle Jonás nga tsín kisitjosonle Jeobá, nga tsín ki ya Nínive. Kuinga, a ʼyaní jmeni xi kisʼin.

Je Jonás tsakʼétsʼoale Jeobá kʼoa kisijéle nganʼio. Kʼoa je Jeobá kʼoakisʼin nga je jti̱ ya kisikisoni Jonás ya jña kixí chon. Xijekoan, Jonás ki ya Nínive. A tsí kui xi bakóyaná jebi nga nʼio chjíle nga kʼoasʼiaan ngayeje jmeni xi tsoná Jeobá.