KJOAʼMIYA 4
ʼYákjoánni je Jesucristo
1. Jñá jaʼaini Jesús.
Jmé xi tsakasenkao Jesús nga nda kiskoéyani chjota (MATEO 11:29; MARCOS 10:13-16)
Je Jesús yaa ngʼajmi tíjna kʼoa espírituní kʼianga kjesa faʼaijin i̱ Sonʼnde. Kuinga tsín koanngósonsíni kao chjotasonʼnde (Juan 8:23). Je Niná jé títjon Jesús kisinda. Kʼoa xijekoanni, je Jesús tsakasenkao je Nʼaile nga kisinda tsojmi xi ngikʼa. Je Biblia kʼoatso nga ʼNdíjngole Niná ma. Ánni. Kuinga tojékjoan xi jesoa Niná kisinda (Juan 1:14). Kʼoa mani nga je kisikʼatoya énle Nʼaile kʼoati “én” ʼmile. Tʼexkiai Proverbios 8:22, 23, 30 kao Colosenses 1:15, 16, TNM.
2. Jmé xá jaʼaini Jesús i̱ Sonʼnde.
Kʼianga kisikasén Niná je ʼNdíle i̱ Sonʼnde yaa tsʼoa María kisikʼéjnaya kjoabijnachonle. Je María sʼa chjoónxongó nga kʼia kʼoa chjota judío kitje̱nni. Je xi nʼaile koan Jesús ali tsa jngojin chjotasonʼnde (Lucas 1:30-35). Tonga jmé xá jaʼaini Jesús i̱ Sonʼnde. Jan koya tjínni. Xi títjon, nga kuitsoya jokjoantjínni xi tʼatsʼe Niná. Xi majaoni, nga koakochoya jósʼin si̱tjosonlee Niná ninga kjoa kuitjátojiaan. Kʼoa xi majanni, nga tsjoá kjoabijnachon tsje xi kisʼele nga “kʼoechjíntjai” chjota. Tʼexkiai Mateo 20:28.
3. Ánni nga koanchjénsíni nga koanchjíntjai je chjota.
Je Niná ali tsa kʼoajinsʼin koanmele nga koa̱njchíngaa kʼoa nga kuiyá xi chjotaa. Jósʼin ʼyañá. Je Niná kʼoakitsokixile je Adán kʼianga kuiyá tsa tsín sitjosonle. Kʼiatsa kisitjosonlani Adán, tíjnajin saʼnda ndʼaibi (Génesis 2:16, 17; 5:5). Je Biblia kʼoatso nga totʼatsʼe Adán nga kʼoasʼin kjoabiya “jaʼasʼenjin” i̱ Sonʼnde. Kui xi tsonile nga je kisikakinná je jée, kʼoa kuinga biyasíñá. Kʼoa nga koa̱n kuitjontjé jngo kjoabʼechjíntjai machjén. Jméni xi kjoabʼechjíntjai ʼmi. Kui jmeni xi machjíntjai jngo chjota kʼianga koa̱n kuitjontjai (Éxodo 21:29, 30). Tʼexkiai Romanos 5:12 kao 6:23.
Kʼoa ʼyáni xi koa̱n kʼoechjíntjainá kʼoa xi koa̱nle kʼoasjentjainá xi tʼatsʼe kjoabiya. Mani nga chjotajée maa ngatsʼiaa alikui koa̱nná kʼoéchjíntjé je xíngiaa. Kʼianga biyaa totsaanñá je jée xi bʼechjiá. Tʼexkiai Salmo 49:7-9.
4. Ánni nga kʼiensíni je Jesús.
Je Jesús alikui chjotajée koan joni tsa ñá. Kʼianga kʼien ali tsa tsʼejin jée tsakʼéchjí nga̱ tsínkʼia jée tsakajngi, tsaan jée tsakʼéchjí. Je Niná nʼio tsjoakená xi chjotaa kʼianga kʼoasʼin kisikasén je ʼNdíle i̱ Sonʼnde. Kʼoa je Jesús kʼoati tsakakó nga tsjoakená nga kʼoasʼin kisitjosonle Nʼaile kʼoa kitsjoa kjoabijnachonle nga tsakʼasjentjainá xi tʼatsʼe jée kao kjoabiya. Tʼexkiai Juan 3:16 kao Romanos 5:18, 19.
Chótsenlai je video Ánni nga kʼiensíni Jesús
5. Jméni xi tísʼín ndʼaibi je Jesús.
Kʼianga tsakʼejna Jesús i̱ Sonʼnde, kisindaya xi chʼin tjínle, kisikjaʼáyale kʼien kʼoa tsakasenkao xi kjoañʼai tjíofaʼá. Nga kʼoakisʼin, kui tsakakó jme kjoanichikontʼain xi tsjoále nichxin xi nroaján je chjota xi kixi tjíofitʼale Niná (Mateo 15:30, 31; Juan 5:28). Kʼianga kʼien Jesús, je Niná kisikjaʼáyanile kʼoa espíritu kisikao ijngokʼani (1 Pedro 3:18). Kʼianga jekicho ya ngʼajmi yaa tsakʼejnatʼa ntsja ngakixile Niná kʼoa yaa kiskoya saʼnda nga kitsjoale xá je Nʼaile nga je koatexomason Sonʼnde (Hebreos 10:12, 13). Je Jesús jetíbatéxoma ya ngʼajmi kʼoa je chjotale tjíosíkʼabíson xi tʼatsʼe jebi jngo tjíjtsa Sonʼnde. Tʼexkiai Daniel 7:13, 14 kao Mateo 24:14.
Je Jesús, nga Rey sʼin tíjna ndʼaibi, jeme kjoaʼaxin je chjotatsʼen kʼoa kao ngayeje kjoa xi tjíobajngi, nga̱ je Niná jekitsjoale kjoatéxoma nga kʼoasʼin. Tonga ngatsʼi chjota xi makjainle tʼatsʼe Jesús kʼoa xi sítjosonle koatio ngantsjai nichxin i̱ Sonʼnde kʼianga jenaskánakoa̱nchon. Tʼexkiai Salmo 37:9-11.
