Tsínsa jmeni xi kʼoasikji aon maná jomaná kʼianga jngo xíngiaa kʼoa tsa jngo miyoná kabichonsjejin i̱ naxinandále Niná kʼianga tsín kʼoakamanile jéele. Kʼoa jonʼia kʼianga kui kjoa tiyojiaan yaa bakoñá jokji tsjoachaa Niná kʼoa jokji kixi mangíntʼalee. * Chótʼayala kʼaa jmeni xi sakʼoa ma.

Jósʼin jchatokoán jngo xi jekabichonsjejin. “Tsín tsa mangíntʼalao tsa jngo xi ndsʼee chobao, xi kʼoasʼin chajngi, axo xi xinkon, axo xi xkóson bexkón, axo xi nchja̱ʼaon, axo xi chjotachʼi̱, axo xi ché, kao je xi kʼoakjoan nibichikaojion.” (1 Corintios 5:11.) Xi ijngosani, je Biblia itsoná: “Toʼyani [...] xi likui bʼéyojinkon [xi tsonile, xi toxá síchajinni] kjoafaʼaitsjenle Cristo [...], ali bʼaiʼndejinlao ya niʼyano, niʼmijinlao: Nda kafaʼai. Je xi tsole: Nda kafaʼai, bʼakaotʼale xále xi tsín nda” (2 Juan 9-11). Je rebista La Atalaya xi tsʼe 15 de noviembre de 1981, pájina 19, itso: “Ninga to ʼndali kʼuínlee jngo chjota, kʼoasʼin fitsʼiani nga chjakaonajmiá kʼoa tsakui nichxin saʼnda koa̱nmiyoaa. A mená nga kʼoasʼiaan kao jngo chjota xi jekabichonsjejin”. Kuinga machjénsíni nga tsín tijé si̱miyoñá kʼoa nga tsín titʼatsʼe Niná cho̱bañá kao je.

A nʼiokjoan machjén nga tsín tijé si̱miyoñá. Jaon, kʼoa nkjín koya tjínni anni. Xi títjon, kuinga kixi mangíntʼalee Niná kʼoa kao jotso Énle. Kʼoa nga kʼoasʼin nʼio tsjoachaa je Jeobá mená si̱tjosonntsjailee ninga sakʼoa nʼio ñʼai koa̱nná. ʼYañá nga kixi tíjna jme xi sʼín Jeobá kʼoa nga kjoatsjoachale tjenkao, kʼoa nga kjoanda tsaanñá tsa si̱tjosoán kjoatéxomale (Isaías 48:17; 1 Juan 5:3). Xi majaoni, kuinga kʼoati koa̱nle sikitsónná je xi kabichonsjejin. Kʼianga tsín tijé nimiyoñá nikuindañá yaoná tʼatsʼe xi jndí tíjna kʼoa josʼin tiyoaa ngixko̱n Niná, kʼoa nga kʼoanʼia tsje bʼejna naxinandále Niná kʼoa likui chʼaosʼin bʼaxki̱ (1 Corintios 5:6, 7). Xi majanni,  tsʼeni kjoanda je xi jée kabajngi. Kʼiatsa si̱tjosoán je kjoatéxomale Niná kʼoa kʼoainganʼiolee josʼin tsakʼéndajin je comité judicial, tochale sikjaʼaitsjenjin kʼoa sitjoson jokitsole je chjotajchínga xi tsakʼéndajin kjoale. Kʼiatsa kʼoasʼiaan tochale koa̱nʼindajin je ni̱ma̱le kʼoa sikʼantjaiyani kjoafaʼaitsjenle. Kʼianga skoe̱ nga jekoankjinle chjota xi tsjoake, tsakui nichxin koa̱nndayani kjoafaʼaitsjenle kʼoa skoe̱ni nga nʼio ai tíjna jée xi tsakajngi kʼoa sichriantʼa ijngokʼanile Jeobá (Lucas 15:17).

Kʼoa jósʼiaan tsa xíngiaa mani xi kabichonsjejin. Jmeni xi sʼiaan yaa koakoñá tsa kixi mangíntʼalee Jeobá kʼoa tsa mai. Kʼianga kui kjoa jetiyojiaan, jósʼin jchatokoán xíngiaa xi jekabichonsjejin. Ninga tsín i̱ kʼoakuixónyejee jmeni xi ma, tonga jaola koya cho̱bayañá.

Tjínkʼa chjota xi jekabichonsjejin xi tojngo niʼya mani kao xínkjín. Kʼianga jngo xíngiaa kabichonsjejin ali tsakuijin xi tsonile tsa tsín tixíngiaa mani kʼoa tsa tsín jme xi tikoa̱n sʼinni ya yaniʼya. Tonga nga kixi mangíntʼalee Jeobá, alikui koa̱n tikʼoasi̱kaoñá xíngiaa jebi jonikoaa nga sʼa nda tíjna ngixko̱n Jeobá, nga̱ jekabʼasjetʼaxin yaole. Tsakui nichxin kʼoaiʼndelee nga ya kʼoéjnabasen kʼianga chotʼayajtían Énle Niná ya niʼyaná tonga likui koa̱n nga je kuinchja̱. Kʼoa tsa kje kasonjin nóle koaan kuitsoyale Biblia je xijchále nga̱ tojo je kjinele nga kuitsoyale kʼoa koatekjáyale (Proverbios 6:20-22; 29:17). *

Kʼoa jósʼiaan tsa tʼaxin tíjna je xíngiaa xi kabichonsjejin. Likui koa̱n nga je nanda si̱sinlee, tokʼiakjoán tsa nʼio machjén. Alikui totjín totjen jme xi sʼiaan tojoni nga jé kuinókjoalee. Kuinga kixi mangíntʼalee je Jeobá kʼoa kao naxinandále nga kʼoasʼin nitjosonñá jotso kjoatéxomale tʼatsʼe kjoa jebi. Kui xi mená nga nda kʼoéjna ijngokʼani xíngiaa, kʼoa kʼianga  kixi binyaa tsakuini nichxin koasenkao josʼin jetsakichakjáyale (Hebreos 12:11). *