Kʼianga kjesa nikʼienjin Jesús, ño chjotale xi tsakjákaonajmí tʼaxin, jéní Pedro, Jacobo (Santiago), Juan kʼoa kao Andrés. Kʼianga jekʼoakitsole chjotale jmeni choa̱ xi sʼe̱ nga kuichokjetʼa nichxin, jngo kjoachjonangi xi nʼio tjínle kjoandosin tsakʼéjna, kitso: “ʼYá ni tsokʼoa je choʼnda xi nʼiotʼakon, xi nda be xá, xi je naile kisikʼéjnaʼnda xikʼa choʼndale, jméni nga tsjoásínile xi koakje̱nni nga fichó choa̱le” (Mateo 24:3, 45; Marcos 13:3, 4). Kʼianga kʼoakitso Jesús ali tsakuijin tsojmi xi ñaki ma chine xokitsole, kui jmeni xi tjínnele jchaa tʼatsʼe Niná xokitsole. Kʼoa nga nai ma je Jesús jngo jtín chjota kiskoejin xi tíbakóya ntsjaintsjaile énle Niná je chjotale nichxin xi totífetʼa. ʼYáni je choʼnda jebi.

Tojngo jao mani je chjotale Cristo xi ya koai ngʼajmi xi ya tjíojin jtín jebi. Je “choʼnda” jebi jéní Cuerpo Gobernante xi tsʼe testigole Jeobá. Kʼoa ñaki kʼiakjoán choa̱le tíbakóyale je énle Niná je choʼndale Jeobá. Tsa tsínlani choʼnda jebi likuijin ñaki choa̱le kʼuínyaná je énle Niná (Lucas 12:42).

Jé kjinele nga síkuinda niʼyale Niná (1 Timoteo 3:15). Je Jesús jé tsakánele jtín jebi nga sikuinda je naxinandá xi tíjnale Jeobá i̱ tʼanangi. Jé síkuinda je tsojmi xi tjínle naxinandále Niná, jé bándiaa josʼin ʼmiyason, kʼoa kui síchjén je jtín xi tjío nga tsoyaná énle Niná. Je choʼnda jebi kʼiakjoán tsoyaná xi tʼatsʼe Niná kʼiani nga machjénná, kʼoa kui síchjén ngayeje xi faʼa ya kjoajtínná, ya kjoajtíntsená, kʼoa kao ngayeje jmeni xi bʼasje je naxinandále Niná jolani tsa je xo̱n xi nichjén nga ʼmiyasoán.

Je “choʼnda” jebi nʼiotʼakon kjima Niná nga̱ kui tjíotsoya jokjoantjínni Énle Niná kʼoa tjíosítjoson xále nga tjíotsoyason je énnda chjotse. Kʼoati xi nda be xá ʼmile nga̱ kjimale tjíosíxákao je tsojmi xi tjíole je Cristo i̱ tʼanangi (Hechos 10:42). Je Jeobá tísíchikontʼain je xá xi tjíosʼín choʼnda jebi, sa nkjín sa nkjín chjota xi testigole Jeobá kjima kʼoa sa nkjín sa nkjín koya xo̱n tjíobʼasje xi énle Niná nroatʼa (Isaías 60:22; 65:13).

•  ʼYáni xi tsakánele Jesús nga kuitsoya ntsjaintsjaile chjotale je énle Niná.

•  Ánni nga “nʼiotʼakon” kʼoa “nda be xá” ʼmisínile choʼnda jebi.