Je Jeobá ngisasa nʼio tse kjoachjine tjínle tikʼoajinni ñá nga̱ jé kisindaná kʼoa Nʼainá mani. Tsjoakená kʼoa makjaojinle xi tʼatsaan. Kʼianga kisindaná, alikui kʼoasʼin kisindaná nga toñá chʼaa yaoná (Jeremías 10:23). Joni tsa xtiʼndí nga machjénle nga je xijchále koandiaale, kʼoati machjénná tsanda ñá nga je Niná koandiaaná (Isaías 48:17, 18). Kʼoa je Niná jngo kjoatjao títsjoáná xi koa̱n kjoándiaanilee yaoná: kui kjoatéxoma xi faʼaitʼa ya Biblia. Tʼexkiai 2 Timoteo 3:16.

Je kjoatéxomale Jeobá tsoyaná josʼin si̱jchá yaoná kʼianga ñaki nda kuiyoaa. Kʼoati bakóyaná jmeni xi sʼiaan kʼianga so̱koná kjoanichikontʼain xi sʼe̱ nichxin xi nroaján. Kʼoa mani nga je kisindaná tongisajin nda tsa kʼoaiʼndee nga je katabandiaaná. Tʼexkiai Salmo 19:7, 11 kao Apocalipsis 4:11.

Je kjoafaʼaitsjen xi faʼaitʼa Biblia bándiaaná jmeni xi koa̱n sʼiaan. Kʼoa je kjoatéxoma xi faʼaitʼa ñaki kʼoatsokixiná jme xi tjínnele si̱tjosoán (Deuteronomio 22:8). Kʼianga jchaa josʼin koanngíntjenngiaa je kjoafaʼaitsjen xi faʼaitʼa Biblia machjénní nga si̱nkjínlee tokoán (Proverbios 2:10-12). Tobʼelañá, jósʼin basenkaoná kʼianga kʼoatso nga je Niná títsjoáná kjoabijnachon. Basenkaoná nga nikuindaa yaoná kao xíngiaa ya tʼaxáná, ya yaniʼyaná kʼoa kʼianga tjín jña mangián. Tʼexkiai Hechos 17:28.

Je Jesús jao kjoatéxoma kisikʼaxki̱ xi ngisa títjon tjío. Je xi títjon kui bakóná anni nga kisindaniná je Niná: Kuiní nga kataʼyaa xi tʼatsʼe, nga tsjoacha katamaa kʼoa nga je si̱xálee. Tjínnele kuenta sʼiaan kjoatéxoma  jebi tojmeni xi mená sʼiaan (Proverbios 3:6). ʼYani xi sitjoson kjoatéxoma jebi miyole Niná koa̱n, ñaki tsjoa sʼe̱ kon kʼoa kʼoaile kjoabijnachon xi tsínkʼia fetʼa. Tʼexkiai Mateo 22:36-38.

Je kjoatéxoma xi majaoni nʼio basenkaoná nga nda mangínkoaa xíngiaa (1 Corintios 13:4-7). Kʼiatsa si̱tjosoán jotso, kʼoasʼin si̱koaa xíngiaa josíkaoná je Niná nga jngó jngoá. Tʼexkiai Mateo 7:12 kao 22:39, 40.

Je kjoatéxoma xi faʼaitʼa Biblia jtín síkatíoná ya yaniʼyaná kʼoa tsoyaná nga ñaki tsjoacha katamaa xíngiaa (Efesios 4:32; Colosenses 3:12, 14). Kʼoa saʼnda jngo kjoatéxoma tíjna xi tsín tsjoáʼnde nga katabixoya je familia. Kui kjoatéxoma xi tso nga tondiaa katabatiokao xínkjín xi jekabixan. Tʼexkiai Mateo 19:5.

Kʼianga nitjosoán kjoatéxoma xi faʼaitʼa Biblia kʼoati basenkaoná nga makuindaná xáná kʼoa nga nda sʼe tokoán. Nkjín chjota xi je tsjoále xá je xi sítjoson kjoatéxomale Niná, nga̱ be nga ñaki kixi kʼoa nga nda sítjoson xále (Proverbios 10:4, 26; Hebreos 13:18). Je Énle Niná kʼoati tsoyaná nga tokatamajngoni tokoán tsa tísokóná xi machjénná kʼoa nga kui títjon si̱kʼéjnaa xi sasénle je Niná tikʼoajinni tsojmi xi tjín sonʼnde. Tʼexkiai Mateo 6:24, 25, 33 kao 1 Timoteo 6:8-10.

Je Énle Niná kʼoati tsoyaná josʼin si̱kuindaa yaoná (Proverbios 14:30; 22:24, 25). Tobʼelañá, kʼianga nitjosoán je kjoatéxoma xi bʼéchjoa je kjoachʼi̱ alikui chʼin bijnyilee yaoná kʼoa alikui kjoaxkón tsaojiaan (Proverbios 23:20). A kui xi tsonile jebi nga jngokʼa bʼéchjoa Jeobá je xán. Mai. Tonga alikui mele nga si̱kʼatoné choa̱le jotjín sʼioa (Salmo 104:15; 1 Corintios 6:10). Je kjoatéxomale Niná nʼio basenkaoná, nga̱ bʼénená nga si̱kuindaa josʼin mangínkoaa yaoná kao jme xi nikjaʼaitsjeen (Salmo 119:97-100). Ánni nga nitjosonsíñá je kjoatéxoma xi faʼaitʼa Biblia. Kuinga je Jeobá ʼyaxkoán, je Nʼainá xi tíjna ngʼajmi, ali tsa tokuijin nga tsaanñá kjoanda. Tʼexkiai Mateo 5:14-16.