Nichxin kʼianga bixankao xínkjín jngo chjoón jngo xʼin kʼoatsole xínkjín nga tondiaa koatiokao xínkjín. Kʼoa je Jeobá kui xi mele nga kuitjoson én jebi. Kʼianga kisikixan je Adán kao Eva, kitso Niná: “Je xʼin [...] jé chjoónle kʼoéjnakao kʼoa tojngo yao koa̱nni”. Je Jesucristo kʼoati kisichjén én jebi kʼoa saʼnda i kitso: “Je xi Niná tsakʼékjao, ali bʼasjexinjin chjota” (Génesis 2:24; Mateo 19:3-6). Tojo tso testo xokjoan, je Jeobá kʼoa kao Jesucristo kui xi mele nga tondiaa koatiokao xínkjín xi jekabixan. Kʼoa tokʼianí tsa jngo xi kuiyá nga bixoya kjoabixan jebi (1 Corintios 7:39). Mani nga xkón tíjna je kjoabixan alikui koa̱n kʼoasʼin si̱kjaʼaitsjeen tsa koa̱n sasa si̱kixoyañá. Je Jeobá nitsejinla sasénle nga tokjoatjao tsjion xínkjín chjota nga bʼéjnda xo̱n kjoabixanle, tsa tsínkui kjoa kasʼe je xi síkʼaxki̱ Biblia (Malaquías 2:15, 16).

 Jótso Biblia, kʼiáni nga koa̱n xíjnda je xo̱n kjoabixan. Je Jeobá kʼoatso nga nʼio jtike je kjoachajngi (Génesis 39:9; 2 Samuel 11:26, 27; Salmo 51:4). Kʼoa kuinga tsjoáʼndesíni nga xijnda je xo̱n kjoabixan kʼiatsa ʼyani xi kjoachajngi kasʼín. (Ya kjoaʼmiya 9, párrafo 7, bakóya jméni xi kjoachajngi ʼmi.) Je xi tiʼndele ngixko̱n Niná nga koasenjnda kʼoa tsa mai je xo̱n kjoabixanle jéní xíngiaa xi kasíchajngi je chjoónle kʼoa tsa xʼinle (Mateo 19:9). Kʼiatsa kʼoejnda xo̱n kjoabixanle alijme xi chʼao tísʼín ngixko̱n Jeobá. Tonga alikui koa̱n nga je ndsʼee xi tjío ya jinjtínná kʼoakuitsole nga katabasénjnda xo̱n kjoabixanle. Je xíngiaa xokamatʼain nkjín koya xi kuenta sʼin kʼoa tsakui nichxin tosa sichatʼanile xínkjín, ngisa tsa aon ma kjoaixinile je xokasʼín. Tojosísʼin tiʼyaa, je xi kuitsoni tsa xíjnda xo̱n kjoabixanle kʼoa tsa mai jé xíngiaa xokamatʼain, kʼoa jé jeyʼa yaole tojmeni xi koa̱n nga koa̱nskanni (Gálatas 6:5).

Tonga sakʼoaa nʼio ai tjín je kjoa xi sʼele xi jechixan. Kʼianga kʼoama tjínkʼa xi basentʼaxinle je xʼinle kʼoa tsa chjoónle kʼoa tsa maije̱ saʼnda bʼéjnda xo̱n kjoabixanle ninga tsín kjoachajngi kasʼe. Je Biblia kʼoatso nga je xi “koase̱ntʼaxin, kʼoasʼin katʼejna nga tsín tsa kuixan, axo katafáondani” (1 Corintios 7:11). Tojosí tso én jebi, je xíngiaa xi kui kjoa tjínle alikui tiʼndele nga kjaʼaí chjota kuixankao (Mateo 5:32). Kataʼyala kʼaa je kjoa xi sʼele je xíngiaa xi jechixan xi sakʼoa binyatʼaxinnile xínkjín.

Xi kaile bajngiʼa yaniʼyale. Tjín xʼin xi tsín bajngiʼa yaniʼyale, kʼoa ali tsakuijin kʼoasʼínni tsa tsín koa̱nle tokui nga kaile. Kʼoa nga kʼoasʼín tse kjoañʼai faʼá je ʼndíxtile kʼoa kao chjoónle. Jótsole Biblia ʼyani xi kʼoasʼín: “Tsa jngo xi tsín tsa síkuinda [...] xi tsʼe niʼyale, totsakʼejnaʼmakao kjoa xi koankjainle. Tongisa chʼao síkʼéjna yaole kaoni xi tsín tsa makjainle” (1 Timoteo 5:8). Kʼiatsa jngo xʼin xi tsín síkʼantjaiya yaole, jé chjoón xi kuitsoni tsa jngo xo̱n skómitjen ngixko̱n chjotaxá nga xin kʼoéjnale xʼinle kʼiatsa bele kon nga kui jebi xi nda koationi ʼndíxtile kʼoa kao je. Kʼiatsa jngolani ndsʼee xi kui  kjoa tísʼene machjénní nga ndakjoan koasjaiya kjoa jebi je xi chjotajchínga sʼin tjío ya jinjtín. Nga̱ je xi kʼoasʼín saʼnda ma bichonsjejin naxinandále Niná.

Kʼiatsa nʼio totaon tíʼya. Tjínkʼa chjota xi nʼio tsʼen ma ya niʼyale kʼoa xi saʼnda xkón síkʼéjna kjoabijnachonle chjoónle kʼoa tsa tsʼe xʼinle. Kʼiatsa jngo ndsʼee kʼoa tsa jngo tichjaa xi kʼoatísʼín, jé xi chjotajchínga sʼin tjío koasjaiya kjoa jebi, nga̱ ʼyani xi nʼio síjtile yaole kʼoa ʼyani xi nʼio tsʼen saʼnda ma bichonsjejin naxinandále Niná (Gálatas 5:19-21).

Tsa ñaki tsín tjoʼndele nga Niná sítjosonle. Tjín chjota xi ñaki bʼéchjoale je chjoónle kʼoa tsa xʼinle nga Jeobá katasíxále kʼoa sakʼoaa saʼnda bʼénele nga katafaʼatone jotso Biblia. Je xíngiaa xi kui kjoa tíjnajin kʼoa mele sitjoson jotso ya Hechos 5:29, jñani kʼoatso nga “ngisa machjén nga nikjitjosonlee Niná kaoni tsa chjotasonʼnde”, jé xi kuitsoni tsa machjén nga jngo xo̱n skómitjen ngixko̱n chjotaxá nga xin kʼoéjnale xʼinle kʼoa tsa chjoónle ánni nga koa̱n sixásínile Jeobá.

Kʼiatsa jngo xíngiaa xi nʼio ai tjín je kjoa xi tíjnajin, joni je kjoa xi jesí kanikʼaxkiaa, alikui koa̱n ʼya xi kjoanʼio kʼoenele nga tosi tonda katabʼejnakao je xʼinle kʼoa tsa chjoónle. Kʼoa kʼoati tsín koa̱n kjoanʼio sʼe̱nele nga katabasenxinle. Je ndsʼee xi chjotajchínga sʼin tjío kʼoa kao ndsʼee kao tichjaa xi jetjínle kjoafaʼaitsjen koaan tsjoánganʼiole kʼoa koaan tsjoále kjoafaʼaitsjen xi faʼaitʼa Biblia. Tonga ndsʼee jebi kui kuenta sʼin kʼianga tojéní Jeobá xi be jokjoantjínni kjoa xi tjíojin xi jechixan. Kʼiatsa ʼyani xi tokʼoetʼason jmeni xi kuitso, tojoni nga koase̱ntʼaxinle xínkjín, alikui tíbexkón kjoabixanle kʼoa kao Niná. Xi ijngosani, je Jeobá bení kʼiatsa toxokʼoani títso, ninga nʼio nda tíbʼéndajin jmeni xi títso kʼoa jmeni xi tísʼín. Je Énle Niná itso: “Ngayije kjoa tjíosontsenní, kʼoa beni xko̱n je xi tjínnená nga kʼoailee kuinda” (Hebreos 4:13). Kʼiatsa nʼio xkón jetíjna jngo xíngiaa alikui koa̱n ʼya xi jokuitsole kʼiatsa koase̱ntʼaxinle je chjoónle kʼoa tsa xʼinle. Ánni. Nga̱ ngatsʼiñá nga “kʼoailee kuinda Niná xi titʼatsʼe yaonáni nga jngójngoá” (Romanos 14:11, 12).