KJOAʼMIYA 7
Jméni je xi kjoatéxomale Niná tsole Biblia
1. Jméni je xi kjoatéxomale Niná tsole Biblia.
Ánni nga tojésíni Jesús xi ngisa nda koatexoma (MARCOS 1:40-42)
Jngo gobierno xi je Niná kisikʼéjnanda xotsole, xi ya tje̱n ngʼajmi koatexomani. Gobierno jebi kjoaʼaxin ngatsʼi chjotaxá sonʼnde kʼoa jé xosʼin nga kʼoakatama josʼin mele Niná i̱ Sonʼnde joni ya ngʼajmi. Xi ijngosani, tojé xi koa̱nle nga jtín sikatío chjota jngo tjíjtsa Sonʼnde. A tsí kjoaixi nga jngo gobierno xi kʼoasʼín machjénná xi chjotaa. A tsí nʼio nda tso én jebi, jósi ngái ji. Tʼexkiai Daniel 2:44; Mateo 6:9, 10, kao 24:14.
Je xi séntítjonle gobierno jebi jéní Jesucristo, ʼNdíle Niná, nga̱ je kiskoejin Jeobá nga Rey sʼin kʼoéjna. Tʼexkiai Apocalipsis 11:15.
Chótsenlai je video Jméni je xi kjoatéxomale Niná tsole Biblia
2. Ánni nga tojésíni Jesús xi ngisa nda koatexoma.
Tojéní Jesús, ʼNdíle Niná, xi ngisa nda koatexoma nga̱ nʼio ndʼé kʼoa ñaki kixi tíjna jme xi sʼín ngantsjai (Mateo 11:28-30). Xi ijngosani, je Jesús nʼio tse nganʼio tjínle xi sichjén nga koasenkao chjota, nga̱ yaa tje̱n ngʼajmi koatexomasonni Sonʼnde. Kʼianga jekinikjaʼáyale, kini ngʼajmi kʼoa yaa tsakʼejnatʼa ntsja ngakixile Niná (Hebreos 10:12, 13). Yaa kiskoya saʼnda nga kitsjoale xá je Niná nga koatexoma. Tʼexkiai Daniel 7:13, 14.
3. A tojé koatexoma Jesús.
Majain. Je Biblia kʼoatso nga jngo jtín mani choʼndale Niná xi ya koatexomakao Jesús kʼoa chjotatsje ʼmile (Daniel 7:27). Je chjota xi títjon kiskoejin Niná nga ya koatexomakao Jesús jéní pastro. Kʼoa je Jeobá tojo tíkjoejin saʼnda ndʼaibi je choʼndale xi ya koatexomakao ʼNdíle, xi xʼin kao xi yánchjín. Kʼianga jebiya chjota jebi yaa ngʼajmi “nikjaʼáyale” kʼoa “yao xi tsʼe espíritu” bʼaile, joni tsa Jesús. Tʼexkiai Juan 14:1-3 kao 1 Corintios 15:42-44.
Jótjín mani choʼndale Niná xi ya koai ngʼajmi. Je Biblia kʼoatso nga totjíchoa̱ mani, nga̱ Jesús i kitsole: “Jon xi tochoa mani xi tiyojtíon” (Lucas 12:32). Tojngo siento kao ñachanño jmi mani xi koatexomason sonʼnde kao Jesús. Tʼexkiai Apocalipsis 14:1.
4. Jmé xi kisʼin Jesús kʼianga jekitsʼaile xá.
Jméni xi títjon kisʼin Jesús kʼianga jekitsʼaile xá nga nó 1914. Tsakʼaonsje ya ngʼajmi je Na̱i kao na̱i xi ndajin kʼoa i kisikʼatsaojenngi i̱ Sonʼnde. * Je Na̱i nʼio jti koanle nga kʼoakinikao kʼoa kuinga nʼio tse kjoa tíbajngisíni jngo tjíjtsa Sonʼnde (Apocalipsis 12:7-10, 12). Kʼoa sa chʼao sa chʼao kjimachon i̱ Sonʼnde saʼnda nga kʼia. Tísʼe kjoajchán, cháonnʼio, chʼin kʼoa kao kjinrá. Jebi kui “choa̱” xi bakóná nga jeme koatexomason Sonʼnde je gobierno xi tsʼe Niná. Tʼexkiai Lucas 21:7, 10, 11, 31.
5. Jmé xi tísʼín ndʼaibi je gobierno xi tsʼe Niná kʼoa jméni xi sʼin nichxin xi nroaján.
Je xi tíbándiaa nga tíbʼabíson je Énle Niná jngo tjíjtsa Sonʼnde jé gobierno xi tsʼe Niná, kʼoa “[je]nkjín mani chjota” xi tísíkatíojtín ngakjijnda naxinandá. Miyón jemani chjota xi ndʼé tjío ni̱ma̱le xi tjíotsjoáʼnde nga je Jesús tíbatéxomale. Chjota jebi kʼoangile yaole kʼianga jesikjeson ngatsʼi chjotatsʼen je gobierno xi tsʼe Niná. Kʼiatsa mená nga kuichotjenngiaa je kjoanda xi kjoaʼaíkao gobierno xi tsʼe Niná, machjénní nga si̱tjosonlee Jesús. Tʼexkiai Apocalipsis 7:9, 14, 16, 17.
Je gobierno xi tsʼe Niná jngo jmi nó koatexoma. Kʼiaa ʼndenaxó sikao Sonʼnde jokjoansʼin tjínndajinle Niná saʼnda ngasʼa. Xijekoa̱n, je Jesús tsjoánile kjoatéxomale je Nʼaile (1 Corintios 15:24-26). A tsí meli nga kʼoéyanajmílai xi kjaʼaí chjota tʼatsʼe gobierno jebi. Tʼexkiai Salmo 37:10, 11, 29.
^ párr. 6 Kʼiatsa mesali jchai je én xi tongini kinokjoa xi nó 1914 kitjoson, chótʼajin je libro Jmé kjoanni xi bakóya je Biblia ya pájina 215-218.
