KʼIANGA kjesa mʼejin David, kʼoakitsole Salomón josʼin mele Jeobá nga sʼe yo̱ngo̱le. Kʼianga je tífikao ño nó nga tíbatéxoma Salomón, kʼia tsakʼétsʼiakao nga tsakʼénda je yo̱ngo̱, kʼoa ñato nó basen koanjngonile. Nʼio nkjín jmi chjota kisixá nga kisʼenda ndʼia jebi, kʼoa nʼio tse taon kisʼengile, nga taonsiné kʼoa taonchxoa kisichjén.

Yo̱ngo̱ jebi jao cuarto kisʼele, joná kjoan cuarto xi kisʼele je ndʼianajño. Tonga jaoya kʼoakoankjoan yʼai cuarto xokjoan. Je Salomón kʼoakitso nga ya katanikʼéjnaya cuarto xi fetʼani je kaxa jña nya je kjoa xi kisʼendajin; kʼoa je tsojmi xi tjínsale je ndʼianajño ya kinikatíoʼya cuarto xi ngijngo.

Kʼianga je koanjngo je yo̱ngo̱, jngo sʼuí kisʼejna. Salomón tsakasenxkónyʼin jña tíjna yo̱ngo̱ kʼoa tsakʼétsʼoa josísʼin matsen ibi. Kʼoa kitsole Jeobá nga tsakʼétsʼoale: “Saʼnda likui chóyai ngʼajmi. Kʼoa jósʼin chóyani yo̱ngo̱ xokji. Tonga ji, Ninána, sijéle kjoanda nga tinóʼyalai je naxinandáli kʼianga i̱ skótsen ʼnde jebi nga kʼoetsʼoali”.

Kʼianga je jetʼale kjoabʼetsʼoale Salomón, lʼí kinroajenni ngʼajmi. Kití je cho̱ xi tsakʼaitʼale Niná. Kʼoa jngo lʼíle Jeobá xi ñaki kisiʼisenʼya ya yo̱ngo̱. Kui jebi xi tsakakó nga kinrʼoé Jeobá, kʼoa nga tsjoa kisʼele tʼatsʼe yo̱ngo̱ xi kisʼendale kʼoa kao kjoabʼetsʼoa xi tsakʼéjnale Salomón. Kʼoa je ya yo̱ngo̱ tsakʼétsʼoale naxinandále Jeobá, likui tiya tsakʼétsʼoanile ya ndʼianajño.

Nʼio tse nga kao kjoachjine tsakatéxomani Salomón, kʼoa nda kisʼele chjota. Tonga nʼio nkjín yánchjín chixankao xi xín naxinandále kʼoa xi tsín Jeobá tsakʼétsʼoale. A tiʼyaní je xi xkósonsí tíbʼétsʼoale. Chan kiskenʼndobʼakjá yánchjínle Salomón nga kʼoati kjaʼai niná tsakʼétsʼoale. A ʼyaní jmeni xi koan nga koanskanni. Tsʼen koan Salomón, kʼoa likuiti tsjoa kisʼenile je naxinandá.

Koanjtile Jeobá nga kʼoakisʼin Salomón, kʼoa kitsole: “Kjoaʼale chjota xi tibatexomalai kʼoa kjaʼai xi tsjoale. A likui kʼia kʼoasʼian nga tijnachonsai, kʼia kʼoasʼian nga koatexoma ʼndíli. Tonga likui kjoaʼale ngatsʼi chjota xi koatexomale”. Kataʼyala jósʼin kitjoson jebi.