Bʼailaijin kjoanda nga kichʼasjeʼai nichxinli nga kichotʼayajin xo̱n jebi. Jengisa nda tsaʼyai ʼyanijin, tʼatsʼe je xá xi nʼiaijin kʼoa josʼin tísíxá je naxinandále Niná xi tiyojinjin. Choyalee nga tsakasenkaoli xo̱n jebi nga koanjinli nga tojin, xi testigole Jeobá maijin, xi kʼoatinʼiaijin josʼin mele Niná nichxin xi tiyoaa ndʼaibi. Kʼoaʼmilaijin nga tosi tonda chótʼayai xi tʼatsʼe Niná. Chja̱kaonajmí je xíngi kao miyoli tʼatsʼe jme xi tichotʼayai kʼoa tʼinkao ntsjaintsjaináijin je kjoajtín xi satíonajin (Hebreos 10:23-25).

Kʼianga ngisasa nda jchai xi tʼatsʼe Jeobá, jchaní jokji tsjoakeli kʼoa kʼoati koa̱nmeli nga koakolai tsanda ji nga tsjoachai (1 Juan 4:8-10, 19). Jósʼin koakolai Niná nga nyaon nyaon kʼianga tsjoachai. Ánni nga ji xi nda sikaosínili tsa si̱tjosuin kjoatéxomale. Jméni xi koasenkaoli nga ngisa koa̱nmeli kʼoasʼiain josʼin mele Niná. Je xi bakóyali Biblia koaan kuitsoyali xi tʼatsʼe jebi ánni nga ji kʼoa kao familiali “tosi tonda katasʼe[síni]no kjoatsjoachale Niná” kʼoa sʼe̱sínino “je kjoabijnachon xi tsínkʼia fetʼa” (Judas 21, NM).

Kʼoaʼmilaijin nga tsjoá tosi tonda chótʼayai jotjínni xi tʼatsʼe Niná. Je xi nʼio koasenkaoli kui libro “Tosi tonda katasʼeno kjoatsjoachale Niná”.