Ya 1 Corintios 6:1-8, je pastro Pablo kui kinchja̱ni tʼatsʼe kjoa xi kisʼele je chjotale Cristo xi ya Corinto tsʼe. Jti koanle nga kʼoasʼin ngixko̱n kjoatéxomale chjota “xi tsín kixi tjíoma” kikao kʼa xínkjín (bersíkulo 1). Xijekoan, kʼoakitsole nga je kjoa xi tjínle ya katasʼendajin ya jinjtín kʼoa mai nga ya koaikao xínkjín ngixko̱n kjoatéxoma. Kataʼyala ánni nga kʼoakitsosíni. Kʼoa xijekoa̱n, kui si̱kʼaxki̱ kʼaa je kjoa jñani nga tsín bakinle kjoafaʼaitsjen xi kitsjoa.

Kʼianga kjoa sʼená kao xíngiaa xi totʼatsʼe negosio, alikui koa̱n to kjoafaʼaitsjenná si̱chjén nga kʼoéndajiaan, kʼoasʼin kʼoéndajiaan josʼin mele Jeobá (Proverbios 14:12). Tojo kitso Jesús, ngisa nda nga kjitʼanangi kʼoéndajiaan ánni nga tsín koa̱ntsesíni (Mateo 5:23-26). Tonga tjínkʼa xi nʼio batio kʼoa saʼnda ngixko̱n chjotaxá fikao xínkjín. Tonga je Pablo i kitso: “Ñaki tinichaño nga kʼoasʼin chobaʼao xíngio ngixko̱n kjoatéxoma”. Ánni kʼoakitsosíni. Tsakui nichxin chʼaosʼin kʼoaxki̱ je jaʼaínle Jeobá kʼoa kao je jtín jñani mangián. Kʼianga tsín kʼoakatama, tosa kui si̱chjén kjoafaʼaitsjen xi kitsjoasa kʼianga kitso: “Ánni nga tsín tosa bʼaiʼndesíño nga chʼao nikaono” (bersíkulo 7, TNM).

Je Pablo kʼoati kitso nga tjío je ndsʼee xi je Niná síkinyánda ya jinjtínná, xi tjínle kjoachjine kʼianga kʼoasʼin nda kotʼaya Énle Niná. Jéní xi chjotajchínga sʼin tjío kʼoa jéní xi koa̱n “kʼoendajinle ndsʼee” je kjoa xi sakʼoa sʼe (bersíkulo 3-5) Je Jesús jan koya kisikʼaxki̱ jmeni xi koa̱n sʼiaan kʼiatsa jngo kjoa xi nʼio ñʼai tjín sʼená kao jngo xíngiaa, jolani tsa énndisola koanená kʼoa tsa kʼoanachaná. Xi títjon, kuinga toñá nga joá kʼoéndajiaan je kjoaná. Xi majaoni, kʼiatsa tsín kasʼendajinná nga toñá nga joá, jema nichjén tsa jngo kʼoa tsa jao testigo. Xi majanni, kʼiatsa tojo tsín tísʼendajinná, jema kʼoaʼmilee je xi chjotajchínga sʼin tjío ya jinjtínná (Mateo 18:15-17).

 Je xi chjotajchínga sʼin tjío ali tsa ʼyajin xi sitoánntjai kʼoa nijejinla kuitsoyandale je ndsʼee xi kjoa tjínle josikao je negosiole. Kʼoati likui je bʼakaole nga jngo xo̱n kʼoenda jñani kʼoetʼa jmeni xi sʼin nga jngó jngó. Je xi sʼin kuiní nga kuinyakao je ndsʼee nga sichjén je kjoafaʼaitsjen xi faʼaitʼa Biblia josʼin kʼoendajin kjoale. Kʼiatsa nʼio ñʼai tjín kjoa jebi kʼoati koa̱n je sijéle kjoafaʼaitsjen je superintendente xi tsʼe circuito kʼoa tsa maije̱ ya sucursal xi tsʼe testigole Jeobá. Tonga kuila si̱kʼaxki̱ kʼaa je kjoa jñani nga tsín bakinle kjoafaʼaitsjen xi kitsjoa pastro Pablo.

Sakʼoa machjén nga jngo xo̱n chjomitjeen ngixko̱n chjotaxá kʼoa likui chʼaotjín. Tsakui nichxin toxá kʼoatjínni kjoatéxoma kʼoa tsakuije̱ nga nda katasʼendajin jngo kjoa. Tobʼelañá, kʼianga tsjion xínkjín chjota kʼoa nga sʼendajin ʼyáni xi koatiokao ʼndíxtile, nga katatsjoá je xi nʼai ma je tao̱n xi koa̱nchjénle ʼndíxtile. Nga katabʼaile jotjín bʼakaole kʼiatsa kasʼechjoa jñani síxá, nga ʼyale ʼyáni xi kinikatíole tsojmile jngo ʼndíkʼien kʼoa tsakuije̱ nga katabʼaile je tao̱n xi koa̱nchjénle kʼiatsa tjín xi kamale, tonga tokʼianí tsa seguro tjínle xi je tíbʼéchjíntjai. Xi ijngosani, je ndsʼee kʼoati koa̱n koaikjomitje̱n jngo xo̱n tsa ʼya xi tífajétʼain ánni nga koa̱n sikuindasíni yaole. *

Je chjotale Cristo xi ya fikao xínkjín ngixko̱n kjoatéxoma kʼianga kui kjoa jebi sʼele ali tsa tífaʼatonejin jmeni xi kitso je pastro Pablo, nga tonga tsínkjoanni kao kjoatsʼenle kʼoatísʼínni. * Alikui si̱chajiaan nga kui xi ngisa títjon tíjna nga chʼa̱sjetsjee jaʼaínle Jeobá kʼoa nga nyʼán sʼin kuiyoaa ya jinjtínná kʼoa nga jtín sʼin kuiyoaa. Je xi ngisa bakoá ñá xi chjotale Cristo maa kui kjoatsjoacha xi tjínná kao xíngiaa kʼoa likui to yaoná mangínñá (1 Corintios 13:4, 5; Juan 13:34, 35).