1, 2. Jngola choa̱ tikʼéjnai xi kui bakó nga nʼio nda sʼele Jeobá kʼianga chjotakixi maa.

CHA̱NIYALAI jkui jngo chjoón xi tsojmi kafikatse kao tiʼndíle ya tienda. Kʼianga bitjoni ya tienda toxijña sasénjnda je tiʼndíle. Ánni. Kuinga jngo karroʼndí yʼa kʼoa kachajinle nga kʼoakatsole je male nga katabatsele. Tiʼndí jebi nʼio aon male nga kʼoakasʼín kʼoa kjiʼndá. Tonga je male síkʼéjyo kʼoa fikao ijngokʼani ya tienda. Je male nʼio tsjoa sʼele nga fikao ijngokʼani tsojmi jebi je tiʼndíle kʼoa nga síjé kjoanichatʼa.

² Nʼio tsjoa male je xi xijchá ma kʼianga kʼoasʼin kixi ma je ʼndíxtile. Kʼoa je Nʼainá xi tíjna ngʼajmi ngisa tsjoa male, nga̱ je jngoní “Niná xi ñaki kixi” (Salmo 31:5). Je Jeobá nʼio tsjoa male kʼianga sa chrian sa chrian biyolee kʼoa nga tibʼenelee yaoná nga chjotakixi kjimaa. Tonga ánni nga mesíniná nga nda koanngínkoaa yaoná tojo kitso je pastro Pablo, nga kixi koaan ngantsjai. Kuinga mená si̱tsjoayaa ni̱ma̱le Jeobá kʼoa nga tosi tonda sʼe̱ná kjoatsjoachale (Hebreos 13:18). Ñola koya chótʼayá jñani sakʼoa ñʼai maná nga kixi maa, kʼoa xijekoa̱n, kui jchaa jme kjoanda xi tjenkao kʼianga kʼoanʼia.

3-5. 1) Jósʼin bájinkonná je Biblia jokji xkón tíjna tsa tiñá chʼa̱nachanilee yaoná. 2) Jméni xi koasenkaoná kʼianga tsín tiñá chʼa̱nachanilee yaoná.

³ Xi títjon koya jchaa kuinga tsín koa̱n tiñá chʼa̱nachanilee  yaoná. Mani nga chjotajée kitjenñá choa ñʼai tíjna nga kʼoanʼia. Je chjotale Cristo xi ya tsakatio naxinandá Laodicea kʼoakisʼin. Ninga nyiná kitsole yaole chjota jebi, je Jesús kʼoakitsole nga yo̱ma̱, nga xka̱ kʼoa nga tokjiojti ngixko̱n Niná (Apocalipsis 3:17). Ngisa xkón tsakatio nga tije tsakʼanachanile yaole.

⁴ Je Santiago kʼoati i̱ kitso: “Tsa jngo xi jon xi síkjaʼaitsjen nga bexkón Niná, xi likui bʼéchjoale ni̱je̱n, totíbʼanachale ni̱ma̱le. Alikui jme chjíle josʼin bexkón Niná” (Santiago 1:26). Kʼiatsa kʼoasʼin si̱kjaʼaitsjeen nga nda tísasénle Jeobá josʼin tinixálee ninga likui nda tinichjén je nijeen to yaoná tichʼanachalee. Kʼiatsa kʼoatinʼia toxitsjoani josʼin tiʼyaxkoán je Niná. Jméni xi koa̱n sʼiaan nga tsín kʼoasikji xkón si̱kʼéjnaa yaoná.

⁵ Je Santiago kinchja̱ni tʼatsʼe je “kjoatéxoma xi ñaki kjoakixi”, xi tsonile, je Biblia. Kʼoa jngo cho̱tsín xi ma chotsensʼen kisingósonkao kʼoa kʼoakitso nga ya chótsenyá jokjoaan ánni nga jchasíñá jñasani nga chaná (tʼexkiai Santiago 1:23-25). Je Énle Niná basenkaoná nga ñaki kixi maa kʼoa nga ʼyaa jñani si̱ndayaa yaoná (Lamentaciones 3:40; Ageo 1:5). Kʼoati koa̱n si̱jélee je Jeobá nga katakotʼajin ni̱ma̱ná, nga katabasenkaoná nga jchaa jñani nʼio chaná kʼoa katatsjoáná nganʼio nga si̱ndayaa yaoná (Salmo 139:23, 24). Tsakui nichxin saʼnda tsín tsen kjimaná kʼoa jeni tichʼanachalee yaoná. Tonga likui koa̱n si̱chajiaan josʼin bekon Jeobá ʼyani xi kʼoasʼín. Ya Proverbios 3:32 kʼoatso nga “je Jeobá alikui tsjoake chjota xi jaonkjaín”, kʼoa nga je xi “miyole mani je chjota xi kixi”. Je Jeobá koaan koasenkaoná nga jchaa jokjoanni kjoaan ngixko̱n kʼoa koasenkaoná nga kui koa̱nmená kʼoasʼiaan josʼin mele. Kʼoa koaan kʼoati i̱ kuixoán jokitso je pastro Pablo: “Menajin nga nda koanngínkoaijin yaonajin ngayije kjoa”. Kjoaixiní nga tsín ʼya xi kʼoakjoansʼin kuitjosonle ndʼaibi nga̱ chjotajéeñá ngatsʼiaa, tonga machjénní nga kʼoénelee yaoná nga kixi katamaa.

6. Ánni nga tjínnesínile nga ñaki kʼoatjín én xi kjoakao xínkjín xi jechixan, kʼoa jméni xi nda sikuindale yaole.

⁶ Xi ijngosani, kʼoati machjén nga ñaki kixi katamaa ya yaniʼyaná. Je chjoón kʼoa kao je xʼin machjén nga ñaki kʼoatjín én xi kjoakao xínkjín. Alikui koa̱n nga kjaʼaí xi nʼio sisinle xi tsín tsa chjoónle kʼoa xi tsín tsa xʼinle mani. Alikui koa̱n nga kjaʼaí chjota kjoakaoʼma ya Internet kʼoa tsa pornografía skótsenle ya telebisión, ya Internet kʼoa tsakuije̱ xi faʼaitʼa rebista, nga̱ chʼaotjín jebi kʼoa yaa nroani nga chʼaosʼin batio. Tjínkʼa chjotale Cristo xi kʼoasʼín, bʼanachale tsa xʼinle kʼoa tsa chjoónle. ʼYani xi kʼoasʼín alikui kixi kjima. Alikui kʼoaiʼndee nga kʼoakatamaa, alikui koa̱n nga jaonkjaín koaan kao je chjoónná kʼoa tsa xʼinná. Tosa je choa̱le David koanngíntjenngiaa kʼianga kitso: “Alikui ya fajta je chjotandiso, kʼoa bʼasjengiña je xi jaonkjaín” (Salmo 26:4).

7, 8. ʼYá tsʼe choa̱ xi faʼaitʼa ya Biblia xi koa̱n sichjén je xi xijchá ma kʼianga kuitsoyale ʼndíxtile jokji chjíle nga chjotakixi maa.

⁷ Je xi xijchá ma tjínnele koakoyale je ʼndíxtile jokji chjíle nga chjotakixi maa. Kʼianga kuitsoyale ngisa nda nga kui Biblia sichjén. Ya Biblia faʼaitʼa choa̱le chjota xi tsín koa̱n chjénngilee jokisʼin. Tobʼelañá je Acán, koanmele tsakʼéʼmatʼain yaole kʼianga tjín xi kisiché. Je Guehazí, tsakʼéndiso tojoni  nga kitjoéle jme xi mele. Kʼoa je Judas, ali tsa tokisichéjin, saʼnda tsakʼanachaa kʼianga tsakaténa Jesús (Josué 6:17-19; 7:11-25; 2 Reyes 5:14-16, 20-27; Mateo 26:14, 15; Juan 12:6).

⁸ Tonga kʼoati faʼaitʼa choa̱le chjota xi nda kisʼin. Kuilakji je Jacob, kʼianga kisʼejinle nga tokjoataon xi koan nga ya naxále xtile kichosatíoya tao̱n kʼoakitsole nga katafikaoni. Kʼoati tíjna choa̱le je tsotile Jefté. Tsoti jebi kisitjoson én xi kitjoni tsʼoa je nʼaile ninga nʼio ñʼai koanle. Kʼoa kuilakji je Jesús, kʼianga kichone chjota kontrale nʼiojin koan kʼoa likui tsakʼejnaʼma nga̱ kui xi ngisa koanndosinle nga katabitjoson je én xi tongini kisʼetʼa Biblia kʼoa nga tsín jme xi katamale miyole (Génesis 43:12; Jueces 11:30-40; Juan 18:3-11). Tojngo jaola choa̱ kaʼyaa ibi tʼatsʼe chjota xi kixi koan kʼoa xi tsín kixi koan. Tonga nkjínsa choa̱ faʼaitʼa ya Biblia xi koa̱n sichjén je xi xijchá ma kʼianga kuinyakao ʼndíxtile nga ñaki chjotakixi katama.

9. Ánni nga nʼio machjénsíni nga je xi xijchá ma koatiotítjonle choa̱ je ʼndíxtile nga ñaki kixi koa̱n, kʼoa jósʼin kʼianga tsín siskáyajinle ʼndíxtile.

⁹ Kʼianga kuitsoyale ʼndíxtile je xi xijchá ma ali tsa to énjin xi kjoakao, jé koatiotítjonle choa̱. Je pastro Pablo i kitso: “Jiʼni xi bakoyalai xi kjaʼaí, a tsín ʼmiyalai yaoli. Ji xi nokjoayai nga tsín tsa koa̱n nga si̱ché, a nichéní” (Romanos 2:21). Tjín xijchá xi kʼoatsole ʼndíxtile nga kixi katama tonga je likuini kʼoasʼín. Tsakui nichxin likuikjoan kʼoatsoyeje jokjoantjínni kjoa kʼoa tsa maije̱ kui bʼa je tsojmi xi tsín tsa tsʼe. Kʼoa itso nga binyangi yaole: “Ali tsa énndisojin jebi, aliʼya xi josikao”. Kʼoa tsa maije̱ itso: “Toxá ma chjoéñá tsojmi jebi, liʼya xi jotso”. Kʼoa nga kʼoatso je xi xijchá ma tijé sískáyajinnile ʼndíxtile. Alikui si̱chajiaan kʼianga kjoachéní ninga tse kʼoa ninga tochoa jmeni xi si̱ché. Kʼoa kʼoatisʼin tíjna je énndiso. Kʼiatsa tsín kʼoatjín jmeni xi kuixoán ninga tse kʼoa ninga choa kjoa,  énndisoní (tʼexkiai Lucas 16:10). * Je ʼndíxti ngotjo benile kon jmeni xi tsínni kʼoatjín kʼoa kʼianga majchínga kʼoati sʼín (Efesios 6:4). Tonga tsa kʼoenele yaole je xi xijchá ma nga nda choa̱ kʼoejnale ʼndíxtile tochale tosi tonda je Jeobá kʼoasjengʼa nga jekoa̱njchínga, ningalani tsín kixi sʼín ndʼaibi je chjota (Proverbios 22:6).

10. Kʼianga chjotakixi katamaa ngantsjai, jméni xi si̱kuindalee yaoná kʼianga cho̱banajmiá kao je ndsʼee.

¹⁰ Kʼoati kixi katamaa kao je ndsʼee xi tongóson sʼin makjainná. Jetsaʼyaa ya kjoaʼmiya 12 josʼin si̱kuindaa yaoná kʼianga tichobanajmiá kao ndsʼee. Tsa tsín kʼoasʼiaan tochale én cha̱nibasoán kʼoa saʼnda énndiso kjoáne xíngiaa. Kʼiatsa kui kʼoakuixoán xi tsín ʼyaa tsa kʼoatjín kʼoa tsa mai, jeʼénndiso tichanibasoán, ninga tsín kʼoatjín tokoán nga kʼoasʼiaan. Tongisa ndatjín nga ndakjoanla si̱kjaʼaitsjeen tiʼani nga kje jme xi bixónjián (Proverbios 10:19). Kʼoa kʼoati sʼiaan ninga kʼoatjín jmeni xi kuixoán. Nga̱ likui mená nga chʼaosʼin si̱kʼaxkiaa xíngiaa kʼoa nga ñá kuinójiaan yaoná jmeni xi tsín ñá bʼakaoná (1 Tesalonicenses  4:11). Kʼianga jme xi kʼuínlee xíngiaa alikui koa̱n nga toxkia kʼuínlee. Tsa ñá xi kʼoénelee yaoná koaanná nga nda tso én chja̱kaontsjé je xíngiaa (tʼexkiai Colosenses 4:6).

11, 12. 1) Jósʼin sítsetʼainsa kjoa yaole je xíngiaa kʼianga kui jée xi ai tíjna sokóle. 2) Jmé kjoandiso tíkaníbason je Na̱i tʼatsʼe jée xi ai tjío. 3) Jósʼin nga ñaki kixi maa kao je naxinandále Jeobá.

¹¹ Kʼoa ngisa nʼio machjén nga kixi katamaa kao je xi chjotajchínga sʼin tjío ya jinjtín. Kʼiatsa ʼyani xi bʼéʼma je jée xi kasokóle kʼoa tsa to énndiso nchja̱ kʼianga chjonangile tosa tosítsetʼainsa kjoa yaole. Tochale saʼnda jao ndiaa koaiya, kʼoakji sixále Jeobá kʼoa kʼoakji jée koa̱njngíkaoni. Kʼiatsa kʼoasʼin ñaki totíbʼanachaa (Salmo 12:2). Ijngosa koya xi tsín kixi tíjna kʼiaa tsa tochoa kʼoakuitsole je xi chjotajchínga sʼin tjío jokjoantjínni je kjoa xi tíjnajin kʼoa likui kʼoakuitso jmeni xi nʼiokjoan machjén (Hechos 5:1-11). ʼYani xi kʼoasʼín xi kui kjoamaña sʼele, kui kjoachʼanachale Na̱i tjíotsaoya (chótsenlai rekuadro xi tso: “ Kjoandiso xi tíkaníbason je Na̱i tʼatsʼe jée xi ai tjío”).

¹² Kʼoati kixi katamaa kao je naxinandále Jeobá kʼiatsa informená tibʼendaa. Ñaki kʼoatjín kʼoétʼaa jotjín kanixá. Kʼoa tsa jngo xo̱n tibʼendaa nga mená nga tsesa si̱xálee Niná kʼoati ñaki kʼoatjín jmeni xi kʼoétʼaa. Tobʼelañá, tsakui kjonangi tsa chʼin tjínná alikui koa̱n kʼoéʼmaa kʼiatsa chʼinni tjínná. Kʼoétʼayejeñá jmeni xi síjé xo̱n jebi xi tʼatsaan (tʼexkiai Proverbios 6:16-19). *

13. Jósʼin bakoá nga ñaki kixi maa kʼiatsa jngo ndsʼee nixákoaa, kʼoa tsa jngo ndsʼee xi negosio tinʼia kao je.

¹³ Kʼoati ñaki kixi katamaa kʼiatsa jngo ndsʼee nixákoaa, kʼoa tsa jngo ndsʼee xi negosio tinʼia kao je. Tonga alikui  ma ya bʼendajiaan kjoa jebi ya Ndʼia jña chotʼayá kʼoa tsa kʼiaje̱ nga tiʼmiyasoán. Kʼiatsa jngola ndsʼee xi xá kʼoailee, kuikjoán nichxin kʼoéchjílee kʼiani kaʼmilee kʼoa jotjín kaʼmilee kʼoa kʼoati kʼoailee jmeni xi tso kjoatéxoma (1 Timoteo 5:18; Santiago 5:1-4). Kʼoa tsa ñá xi ya si̱xákoaa je ndsʼee kʼoatisʼin ndakjoan si̱tjosoán ngayeje xá xi tsjoáná (2 Tesalonicenses 3:10). Ali tsakui choyalee nga ngisasa nda sikaoná ñá tokuini nga ñatjen chotʼayá Énle Niná, kʼoa nikuijinla choyalee nga ngisa tsjoáʼndená nga si̱kjáyaa tikʼoajinni chjota xi ngikʼa (Efesios 6:5-8).

14. Jméni xi sʼiaan kʼiatsa negosio tinʼia kao jngo ndsʼee kʼoa ánni.

¹⁴ Kʼoa jméni xi sʼiaan tsa tao̱n si̱kinyaa kʼoa tsa jme negosio kuitjásʼe̱nlee kao jngo ndsʼee. Ya Biblia jngo kjoafaʼaitsjen tsjoá nga tongisa nda nga xo̱n katasʼenda. Tobʼelañá, kʼianga jngo nangi tsakatse je Jeremías, jao xo̱nle nangi tsakʼénda ngixko̱n testigo, kʼoa xijekoan nda tsakáyotjao xo̱n jebi (Jeremías 32:9-12; kʼoati chótsenlai ya Génesis 23:16-20). Kʼianga kʼoasʼin xo̱n bʼendaa, nga testigo nichjén kʼoa nga firma nʼia ali tsakui xi tsonile tsa chʼaosʼin tinikjaʼaitsjeen tʼatsʼe xíngiaa, kui kʼoanʼiañá nga tsín jme kjoa katasʼe. Alikui kixi tíjna tsa totʼatsʼe negosio koa̱njtichañá xíngiaa kʼoa tsa tokʼoatjín kjoa nga xkoa̱ya kuiyoñá ya jinjtín (1 Corintios 6:1-8). *

15. Jósʼin síkjaʼaitsjen Jeobá tʼatsʼe chjota xi bʼanacha kʼianga negosio sʼín kʼoa jósʼiaan ñá xi chjotale Cristo maa.

¹⁵ Ñá xi chjotale Cristo maa kʼoati ñaki kixi katamaa kao chjota xi tsín ngóson sʼin chotʼayá. Tojo kitso je pastro Pablo mená nga kixi koanngínkoaa yaoná “ngayije kjoa” (Hebreos 13:18). Je Niná mele nga kixi koaan kʼianga negosio  nʼia toʼya kaoni. Xi tʼatsʼe jebi, ya libro xi tsʼe Proverbios nkjín kʼa síkʼaxki̱ je chjota xi bʼanacha nga bʼécho̱ya tsojmi (Proverbios 11:1; 20:10, 23). Nichxin kjoatse kao libra kʼoa kao pesa tsakʼécho̱yani je tsojmi xi tsakaténa kʼoa xi tsakatse je chjota. Kʼoa je tao̱nsine kʼoa kao tao̱nchxoa xi tsakʼéchjíni kʼoati kui tsakʼécho̱yani. Nkjín chjota xi tsojmi baténa nga kʼia xi kisichésonle chjota, jao koya pesa kisichjén, kʼoa je libra xi kisichjén kʼoati likui nda. * Je Jeobá nʼio jtike kjoa jebi. Kʼiatsa mená nga tosi tonda sʼe̱ná je kjoatsjoachale Niná alikui koa̱n nga chʼa̱nachaa.

16, 17. Jmé kjoachʼanacha xi nʼio tjín i̱ Sonʼnde, kʼoa jónʼia ñá xi chjotale Cristo maa.

¹⁶ Kʼianga kʼoasʼin je Na̱i tíbatéxoma i̱ Sonʼnde, nʼio tjín chjota xi tsín kixi kjima. Kʼoa nga kʼoasʼín chjota, ñʼai maná nga tosi tonda kixi maa. Tjín chjota xi nʼio bʼanacha tojoni nga so̱koxále. Kʼoatso nga nda male xo̱n kʼoa nga nʼio male kʼoasʼín je xá xi tíbajngi. Kʼoati bʼanacha kʼianga jme xi bʼéchjíntjai kʼoa tsakui kʼoasjeje̱ xo̱n xi machjénle chjota nga xin naxinandá fi. Nkjínsa koya josʼin bʼanacha chjota tojoni nga sʼele jme xi mele. Tjín chjota xi saʼnda bʼéchjíʼmale chjota xi xá tjínle. Kʼoa kʼoati tjín xtiskuela xi bʼanacha kʼianga bʼénda examenle kʼoa kao nga bʼénda xo̱nle ya niʼyale, tsakui nichxin ya Internet koasjaiya kʼoa jesoa tsakʼénda kuitso. Ánni kʼoasʼínsíni chjota. Kuinga “taon be xi nda[tjín]”, nga “toyaole tsjoake” kʼoa nga to tao̱n tsjoake (2 Timoteo 3:1-5).

¹⁷ Sakʼoaa ñʼai maná nga kixi mangínkoaa yaoná. Tsakui nichxin kʼoasʼin si̱kjaʼaitsjeen nga toje chjota xi bʼanacha xi nda batio, xi sʼele tsojmi kʼoa xi nda njele tao̱n kʼoa nga tosa tse kjoañʼai tjíofaʼá je choʼndale Niná kʼianga  ñaki kixi tjíofikao yaole (Salmo 73:1-8). A toxitsjoani nga kixi mangínkoaa yaoná. Mai. Kataʼyala kʼaa jme kjoanda xi tjenkao kʼianga mangíntjenngiaa kjoatéxomale Niná.

18. Ánni nga nʼio chjísínile nga ʼyaná kʼianga chjotakixi maa.

¹⁸ Kʼianga ʼyaná nga chjotakixi maa kʼoa nga tsín maná chʼanacha nʼio chjíle (chótsenlai rekuadro xi tso: “ A ñaki chjotakixiña”). Kʼoa ali tsakuijin xi machjén tsa nyiná, tsa nʼio maná jonʼia, tsa nda matseen kʼoa tsa ngʼa tiyoaa. Koaan kixi koanngínkoaa yaoná ninga nʼio nkjín chjota xi tsín kʼoasʼín ndʼai (Miqueas 7:2). Kʼoa ninga tjío chjota xi skoe̱sinná nga chjotakixi kjimaa kʼoati tjío xi skoe̱xkónná kʼoa xi kʼoaʼénná. Kʼoa tsakui nichxin saʼnda ngisani nda koa̱ntʼeen nga chjotakixi kjimaa. Nkjín testigole Jeobá xi tsín bichonsje xále kʼianga nikitjo chjota xi tsín kixi síxá, kʼoa sakʼoaa je bʼaile xá xi kui machjénle chjota xi kixi síxá.

19. Jósʼe je kjoafaʼaitsjenná kʼoa jósʼin bijnaa ngixko̱n Jeobá kʼianga chjotakixi maa.

¹⁹ Ninga tsín tongatsʼiaa nga kʼoakoa̱ntʼeen, jaola koya kjoanda si̱kʼaxkiaa xi sokóná kʼianga chjotakixi maa, xi ngisasa chjíle. Xi títjon, “nda [sʼe] kjoafaʼaitsjen[ná]” tojo kitso je pastro Pablo (Hebreos 13:18). Xi majaoni, tosi tonda sʼená je kjoatsjoachale Nʼainá xi tíjna ngʼajmi. Je Jeobá nʼio bechjí nga chjotakixi ma je choʼndale (tʼexkiai Salmo 15:1, 2; * Proverbios 22:1). * Kʼoa kui jebi xi ngisasa chjíle. Ya kjoaʼmiya xi fini kui chótʼayá jósʼin bekon Jeobá je xá.