1, 2. Jmé kjoatjao xi kitsjoaná Niná kʼoa ánni nga nʼio chjísínile.

JE Nʼainá xi tíjna ngʼajmi jngo kjoatjao xi nʼio chjíle kitsjoaná, xi basenkaoná nga chjenngilee jokjoan. Kjoatjao jebi, kuiní kjoafaʼaitsjenná (Génesis 1:27). Kui xi basenkaoná nga machoyaná jotso Biblia. Kʼiatsa si̱chjén kjoafaʼaitsjen xi faʼaitʼa Biblia, sa tsjoacha sa tsjoacha koaan Jeobá kʼoa je kjoafaʼaitsjenná skoe̱ní jñanile xi ndatjín kʼoa jñanile xi chʼaotjín (Hebreos 5:14).

² Nʼio machjén nga koa̱nná si̱chjén kjoafaʼaitsjen xi faʼaitʼa ya Biblia, nga̱ sa kjaʼaí sa kjaʼaí kjimachon sonʼnde ndʼaibi. Sakʼoaa tsín kjoatéxoma xi basenkaoná jonʼia, jolani xi tʼatsʼe njín, nga kui machjén nga maxkile chjota kʼoa nga tjínkʼa xki xi kui tjín choale. Nʼio mandosinná xi tʼatsʼe jebi nga̱ mená si̱tjosonlee Jeobá. Kʼiatsa kuilani kjoa tibitjatojiaan, jósʼiaan kʼianga tsín chʼao sʼe̱ kjoafaʼaitsjenná kʼoa nga tosi tonda sʼe̱ná kjoatsjoachale Niná. Kʼianga jchaa josʼiaan, machjénní nga koa̱nchoyaná je kjoafaʼaitsjen xi faʼaitʼa ya Biblia xi kui tínchja̱ni (Proverbios 2:6-11). Chótʼajinla kʼaa.

3, 4. Kʼiáni síkʼaxki̱ títjon je Énle Niná nga xkón tíjna je njín, kʼoa jñánile nga jao koya kjoafaʼaitsjen xi bakóyaná.

³ Je kjoabijnachon kʼoa kao je njín yaa yʼa yaole xínkjín  kʼoa nʼio xkón be Jeobá nga jao. Jósʼin ʼyañá jebi. Kuinga i̱ kitsole Jeobá je Caín kʼianga jekisikʼien je Abel: “¡Tinóʼyalalai! Je njínle ndsʼai tíbatéjétʼana saʼnda jinnangi” (Génesis 4:10). Je xi njín kitsole ibi Jeobá jé kjoabijnachonle Abel. Je njínle Abel joxi tsakatéjétʼale Jeobá nga katasíjndani nga kʼoasʼin kinikʼien (Hebreos 12:24).

⁴ Kʼianga jejaʼato Jtsínʼio, je Niná kitsjoaʼnde nga koa̱n chi̱ne je yaole cho̱, tonga xi tʼatsʼe njín i kitso: “Tojéní yao kao kjoabijnachonle, xi tsonile je njínle, xi tsín koa̱n chi̱nao. Kʼoa kʼoati kuenta sijé xi tʼatsʼe njínle kjoabijnachonno” (Génesis 9:4, 5). Kjoatéxoma jebi jao koya tjínni xi bakóyaná kʼoa tjínnele si̱tjosoán nga̱ yaa kitjenñá Noé. Xi títjon, kui bakóyaná nga je njín xi tjínle cho̱ kao chjota kui tsoyanile je kjoabijnachonle. Xi majaoni, kui bakóyaná nga Jeobá, xi títsjoá kjoabijnachon, kuenta sijéle je xi tsín bexkón je njín kao kjoabijnachon (Salmo 36:9).

5, 6. Jósʼin tsakakó Kjoatéxomale Moisés kʼianga xkón tíjna je njín kʼoa nga nʼio chjíle ngixko̱n Niná (kʼoati chótsenlai rekuadro xi tso: “ Jchaxkoán kjoabijnachonle cho̱”).

⁵ Kʼianga je njín kui tsoyanile kjoabijnachon kʼoa nga xkón tíjna ngixko̱n Niná kʼoati ya kisʼetʼa Kjoatéxomale Moisés. Ya Levítico 17:10, 11, je Jeobá itso: “Kʼiatsa jngo chjota [...] xi njín ski̱ne, tojme njínni, kontra koatejnale je chjota xi njín ski̱ne, kʼoa sikʼienña nga kjoaʼaxian ya jinnaxinandále. Nga̱ je kjoabijnachon xi tjínle je yao, yaa njín tíjnajin, kʼoa kui xá kitsjoaña nga ya jchatʼa jéeno ya sonxta, nga̱ jé njín xi síchatʼa je jée xi totʼatsʼe kjoabijnachon xi tjínle” (chótsenlai rekuadro xi tso: “ Kao njín chatʼani je jée”). *

⁶ Je chjota israelita tjínnele nga tsakʼéjtenjinʼnde je  njínle cho̱ kʼiatsa tsín ya sonxta koanchjén. Kʼianga kʼoakisʼin, kui kitsoyanile nga jé Niná kitsjoa ijngokʼanile je kjoabijnachonle cho̱ (Deuteronomio 12:16; Ezequiel 18:4). Tonga alikui tijaʼatonengáni choa̱le jokisʼin, alikui tsa ñaki kisikjoan chxoa chxoa yao xi kiskine. Nga tonga ndakjoanni tsakʼasjengi je njínle cho̱ xi kiskine alikui chʼao koanle kjoafaʼaitsjenle nga̱ tsabexkón je Niná xi títsjoá kjoabijnachon.

7. Jmé xi kisʼin David nga xkón tsabe je njín.

⁷ Je David, jngo chjota xi nda kisʼin ngixko̱n Niná, nda koanjinle je kjoatéxoma xi kitsjoa Niná xi tʼatsʼe njín (Hechos 13:22). Ñandia kʼianga nʼio fatile, jan chjota kjoajchánle jaʼasʼen kjoanʼio ya jña tjío chjota kjoajchán kontrale kʼoa tsakʼasje choale nandá ya xjáonandá xi ya tíjna. Jókisʼin David kʼianga kichokaole nandá chjota jebi. Nʼio kinchja̱, kitso: “A kui skʼuia̱ je njínle chjota xi tsín yaole kini ninga si̱kʼien”. Xi kao David kuikjoánni njínle nga jan chjota jebi xi skʼuí kʼiatsa kuilani tsakʼi je nandá xi kikʼá. Kuinga tsín tsakʼisíni David ninga nʼio fatile, “tosa je Jeobá tsakʼéjtenle” (2 Samuel 23:15-17).

8, 9. Tʼeyanajmílai, a tsʼantjaiya josʼin síkjaʼaitsjen Niná xi tʼatsʼe njín kao kjoabijnachon kʼianga kitsʼia je jtín xi tsʼe chjotale Cristo.

⁸ Siento nó nga koanskanni, jngo kjoajtín tsakʼéjna je Cuerpo Gobernante xi tsakándiaale naxinandále Cristo. Nga kui nichxin jela jao jmi kao ño siento nó jaʼato nga tsakʼaile kjoatéxoma je Noé nga tsín koa̱n njín ski̱ne kʼoa jela jngo jmi basen nó jaʼato nga tsakʼaile kjoatéxoma je Moisés. Kʼianga kisʼejna kjoajtín jebi, je Jeobá kisiʼisenjin kjoafaʼaitsjenle je Cuerpo Gobernante nga kiski én jebi: “Nda kisasenle je Espíritu Santo, kʼoa kao jinjin, nga tsín tojo tse chʼá kʼoénelaijin. Tojé jebi xi nʼio machjén. Kʼoasʼin chjaʼaxinlao yaono je ngayije tsojmi xi bʼaitʼale xkóson, kao njín, kao yaole cho̱ xi kichjoʼndósin, kao kjoachajngi” (Hechos 15:28, 29).

 ⁹ Tojosísʼin kaʼyaa, je Cuerpo Gobernante koanjinle nga nʼio xkón tíjna je njín. Kʼoati koanjinle nga je jée xi kitjenkao kʼianga tsín nda machjén yaa mangóson je kjoaxkóson kao kjoachajngi. Nichxin xi tiyoaa ndʼai kʼoatisʼin nikjaʼaitsjeen tsanda ñá. Kʼianga kui kjoa bitjatojiaan xi tʼatsʼe njín, títjon kui chotʼayajiaan kjoafaʼaitsjen xi tsjoá je Biblia ánni nga ʼyasíñá josʼin mele Niná nga sʼiaan.

10, 11. 1) A bʼaiʼndeñá xi testigole Jeobá maa nga njín xinyáná kʼoa tsakuije̱ xi ño koya tjínle njín. 2) Xi tʼatsʼe njín, jñánile xi ñá xi kuixónñá tsa kʼoaiʼndee kʼoa tsa mai.

¹⁰ Kʼianga kʼoatsoná je kjoatéxomale Niná, “chjaʼaxinlao yaono je [...] njín”, ñá xi testigole Jeobá maa alikui bʼaiʼndee nga njínná tjosje kʼianga tjín xi xi̱nyále, kʼoati likui bʼaiʼndee nga njín xinyáná kʼoa likui bʼaiʼndee nga xinyátjao njínná ninga tiñá xi̱nyá ijngokʼaniná. Xi ijngosani, kʼoati likui bʼaiʼndee nga kui xinyáná nga ño koya je xi tjínle njínná, je xi glóbulos rojos, glóbulos blancos, plaquetas kʼoa plasma ʼmi.

¹¹ Je chjinexki kʼoati jemale síxkoa̱ya nga ño koya xi tjínle je njín kʼoa kjaʼaí kjaʼaísʼin síchjén. A tojo njínsa jebi. A koaan xi̱nyáná. Ñá xi kuixónñá nga jngó jngoá. Kʼoati ñá xi kuixónñá tsa kʼoaiʼndee kʼiatsa kui machjénná xi hemodiálisis ʼmi, xi hemodilución ʼmi kʼoa tsakuije̱ recuperación de sangre nga tonga tsaankjoanni je njín xi kjimachjén, xi tsín kaxinyátjao (chótʼajin ya kjoaʼmiya xi majngokaojñani tso: “Josʼin síchjén chjinexki je njín”).

12. Tsa jngo kjoa tijnajiaan jñani nga kjoafaʼaitsjenná si̱chjén, ánni nga tsín tokjoa koa̱nsíniná jmeni xi sʼiaan, kʼoa jméni xi koasenkaoná josʼiaan.

¹² Je Jeobá nʼio mandosinle jmeni xi nʼia nga jngó jngoá, josʼin nikjaʼaitsjeen kʼoa anni nga kʼoanʼiañá tsa jmeni (tʼexkiai Proverbios 17:3; * 24:12). * Jméni xi sʼiaan tongini tsa mai kʼoa tsa jaon kuixoán tʼatsʼe josʼin koa̱nxkiná kʼoa tsa jme xki xi kʼoainá. Títjon kjoanla kʼoétsʼoalee  Niná kʼoa kjoásjaiyaa jotjínni tʼatsʼe jebi kʼoa xijekoa̱n nda si̱chjén kjoafaʼaitsjen xi jetjínná (Romanos 14:2, 22, 23). Alikui koa̱n nga kjaʼaí chjota kʼoakuitsoná jme xi sʼiaan kʼoa ni koa̱njinla i̱ kʼuínlee je xíngiaa: “Jósʼiain tsa jilani”. Xi tʼatsʼe jebi, itso Énle Niná: “Nga jngójngó katabʼami chʼá xi titsʼeni” (Gálatas 6:5; Romanos 14:12; chótsenlai rekuadro xi tso: “ A xkón ʼbe je njín”). *

13. Jméni xi bakó tʼatsʼe Jeobá je kjoatéxoma kʼoa kao kjoafaʼaitsjen xi faʼaitʼa Biblia. Jngola choa̱ tʼejnai.

¹³ Jméni xi bakó je kjoatéxoma kʼoa kao kjoafaʼaitsjen xi  faʼaitʼa Biblia. Kui bakó nga Jeobá male síkuinda xtile kʼoa nga ñaki kixi tjín kjoatéxoma xi tsjoá (Salmo 19:7-11). Tobʼelañá, je chjota xi njín xinyále sakʼoaa kjaʼaí chʼin bakinle, tonga je kjoatéxoma xi bʼéchjoa je njín basenkaoná nga tsín kʼoamaa (Hechos 15:20). Nʼio nkjín chjinexki xi kʼoatso nga ngisa nda nga tsín njín xinyále je chjota kʼianga tiya. Ñá xi chjotale Cristo maa kui bakóyaná jebi nga nʼio tjínle kjoatsjoacha je Jeobá kʼoa nga nʼio chjine (tʼexkiai Isaías 55:9; * Juan 14:21, 23).

14, 15. 1) Jñá kʼanile kjoatéxoma xi kitsjoa Jeobá nichxin kjoatse xi kʼoasʼin bakó nga tsjoake naxinandále. 2) Jósʼin si̱tjosoán kjoatéxoma jebi nga koa̱nná si̱kuindaa yaoná.

¹⁴ Je kjoatéxoma xi kitsjoale Jeobá je naxinandá Israel kui bakó nga nʼio mandosinle nga nda koatio choʼndale. Tobʼelañá, kʼoasʼin tsakʼénele nga katabʼényʼoándai ya sonndʼiale ánni nga tsín kjoaxkón so̱kosínile, nga̱ nʼio kisichjén sonndʼiale (Deuteronomio 22:8; 1 Samuel 9:25, 26; Nehemías 8:16; Hechos 10:9). Kʼoati kitsjoale kjoatéxoma nga tsín sikatíondaí je nra̱ja̱ xi tsʼen (Éxodo 21:28, 29). ʼYani xi tsín kisitjoson kui tsakakó nga tsín bexkón je kjoabijnachonle xi ngikʼa, kʼoa koan je kiskanele jée kʼiatsa tjín xi kʼien.

¹⁵ Kʼoa ñá, jósʼin nitjosoán ndʼaibi kjoafaʼaitsjen jebi. Tobʼelañá, nisinlee tsa karro tjínná, alikui toxkia nixákoaa, nisinlee jochon je niʼyaná, jochon jñani nixá, nikuindañá josʼín je cho̱ntje xi tjínná kʼoa josʼin bʼetsaojiaan. Tjín naxinandá jñani nʼio nkjín xti biya xi totʼatsʼe nga tsín konxkónle yaole. Je xti xi bechjí kjoabijnachonle kʼoa mele nga tosi tonda sʼe̱le kjoatsjoachale Niná alikui xkón síkatío kjoabijnachonle xi totʼatsʼe kjoasʼetsaojin. Ali tsa  tsojin: “Jmé sí xi koa̱nná”. Kʼoa nga male síkuinda yaole ngisa nda batio (Eclesiastés 11:9, 10).

16. Jótso je kjoafaʼaitsjen xi faʼaitʼa ya Biblia kʼianga tsín kixi tíjna nga sʼetsaojenchjiʼndé je ʼndílee (kʼoati chótsenlai ya nota).

¹⁶ Je Niná nʼio bechjí je kjoabijnachonle chjota, ninga tsʼe jngo ʼndílee xi sʼa kjimajcháya tsʼoa̱ na̱le. Je Kjoatéxoma xi kitsjoa ngasʼa kʼoakitso jotjínnele koa̱ntʼain jngo chjota tsa je sikiʼaon jngo chjoón xi ʼndíyʼa. Kʼiatsa je chjoón kuiyá kʼoa tsa je ʼndíle kuiyá, nikʼienngajaoni chjota xokasʼín * (tʼexkiai Éxodo 21:22, 23). * Tikjaʼaitsjenlai jókji aon male Jeobá nga kʼoasʼin miyón ʼndílee sʼetsaojenchjiʼndé nga xki̱ nó xi totʼatsʼe nga to yaole fini je chjota kʼoa nga to yaole sískákao.

17. Jósʼin koa̱n kʼoéjngoaa kon tsa jngo chjoón xi ʼndíle kisikʼatjenjenchjiʼndé kʼianga kjesa bejin jokjoantjínni énle Niná.

¹⁷ Kʼiatsa jngola chjoón xi ʼndíle kisikʼatjenjenchjiʼndé kʼianga kje bejin jokjoantjínni énle Niná, a koaan kʼoasʼin sikjaʼaitsjen nga tsín tisichatʼanile Niná. Majain. Nga̱ je chjota xi ñaki kʼoamanile jéele síchatʼale Jeobá xi totʼatsʼe njínle Jesús (Salmo 103:8-14; Efesios 1:7). Je Jesús saʼnda i kitso: “Likui jaʼai nchjale xi tjínle kjoakixi, tojé chjota xi jée tjínle nga sikʼantjaiya kjoafaʼaitsjenle” (Lucas 5:32).

18. Jótso Biblia, jméni xosíkao chjota nga kʼoasikji njín tjíobʼéjtenni.

¹⁸ Je Jeobá ali tsa tokuijin xi mele nga tsín xíngiaa si̱kiʼoaan.  Kui xi mele nga ñaki chja̱ʼaxian jinni̱ma̱ná je kjoajticha, nga̱ kui xotjíosíkao chjota nga kʼoasikji njín tjíobʼéjtenni. Je pastro Juan i kitso: “Toʼyanibe xi chʼaoke ndsʼe̱, je joni tsa xi kʼen síkʼen” (1 Juan 3:15). Je xi  tínchja̱ni én jebi ali tsakuijin tsa totsín sasénná jngo chjota, kʼiaa tsa ñaki mená nga katabiya. Kʼiatsa kʼoasikji jtichaa jngo xíngiaa tsakui nichxin saʼnda kuitso tokoán nga kui kjoáne jngo jée xi nʼio chʼaotjín xi tsínle kjoanichatʼa ngixko̱n Niná (Levítico 19:16; Deuteronomio 19:18-21; Mateo 5:22, TNM). Kuinga nʼio machjénsíni nga chja̱ʼaxian jinni̱ma̱ná tojme kjoajticha xi tjínná kao xíngiaa (Santiago 1:14, 15; 4:1-3).

19. Jmé xi tsoyaná Biblia kʼianga kʼoatso nga je Jeobá jtike toʼyani xi kjoatsʼen tsjoake kʼoa nga tjínle kjoanyʼán.

¹⁹ Tsa kʼoati kji chjí ʼyaa je kjoabijnachon jokji chjí be je Niná kʼoa tsa mená nga tosi tonda sʼe̱ná kjoatsjoachale tjínnele nga chja̱ʼaxinlee yaoná je kjoatsʼen. Ya Salmo 11:5 kʼoatso kʼianga Jeobá “jtike toʼyani xi kjoatsʼen tsjoake”. Én jebi kui tsoyaná josʼin be Niná je kjoatsʼen kʼoa nga likui koa̱n kui kjoasʼetsaojin xi kjoatsʼen tjenkao chjoéjiaan kʼiatsa tsjoachaa je Niná. Kʼoa kʼianga kʼoatso je Biblia nga kjoanyʼán tjínle je Jeobá kui bakóyaná nga machjén nga kui kuinyaa jkoaa kao jinni̱ma̱ná je kjoafaʼaitsjen xi naskátjín, xi tjínle kjoanda kao xi tjínle kjoanʼosjenda ánni nga nyʼán kuiyokaosíñá xíngiaa (tʼexkiai Filipenses 4:8, 9).

20-22. Jónʼia ñá xi chjotale Cristo maa xi tʼatsʼe kjoa polítika, kjoajchán kʼoa kao relijión ndiso, kʼoa ánni.

²⁰ Ngixko̱n Niná, nʼio tse njín tjíobʼéjten je chjota xi kjinentsja Na̱i. Tobʼelañá, je chjotaxá sonʼnde, xi jo cho̱toán kjoan nga bʼaxki̱ ya Biblia, nʼio nkjín miyón chjota tjíosíkʼien, kʼoa saʼnda tjíosíkʼien je choʼndale Jeobá (Daniel 8:3, 4, 20-22; Apocalipsis 13:1, 2, 7, 8). Je negosioyʼai xi tjín sonʼnde kʼoa kao chjotachjine sonʼnde yaa tjíobinyakao je chjotaxá sonʼnde nga tjíosínda je ki̱cha̱ xi chjota síkʼien, kʼoa nga kʼoatjíosʼín síxkónkji kjimanyiná. Tojo  tso ya Biblia “i̱ ngakijnda sonʼndebi tíjnakao na̱i” (1 Juan 5:19).

²¹ Tonga ñá xi chjotatjenngile Cristo maa tsje tiyoaa ngixko̱n Niná tʼatsʼe njín xi tíxijten. Alikui ya nojiaan yaoná je kjoa polítika kʼoa kao kjoajchán xi tjín sonʼnde, nga̱ je Biblia itsoná: “Jon likui i̱ [sonʼnde] tsaon” (Juan 15:19; 17:16). * Xi ijngosani, kʼianga chjota fitjenngikená alikui nijndañá nga̱ jé Cristo chjenngilee. Tosa bakolee kjoatsjoacha je xi kontra tjíoná kʼoa saʼnda bʼetsʼoantjaiñá (Mateo 5:44; Romanos 12:17-21).

²² Kʼoati nitséjinla je bʼainganʼiolee “Babilonia xi [nʼio] je”, xi tsonile, ngatsʼi relijión ndiso xi tjín jngo tjíjtsa Sonʼnde. Jé xi ngisasa nʼio tse njín tjíobʼéjten kʼoa Biblia kʼoatso nga ya “koansjai je njínle chjota xi kinchja̱ya tʼatsʼe Niná kao xi tsʼe chjotale Cristo, kao xi tsʼe ngatsʼi xi kʼoasʼin jekʼen i̱ sonʼndebi”. Kuinga tongini bájinkonná Niná nga kuitjokajinlee (Apocalipsis 17:6; 18:2, 4, 24).

23. Jmésani xi sʼiaan kʼianga jekabitjokajinlee je Babilonia xi nʼio je.

 ²³ Kʼianga jekabitjokajiaan ya Babilonia xi nʼioje ali tsa toyajin tjen tíjna nga tjóxin jaʼaínná ya relijión xi kabitjojiaan. Kʼoati tjínnele nga chʼaosʼin jchatokoán jmeni xi tjíosʼín je relijión ndiso, nga kʼoasʼin tjíotsjoáʼnde kʼoa tjíokaníbason je xi chʼaotjín, jolani je kjoachajngi, nga kjoa polítika fisʼenjin kʼoa nga nʼio xkaile tao̱n (tʼexkiai Salmo 97:10; * Apocalipsis 18:7, 9, 11-17). Nʼio tse njín tíxijten xi totʼatsʼe jebi.

24, 25. 1) Jmé xi tísíchjén Jeobá ndʼaibi nga tíbakóle kjoamatokon ʼyani xi kʼoakjimanile jéele nga ya kitsjoanganʼiole tsakai xi njín tjíobʼéjten. 2) Nga kʼoasʼin tísíkuindaná Jeobá ndʼaibi, jmé xi síkjaʼaitsjenjinná.

²⁴ Kʼianga kjesa bʼaitʼajinlee yaoná je Niná kʼoa kjesa mangínsʼenngindájián, kʼoati ya tsakʼainganʼiolee je chjotasonʼnde xi je Na̱i kjinentsja. Kʼoati ya kichʼakoaa jéele tsakai nga njín tjíobʼéjten. Tonga kinikʼantjaiyañá yaoná, koankjainná tʼatsʼe kjoabʼechjíntjai xi kitsjoa Cristo kʼoa tsakʼaitʼalee yaoná je Niná. Kʼianga kʼoakinʼia, tísʼená kjoandale Niná kʼoa tísíkuindaná nga tosi tonda nda kuiyoaa ngixko̱n (Hechos 3:19). Nga kʼoasʼin tísíkuindaná Jeobá ndʼaibi, kui síkjaʼaitsjenjinná je naxinandá xi tsen kisatio ya Israel jñani koan kitoka je chjota xi tokjoataon xi koanle nga kʼien kisikʼien (Números 35:11-15; Deuteronomio 21:1-9).

²⁵ Kʼianga jngo chjota xi tokjoataon xi koanle nga kʼien kisikʼien fichó ya naxinandá jebi, sʼendajin kjoale kʼoa tjínnele ya bʼejna saʼnda nga biya je xi naʼmitítjon ma, xijema ma fikʼejna tojñani mele. Kʼianga kʼoasʼin tsakʼéndajin Niná kui tsakakó nga nʼio tjínle kjoamatokon kʼoa nga nʼio bechjí kjoabijnachonle chjota. Kʼoa jme xi tjínndajinle ndʼaibi nga tísíkuindaná yaa mangóson naxinandá  jebi. Ninga kjoabiyani bakinná tsakai kʼianga tsín tsaʼyaxkoán je njín kao kjoabijnachon, je Jeobá tísíchatʼaná nga̱ kui tísíchjén kjoabʼechjíntjaile Cristo. Jósʼin kʼoailee kjoanda nga kʼoatísʼín. Kʼianí nga kʼoakʼuínlee je chjota nga i̱ katafaʼaikatiojinná jñani tísíkuindaná Niná. Nʼio maxátíyale jebi, nga̱ jenʼio machrianle je kjoañʼai xi nʼio tse (Mateo 24:21; 2 Corintios 6:1, 2).

26-28. Jósʼin mangósoán je Ezequiel ñá xi choʼndale Niná maa kʼoa jósʼiaan nga tosi tonda katasʼená kjoatsjoachale Niná.

²⁶ Ñá xi choʼndale Niná maa kʼoati ya mangósoán je Ezequiel, profetale Jeobá xi tsakʼejna nichxin kjoatse. Je Jeobá kʼoasʼin tsakánele nga koaikájinkon je naxinandá Israel kʼoa i kitsole: “Je én xi kuinóʼyai xi kuitjoni ndsoʼba kui xi kʼuínkjajinkuin”. Kʼiatsa tsínlani kisitjoson jejin koanjéentjaile njín xi kixijten kʼianga kisijéle kuenta Niná je naxinandá Jerusalén (Ezequiel 33:7-9). Tonga je Ezequiel kisitjoson je xá xi kisʼenele kʼoa likui je kiskanele je njínle chjota xi kʼien.

²⁷ Jeme ni̱kjeson je chjota xi je Na̱i kjinentsja. Ñá xi testigole Jeobá maa jngo kjoanda tíbʼainá nga kʼoasʼin mangínkjajinkoaan je chjota tʼatsʼe “nichxin nga sijnda je Nináná” kʼoa nga ʼmiyasoán tʼatsʼe “kjoatéxomale ngʼajmi” (Isaías 61:2; Mateo 24:14). A ñaki nda tinitjosoán xá jebi, machjénní nga kʼoasʼiaan. Je pastro Pablo kʼoakisʼin, kʼoa kuinga koan i̱ kitsosíni: “[Likui] an bʼakaona xi tʼatsʼe njínno. Likui koankaina nga kʼoasʼin kinchjayajinno ngayije jo tso Niná” (Hechos 20:26, 27). Chjénngilee pastro Pablo.

²⁸ Kʼianga tosi tonda sʼe̱ná je kjoatsjoachale Niná ali tsa tokuijin xi machjén nga kʼoati kji chjí jchaa je kjoabijnachon kao je njín jokji chjí bekon Niná. Tojosʼin jchaa kjoaʼmiya xi fisani, machjénní nga tosi tonda tsje kuiyoaa ngixko̱n.