KJOAʼMIYA 10
Jósʼin jchañá jñákjoánnile je relijión xi kixi
1. A tojngo mani je relijión xi kixi.
“Nda tikuindalao yaono je xi énndiso nchja̱ya.” (MATEO 7:15)
Je Jesús tojngo relijión xi ñaki kixi kitsoyale chjotale. Kʼoa jngo ndiaa kisingósonkao xi ya bichókaoná kjoabijnachon xi tsínkʼia fetʼa. Kʼoa kʼoakitso nga tochoa mani xi masjaile ndiaa jebi (Mateo 7:14). Tokui relijión xi ñaki ya Biblia bʼangini xi sasénle Niná. Je chjota xi kʼoasʼin tjíobexkón Niná jotso Biblia tojngo koya josʼin makjainle. Tʼexkiai Juan 4:23, 24; 14:6, kao Efesios 4:4, 5.
Chótsenlai je video A sasénle Niná ngatsʼi religión
2. Jméni xi tongini kitso Jesús tʼatsʼe je chjota xi énndiso kuitsoya tʼatsʼe.
“Kʼoatso nga bexkón Niná, tonga je [...] xá xi sʼín, kjaʼaísʼin tsoyani.” (TITO 1:16)
Je Jesús tongini kʼoakitso nga sʼe̱ chjota xi sikitsónjin énle, xi énndiso kuitsoya. Chjotandiso xokjoan kʼoa kao relijión xi tjíojin kʼoatso nga chjotale Cristo ma. Tonga totjíobʼanachale chjota ninga kʼoatso nga ñaki kixi jme xi tjíobakóya. Tonga jósʼin jchañá je relijión xi ñaki kixi. Koaan jchaa nga̱ je chjota xi ya tjíojin ñaki kʼoatjíosʼín jotso Biblia. Tʼexkiai Mateo 7:13-23.
3. Jósʼin jchañá je relijión xi ñaki kixi.
Aonla koya kataʼyaa josʼín je chjota xi ya tjíojin:
-
Nʼio bexkón Biblia, je Énle Niná. Bʼénele yaole nga sítjoson jotso Énle Niná kʼoa alikui to kjoafaʼaitsjenle chjota bakóya (Mateo 15:7-9). Xi ijngosani, kʼoasʼin tjíofikao yaole josʼin bakóyason. Tʼexkiai Juan 17:17 kao 2 Timoteo 3:16, 17.
-
Nʼio bexkón je jaʼaínle Niná. Je Jesús kʼoati nʼio tsabexkón je jaʼaínle Nʼaile. Kitsoyale chjota nga Jeobá ʼmi Nʼaile. Kʼoa kitsoyale chjotale nga katasíjé nga kataʼyaxkón jaʼaínle Niná (Mateo 6:9). A ʼyaní jme relijión tjíojin je chjota xi bakóyason joʼmi Niná ya jñani tsi. Tʼexkiai Hebreos 2:12 kao Romanos 10:13, 14, TNM.
-
Tjíotsoyason tʼatsʼe je gobiernole Niná. Je Jesús kui xá kinikasénni i̱ Sonʼnde nga kuitsoyason énnda chjotse tʼatsʼe je kjoatéxomale Niná, xi tsonile, jme xi sʼin je gobierno xi tsʼe Niná. Gobierno jebi tojé xi koa̱nle kʼoendajin kjoa xi tjín. Je Jesús kinchjani xi tʼatsʼe jebi saʼnda nichxin nga kinikʼien (Lucas 4:43; 8:1; 23:42, 43, TNM). Xi ijngosani, kʼoakitso nga je chjotale kuitsoyason tʼatsʼe gobierno jebi. Kʼiatsa jngo chjota kuicho niʼyali kʼoa kui tíbakóya tʼatsʼe gobiernole Niná, jmé relijión tíjnajin chjota je. Tʼexkiai Mateo 24:14.
-
Alikui i̱ tsjonjin yaole jme xi chon sonʼnde. Je xi ñaki chjotale Cristo ma alikui kjoasi kʼoa ni kjoa polítikajinla fijin (Juan 17:16; 18:36). Xi ijngosani, alikui ya kjenngile jokjoan kʼoa josʼín je chjota xi chʼao tjíomasʼín. Tʼexkiai Santiago 4:4.
-
Matsen nga tsjoake kjoaixi xínkjín. Je xi ñaki chjotale Cristo ma bexkón ngatsʼi chjota kʼoa alikui bʼasjengi tojñani tsʼe, nga̱ kui tjíofitjenngi jotso Énle Niná. Tonga je relijión ndiso likui kʼoasʼín, tosa ya tsjoánganʼio kʼianga kjoajchán sʼe (Miqueas 4:1-3). Je chjota xi ya tjíojin relijión xi kixi kao kjoatsjoa síchjén nichxinle kʼoa kao tao̱nle nga binyakao chjota kʼoa nga tsjoánganʼiole. Tʼexkiai Juan 13:34, 35 kao 1 Juan 4:20.
4. A jeʼyai ndʼai jñákjoánnile je relijión xi kixi.
Jósi, jñánile relijión xi ñaki ya Biblia bʼangini jme xi bakóya, kʼoa xi tíbexkón jaʼaínle Niná kʼoa títsoyasonkaoni nga tojekjoan je gobierno xi tsʼe Niná xi koa̱nle kʼoendajin kjoa xi tjín sonʼnde. Jmé relijión tjíojin je chjota xi ñaki tsjoake kjoaixi xínkjín kʼoa xi tsín kjoajchán fijin. Tʼexkiai 1 Juan 3:10-12.
