YA NITSINNI jña kisʼejna kaxa, je chjota tojo kʼoakisʼin josʼín ngantsjai. Likui koankjainle tsa kjoaʼai Jtsínʼio. Tongisajin ti nʼio tsakijnongáni josʼín ngantsjai. Tonga xijekoanni likuiti tsakijnoni.

Toxijña tsakʼa jtsí. Kixíjten jtsí joma kʼianga jngo xjoakicha nandá bʼejten. ¡Kʼoakoan jokitso Noé! Tonga likui ʼya xi tikoan kisʼenni ya kaxa. Nʼio nda tsakʼéchjoa Niná Jeobá je xo̱ntjoa.

Sasa kisʼejnakitseni nandá jñani nʼio nangi chon. Jo xongáyʼai sʼin koantsen nandá. Kitsotsjá yá kʼoa kisikjanle lajaoyʼai kʼoa nʼio jane. Kitsokjon chjota. Kimi jña nʼio ngʼa chon. ¡Kʼiajinni tokʼoakoanle nga tsín kinrʼoéle Noé, kʼoa nga tsín ya tsakatioʼya ya kaxa ngasʼasa tixʼa je xo̱ntjoale! Tonga likui tikʼiani.

Sa tsakin sa tsakin je nandá. Ñachan nichxin kʼoa ñachan nitjen tsakʼa jtsí. Kiskason nandá saʼnda jko̱nindo, kʼoa chan kichaʼma nindo xi nʼio ngʼa kjoan. Tojokjoan kitso Niná, ngatsʼi chjota kʼoa kao cho̱ xi tsín ya tjíoʼya kaxa kʼienní. Tonga je xi ya tjíoʼya lijme xi koanle.

Noé kʼoa kao xtile nʼio nda xá kisʼin kʼianga tsakʼénda je kaxa. Je nandá kiskomingʼa je kaxa kʼoa totsakʼamjeson sonnandá. Xijekoan, jngo nichxin nga je tsínti tsakʼani jtsí, koantsen je Tsʼuí kʼoa kisiʼisen. ¡Naskánasʼin koantsen! To nandá kijna ngakjijnda. Kʼoa tokui koantsen je kaxa nga tífison nandá.

Likuiti kisʼeni chjota xi yʼai kʼoa xi nʼio ngʼa kjoan. Likui tikʼia nga taon tsabeni chjota. Kʼien ngatsʼi, kao xi na̱le koan kʼoa kao xi ngikʼa chjota tsʼen. Tonga, jméni xi koanle je xi nʼaile koan.

Xi nʼaile koan a litsa ñaki chjotajin joni tsañá. Ánkjení xi i̱ Sonʼnde jaʼai kʼoa jo chjota sʼin kisijchá yaole. Kuinga, likui ya kʼienjinsínile chjota xi ngikʼa nga jaʼai Jtsínʼio. Kisikatío yao xi kisichjén kʼoa ánkje kisikao yaole nga kini ya ngʼajmi. Tonga likuiti tsakʼaiʼndenile nga ya tsakatiojinle jña tjío ánkjele Niná. Ya kitʼale Satanás. Kʼoa ánkjele Satanás koan.

Xijekoan, jngo ntjao̱ kisikjaʼa Niná, kʼoa je nandá xi kixinya jaʼajen. Xijekoanni aon sá, jngo jko̱nindo kichosʼejnason je kaxa. Nkjín nichxin jaʼato, kʼoa je xi ya tjíoʼya kaxa koan kiskotsen ya nitsinni kʼoa tsabe jko̱nindo xi tjín. Tosi tonda jaʼajen je nandá.

Xijekoan, Noé jngo nisejma tsakʼaonsje xi nraa ʼmi. Tongotjo kitjen kʼoati kichongáni likui kisokoʼndele jña tsakʼejna. Tosi tonda kʼoakisʼin kʼoa nga bichó ya bʼejnason kaxa.

Noé koanmele nga skoe tsa je kixíya nandá i̱ tʼanangi, kuinga jngo nisechxoa kisikasénsíni xijekoan. Tonga ti jaʼaingáni tsanda je, nga tsín koansjaile ʼnde jña tsakʼejna. Xi koanjaokʼani kisikasénngáni Noé kʼoa jngo xka̱ xi tsʼe olivo kjiʼa tsʼoa nga kichó. Je jaʼajen nandá. Xikoanni jan kʼa kisikasén ijngokʼangáni je nisechxoa, kʼoa kisokoʼndele jñani kixí chon jña tsakʼejna.

Xijekoan, Niná kinchjale Noé, kitsole: “Titjoni ya kaxa. Tʼinkoai yaniʼyali kʼoa kao cho̱”. Tsʼato jngo nó tsakatioʼya ya kaxa. ¡Tikjaʼaitsjenlai jókji tsjoa kisatio kon kʼianga je kitjoni ya kaxa kʼoa nga tjíokon!