NGAYEJE xi ndatjín tʼatsʼe Niná tínroaniná. Jé kisinda Tsʼuí xi síʼisenná nga nichxin, kʼoati kisinda Sá kao niño xi síʼisenná nga jnjio. Kʼoati kisinda Sonʼnde nga koa̱n i̱ kuiyoa.

Tonga a litsa kuijin títjon kisinda Niná je Tsʼuí, je Sá, je niño kʼoa kao Sonʼnde. A ʼyaní jméni xi títjon kisinda. Je títjon kisinda chjota xi kʼoatikjoan jokji jé. A likui matsen chjota jebi, joni tsa Niná nga kʼoati likui matsen. Chjota jebi ánkje tsole Biblia. Kui xá kisindani Niná nga ya koatiokao ngʼajmi.

Je ánkje xi títjon kisinda Niná likui mangóson kao xi ngikʼa. Jé títjon ʼNdíle Niná koan, kʼoa ya kisixákao Nʼaile. Jé tsakasenkao Niná nga tsakʼénda ngayeje tsojmi xi ngikʼa. Tsakasenkao nga kisinda je Tsʼuí, je Sá, je niño kʼoa kao Sonʼndená.

Jókji Sonʼnde nga kʼia. Nga kʼia nijngojinla chjota xi ma bʼejnason. To nandá kijnajtsané. Tonga Niná kʼoasʼin koanmele nga chjota katabatioson Sonʼnde. Kuinga kisindachonsíni nga ñá kuiyosoan. Jméni xi kisʼin.

Xi títjon koanchjénle Sonʼnde kuinga isen koa̱nchon. Niná ya kisikasénne Sonʼnde je lʼíle Tsʼuí nga katasíʼisen. Kuinga kʼoakisʼinni nga jnjio katamachon nga nitjen kʼoa isen katamachon nga nichxin. Xijekoan, kisikinroajen nandá xi kijnason Sonʼnde ánni nga koantsensíni je nangi.

Nisajmejinla xi tjín i̱ Sonʼnde nga kʼia. Kʼoakji josí kji sén xi faʼaitʼa ibi. Likui kisʼe naxó, yá, kʼoa kao cho̱. Likui kisʼe jti̱ ya jinnandá. Nʼio tse xá kisʼele Niná ánni nga nda koatiosíni je cho̱ kʼoa kao je chjota i̱ Sonʼnde.