JMÉNI xi je faʼaitʼa ibi. Jaon, chjota je faʼaitʼa. Jé chjota xi títjon koannda, jngo chjoón jngo xʼin mani. ʼYáni xi kisinda. Jé Niná. A ʼyaní jóʼmi jaʼainle Niná. Jeobá ʼmi. Kʼoa je chjota xi koannda, Adán tsakʼin xi xʼin kʼoa Eva tsakʼin xi chjoón.

Niná Jeobá isʼin kisinda Adán: kiskoe chaole nangi kʼoa kao kui kisindani jngo chjota xi nʼio nda kji. Xijekoan, kiskonntjao̱sʼen nitjon chjota, kʼoa kʼoakoanni nga kisʼele kjoabijnachon Adán.

Je Niná jngo xá kitsjoale Adán. Kʼoakitsole nga katatsjoále jaʼain jotjín koya cho̱ tjín. Tsakui nichxin nʼio nkjín nichxin kiskotʼayason tʼatsʼe cho̱, ánni nga nda kjoan kitsjoa jaʼainsínile. Nga kʼoatísʼín xá jebi je Adán tsabe nga tjín xi chale. A ʼyaní jméni.

Kuinga jao jao mani je cho̱. Tjín elefante xi xʼin kao xi chjoón, kʼoa tjín xa xi xʼin kao xi chjoón. Tonga Adán liʼya xi tjínle. Kuinga, Jeobá nʼio kisikájnafesíni Adán, kʼoa jngo ninda ni̱si̱nle tsakʼasjele. Kui ninda ni̱si̱n jebi kisichjén Jeobá nga jngo chjoón kisinda, kʼoa chjoónle koan Adán.

¡Nʼio tsjoa kisʼele Adán! ¡Kʼoa kʼoajin ti nʼio tsjoa koanle Eva nga ya tsakʼejna jngo ʼnde xi kʼoanaskánachon jñani sijchá yaole! Koa̱n sʼele xti kʼoa ndasʼin koatiokao xínkjín.

Kʼoasʼin koanmele Jeobá kʼianga je Adán kao Eva koatio ngantsjai nichxin. Nga kʼoanaskánasichon ngayeje Sonʼnde jokoanchon ʼndenaxóle Edén. ¡Nʼiojin tsjoa koanle Adán kao Eva nga kʼoasʼin xá jebi! A koanmeli tsayalani tsakijnai kʼoa tsa sonʼndenaxó kinikoai Sonʼnde. Tonga tochoatse nga tsjoa kisatiole Adán kao Eva. Chótsenlalee ánni.