1-3. 1) Jósʼin bekon chjota je xá xi sʼín. 2) Jótso Biblia tʼatsʼe je xá, kʼoa jméni xi ño koya chótʼayá i̱ kjoaʼmiya jebi.

NICHXIN xi tiyoaa ndʼai nʼio nkjín chjota xi tsín tsjoake je xá xi sʼín. Ai male je xále kʼoa likui tofe tomale nichxin. Tonga koaan sikʼantjaiya kjoafaʼaitsjenle. Jméni xi koasenkao nga ñaki kao kjoatsjoa kʼoasʼinni je xále kʼoa nga tsjoa sa̱tíole.

² Je Biblia nʼio nda síkʼaxki̱ je chjota xi nda síxá. Kʼoatso nga kjoanichikontʼainle Niná je xá kʼoa kao kjoanda xi tjenkao. Kʼoa je rey Salomón i kitso xi tʼatsʼe je xá: “Katakjen kʼoa kataʼbi ngatsʼi chjota kʼoa katabʼétsaojin je kjoanda xi tjenkao jokji nʼio tísíxá. Jebi kjoatjaole Ninání” (Eclesiastés 3:13). Je Jeobá kui xi mele nga tsjoa katasʼená nga si̱xá kʼoa nga katasokóná kjoanda xi tjenkao nga nixá. Ánni. Kuinga nʼio tsjoakená kʼoa mele nga nda kuiyoaa. Kʼiatsa kʼoasʼin jchatokoán je xáná josʼin bekon Niná kʼoa tsa koanngíntjenngiaa je kjoafaʼaitsjen xi tsjoáná tosi tonda sʼe̱ná kjoatsjoachale (tʼexkiai Eclesiastés 2:24; * 5:18). *

 ³ Kjoaʼmiya jebi ño koya tjínni je xi chótʼayá. Xi títjon, jósʼiaan ñá xi chjotale Cristo maa nga ñaki tsjoa sʼe̱ná nga si̱xá. Xi majaoni, jmé xáni xi tsín koa̱n kʼoasʼiaan. Xi majanni, jméni xi sʼiaan nga kuitjosonná je xáná kʼoa kao xá xi tsʼe Niná. Xi mañoni, jmé xáni xi ngisa títjon tíjna nga kʼoasʼiaan. Tonga kuila títjon cho̱bayañá tʼatsʼe nga jao chjota xi ngisasa nʼio nda síxá: tʼatsʼe Jeobá kao Jesucristo.

4, 5. Jósʼin bakó ya Biblia kʼianga nʼio síxá je Jeobá.

⁴ Je xi ngisasa nʼio nda síxá jéní Jeobá. Ya Génesis 1:1 itso: “Nga sʼa kitsʼia, Niná kisinda ngʼajmi kao sonʼnde”. Kʼianga jekoanjngole Niná jmeni xi kisinda i̱ Sonʼnde kʼoakitso nga “nʼio nda” ngayeje (Génesis 1:31). Nʼio nda kisʼe kon jme xi kisʼin. Nʼiojin tsjoa koanle nga kʼoasikji nda kisixá nga̱ jéní je “Niná xi tsjoa tjínle” (1 Timoteo 1:11, TNM).

⁵ Je Jeobá nʼio síxá kʼoa alikuikʼia jyó bʼejna. Kʼianga jaʼai i̱ Sonʼnde je Jesús jenkjín siento nó jaʼato nga koanjngole Jeobá jmeni xi kisinda kʼoa Jesús i kitso: “Je Nʼaina síxá saʼnda ndʼaibi” (Juan 5:17). Jmé xá xi tísʼín je Nʼainá xi tíjna ngʼajmi. Nʼio tísíxá nga tísíkuinda je chjota kʼoa nga tíbándiaale. Kʼoa kʼoati jngo jtín mani chjota tíkjoejin xi títsjoále nganʼiotsjele. Chjota jebi yaa koatexomakao Cristo ya ngʼajmi (2 Corintios 5:17). Je Niná alikui jyó tíbʼejna nga̱ mele sitjoson jmeni xi tjínndajinle xi kao chjotasonʼnde, xi tsonile, nga jngo sonʼndenaxó katabatiojin ngantsjai nichxin je chjota xi tsjoake (Romanos 6:23). Kʼoa nʼiojin tsjoa tísʼele je Niná nga miyón mani je chjota xi tjíonrʼoé je énnda xi tʼatsʼe Kjoatéxomale, nga tjíobinyatʼachrianle kʼoa nga tjíosíkʼantjaiya yaole nga tosi tonda tjíosʼele kjoatsjoachale (Juan 6:44).

6, 7. Jmé choa̱ tsakʼéjna Jesús nga nʼio nda kisixá.

 ⁶ Je Jesús kʼoati nʼio nda choa̱ tíbʼéjna saʼnda ngasʼa nga kʼoati nʼio nda síxá. Kʼianga tsakʼénda Jeobá ngayeje xi tjín ya ngʼajmi kao i̱ Sonʼnde jé Jesús kisichjén kʼoa kuinga “choʼnda xi nʼio nda síxá” ʼmisínile Jesús (Proverbios 8:22-31; Colosenses 1:15-17, TNM). Kʼoa nga jaʼai i̱ Sonʼnde kʼoati nʼio nda kisixá. Josaʼnda nga ʼndí kji tsakʼinyale josʼin sʼenda niʼya kʼoa “chjineyá” sʼin tsaʼyale nga jekoanni (Marcos 6:3). * Nʼiojin tse nganʼio kao kjoachjine koanchjénle xá jebi nga̱ tsín tienda jña saténa tsojmi xi síchjén chjineyá, tsín jña manda yáte kʼoa tsín ki̱cha̱ xi lʼí síxákao nga kui nichxin. Tosi̱kjaʼaitsjenla jme xi kisʼin Jesús, jéjin kikásjai je yá xi kisichjén, kʼoa tsakui nichxin jesoa tsakʼétsʼinle kʼoa kiskenʼndójbe jña saʼnda koanchjénle. Jéjin kisikjoannda yáki̱cho̱ kʼoa tijejin tsakáyonile niʼya, tsakinyájchxojin xo̱ntjoa kʼoa kisindajin yá xi machjén. Ñaki tsabejin jokji kjoatsjoa tjenkao nga nda nixá.

⁷ Je Jesús kʼoati nʼio nda kisitjoson jme xá jaʼaini i̱ Sonʼnde. Je xi jan nó basen kitsoyason Énle Niná ñaki tokui xá kisʼin. Koanmele nga sʼe̱jinle ngatsʼi chjota je Énle Niná kʼoa kuinga nda kisichjénsíni nichxinle, tanjio tsakisótjen kʼoa kui xá kisʼin saʼnda nga koannjio (Lucas 21:37, 38; Juan 3:2). Tsakʼamje “ngakijnda naxinandábe kao naxinandáʼndí. Kinchja̱ya, kitsoya je énnda xi tʼatsʼe kjoatéxomale Niná” (Lucas 8:1). Kitjosonle ngakjijnda nga kitsoyason je énnda chjotse kʼoa ndso̱ko tsakʼamjeni ninga síxkón chon chao.

8, 9. Ánni kʼoabixónsíñá nga tsabe Jesús je kjoatsjoa xi tjenkao je xá xi kisʼin.

⁸ A tsabe Jesús je kjoatsjoa xi tjenkao je xá xi kisʼin.  Jaon, nʼio nkjín chjota kitsoyale jokjoantjínni xi tʼatsʼe Kjoatéxomale Niná kʼoa kʼoasʼin tjen kisikatíonda je xi chjotale koan nga koanskanni. Kʼianga kʼoasʼin nʼio kisixále Niná tikui xi kitsjoanganʼionile kʼoa tikui tsakasenkaoni, alikui kini ninga sakʼoa tsakʼejnanchjan (Juan 4:31-38). Kʼianga jekoanjngole jme xá jaʼaini i̱ tʼanangi nʼiojin tsjoa kisʼele. I kitsole je Nʼaile kʼianga tsakʼétsʼoale: “An tsʼasjejeyale i̱ sonʼnde. Jekisijngoa je xá xi ji tsakʼainái” (Juan 17:4).

⁹ Tojosʼin tiʼyaa, je xi ngisasa nʼio nda choa̱ síkatíoná josʼiaan kʼianga tsjoa koaya tokoán je xá xi nʼia jéní Jeobá kao Jesús. Jméni xosíkaoná nga chjennginilee jokjoan je Niná. Kuinga tsjoachaa (Efesios 5:1). Kʼoa kʼoati kuinga tsjoachaa je Cristo nga kʼoanʼiañá jokisʼin (1 Pedro 2:21). Kuila chótʼayá ndʼaibi jmé xi sʼiaan nga ñaki tsjoa sʼe̱ná nga si̱xá.

10, 11. Jósʼiaan kʼianga ñaki tsjoa katasʼená kʼianga nixá.

¹⁰ Kʼoati nʼio machjén nga nda si̱xá xi chjotale Cristo maa. Kʼoa mená nga tsjoa katasʼeya tokoán kʼianga kʼoasʼiaan xáná. Tonga kʼianga tsín tsjoachaa je xá xi tjínná, alikui nda nixáná. Kʼianga kʼoama, jmé xi sʼiaan kʼianga ñaki tsjoa katasʼená kʼianga si̱xá.

¹¹ Si̱kʼantjaiyaa je kjoafaʼaitsjenná. Tsakui nichxin likui koa̱n si̱kʼantjaiyaa je xáná, tonga je xi koa̱n si̱kʼantjaiyaa kui kjoafaʼaitsjenná. Koaan si̱kjaʼaitsjenjiaan josʼin síkjaʼaitsjen Niná tʼatsʼe je xá. Tobʼelañá, tsa familia tjínná xi tibijnyiʼá, je Niná nʼio bechjí nga nda nixá ninga nʼio nangi tíjna maná je xá xi nʼia. Je Énle Niná kʼoatso nga je chjota xi tsín síkuinda xínkjín “tongisa chʼao síkʼéjna yaole kaoni xi tsín tsa makjainle” (1 Timoteo 5:8). Kʼianga machoyaná nga kui xá tinixáñá nga kuitjosonná je xá xi kjinená  ngixko̱n Niná, ngisa bʼenelee yaoná nga nda nixá kʼoa ngisa tsjoa satío tokoán tikʼoajinni je chjota xi ñatjen nixá.

12. Ánni nga nʼio chjísínile nga nda si̱tjosoán xáná kʼoa nga kixi katamaa.

¹² Nda si̱tjosoán xáná kʼoa kixi katamaa. Tjínnele nga nda si̱xá ñá xi ñaki chjotale Cristo maa. Kʼianga chjotanixá maa tse kjoanda tjenkao, yaa nroani nga nʼio bechjíná je xi nainá mani (Proverbios 12:24; 22:29). Kʼoati tse kjoanda sokóná nga ñaki chjotakixi maa ya tʼaxáná, nga tsín jme xi niché kʼoa nga tsín tokʼoasʼin nichaa je nichxin  (Efesios 4:28). Tojosʼin kitsoyaná kjoaʼmiya xi jaʼato, nʼio nkjín chjota xi nixálee xi nʼio sasénle nga kixi maa. Kʼoa ninga tsínlani kuenta sʼin je xi nainá mani nga nda tinixá, je kjoanda xi so̱koná kuinga nda sʼe̱ kjoafaʼaitsjenná kʼoa nga si̱tsjoayalee je Niná xi nʼio tsjoachaa (Hebreos 13:18; Colosenses 3:22-24).

13. Jósʼin bichótsjoá kʼianga nda mangínkoaa yaoná ya tʼaxáná.

¹³ Kuenta sʼiaan nga je Niná bitjojeya kʼianga nda mangínkoaa yaoná. Kʼianga nda mangínkoaa yaoná ya tʼaxáná ndi̱toon be je chjota xi ngikʼa. Kʼoa jósʼin bichótsjoá nga kʼoanʼia. Je chjota bení nga nʼio ndatjín jme xi tsoyaná je Niná xi bʼasjentjainá (Tito 2:9, 10, TNM). Kʼianga nda mangínkoaa yaoná yaa beni je chjota nga nʼio naskátjín je xi chotʼayá. Li tondajin tsa koa̱nkjain kʼale chjota xi ñatjen nixá, ninga tojngo, xi totʼatsʼe nga nda timangínkoaa yaoná. Tonga xi ngisa chjíle kʼoa xi ngisa tsjoa fáya tokoán kuinga tsjoa sʼeya ni̱ma̱le Jeobá kʼoa nga je bitjongʼa (tʼexkiai Proverbios 27:11; * 1 Pedro 2:12).

14-16. Jméni xi jao koya chjónangilee yaoná tʼatsʼe je xá xi mená chjoéjiaan.

¹⁴ Je Biblia alikui jngó jngó xá síkʼaxki̱ jñanile xi koa̱n chjoéjiaan kʼoa jñanile xi mai. A kui xi tsonile nga koa̱n kʼoasʼiaan tojme xáni. Mai. Je Biblia tsjoáná kjoafaʼaitsjen kʼianga kui chjoéjiaan xá xi nda, xi kixi, xi sasénle Niná kʼoa xi tsín chʼaosʼin sikatíoná ngixko̱n (Proverbios 2:6). Jósʼin jchañá tsa tsín sasénle Niná je xá xi mená. Jaola koya kataʼyaa xi machjén nga chjónangilee yaoná.

¹⁵ A kʼoatsokixi je Biblia nga chʼaotjín je xá jebi. Je Énle Niná kʼoatsokixi nga chʼaotjín je kjoaché, je énndiso kʼoa nga xkóson manda (Éxodo 20:4; Hechos 15:29; Efesios 4: 28; Apocalipsis 21:8). Kʼoa kuinga chʼasjengiñá je xá xi kui tjenkao. Tsjoachañá je Jeobá kʼoa kuinga tsínkui chjoéjinñá je xá xi kontra tjíole kjoatéxomale (tʼexkiai 1 Juan 5:3).

¹⁶ A yaa koa̱njngokoa je xi chʼao tjíosʼín axo saʼnda an kʼoetejian chjota je xi chʼaotjín. Tokuila si̱kjaʼaitsjeen tʼatsʼe je xá chjinexjáo. Je xá jebi alijme xi chʼaotjín. Tonga a ndatjín tsa ya si̱xá ya jñani yo̱ngo̱ tísʼenda. Ningalani tsín ya tinojiaan yaoná relijión jebi, xi énndiso bakóya, a tsí  tojo yani tibʼainganʼiolee tsa ya tinixá (Apocalipsis 18:4). Alikui mená nga kui kʼoasʼiaan jmeni xi kontra tíjnale jotso Biblia, nga̱ tsjoachañá je Jeobá.

17. 1) Jméni xi kuenta sʼiaan kʼianga koa̱nná chjoéjiaan jngo xá xi ndatjín (chótsenlai rekuadro xi tso: “ A koaan kjoaʼa̱sʼe̱nle xá jebi”). 2) Jósʼin si̱chjinee je kjoafaʼaitsjenná kʼianga katabasenkaoná nga kui chjoéjiaan xi sasénle Niná.

¹⁷ Kʼianga koa̱nná chjoéjiaan jngo xá xi ndatjín, nʼio koasenkaoná tsa nda chótʼayajiaan jotso párrafo 15 kao 16. Tonga tjínsa jmeni xi kuenta sʼiaan. * Ali tsakuijin xi mená nga je choʼnda xi nʼiotʼakon Niná kʼoakuitsoná josʼiaan nga ñandia ñandia. Jméni xi koasenkaoná kʼianga jchaa josʼiaan nga jngó jngoá. Machjén nga chósonnilee.  Ya kjoaʼmiya 2 kʼoasʼin kitsoyaná nga tjínnele si̱chjinee je kjoafaʼaitsjenná. Jósʼin. Chótʼayá je Biblia kʼoa si̱kjaʼaitsjenjiaan jósʼin si̱chjén. Kʼiatsa kʼoasʼiaan, je kjoafaʼaitsjenná ndi̱toon skoe̱ xi ndatjín kao xi chʼaotjín kʼoa koasenkaoná nga kui chjoéjiaan xi sasénle Niná ánni nga tosi tonda sʼe̱síniná kjoatsjoachale (Hebreos 5:14).

18. Ánni nga sakʼoa ñʼai maniná josʼin nitjosoán je xáná kʼoa nga kʼoati nitjosonkaonilee je Niná.

¹⁸ Mani nga jekui “nichxin xi kjoetʼa” tiyoaa ndʼaibi kʼoa nga ñʼai chon sakʼoaa ñʼai maná josʼin nitjosoán je xáná kʼoa nga kʼoati nitjosonkaonilee je Niná (2 Timoteo 3:1). Ñʼai sokóxáná kʼoa tsa tsín nda si̱xá tsakui nichxin kuichonsjená xáná. Kʼoa ʼyañá nga tjínnená kuijnyíʼaa familianá. Tonga tsa tsín si̱kuindaa yaoná tsakui nichxin koa̱njyoná nga tsesa si̱xá kʼoa tsa maije̱ kʼoati tsojmi nʼio si̱metokoán jotjíosʼín tsa chjotasonʼnde. Tsa kʼoasʼiaan, tochale kjoaʼajen josʼin tinixálee Niná (1 Timoteo 6:9, 10). Kataʼyala jméni xi koasenkaoná nga tsín si̱chajiaan jmeni xi ngisasa títjon tíjna (Filipenses 1:10, TNM).

19. Ánni nga ñaki koa̱n si̱nʼiotʼasíñá yaoná je Jeobá, kʼoa jmé che̱n xi tsín jtsaojiaan tsa ñaki tjínjngo tokoán nga je Jeobá sikuindaná.

¹⁹ Si̱nʼiotʼaa je Jeobá kao ngayeje ni̱ma̱ná (tʼexkiai Proverbios 3:5, 6). * A tsí kjoaixi nga ñaki koa̱n je si̱nʼiotʼaa yaoná Jeobá. Jaon. Je Jeobá tsjoakená kʼoa tísíkuindaná (1 Pedro 5:7). Ngisa nda be jmeni xi chaná kʼoa tsjoántsjainá jmeni xi machjénná (Salmo 37:25). Nda kʼoéjintokoán je Énle Niná jñani i̱ tso: “Ali kjoanyinájin nimetakon. Tʼejngo takon kao xi jetjínno, nga̱ Niná kʼoakitso: Likui xin koatejnale, nitsjionkonjinle” (Hebreos 13:5).  Nʼio nkjín ndsʼee kao tichjaa xi kʼoasʼin síchjén nichxinle nga tokui xále Jeobá kʼoasʼín. Xíngiaa jebi jesoa tjíobe josʼin síchikontʼainná je Niná kʼoa jesoa xotso nga tsín jme xi tjíochale. Kʼiatsa tjínjngo tokoán nga je Jeobá sikuindaná, alikui koa̱n kuinyaxkónlee yaoná tʼatsʼe josʼin kuijnyíʼaa familianá (Mateo 6:25-32). Nitsejinla kʼoaiʼndee  nga je xáná katabatéchjoaná nga mangínkʼinyasoán, nga mangián kjoajtínná kʼoa jmesani xi nʼia xi tʼatsʼe Niná (Mateo 24:14; Hebreos 10:24, 25).

20. Jósʼin tsoyanile nga ñaki nda katama je xkoaan, kʼoa jméni xi koasenkaoná nga kui títjon si̱kʼéjnaa xále Niná.

²⁰ Kui títjon si̱kʼéjnaa xále Niná (tʼexkiai Mateo 6:22, 23). Je Jesús kʼoakitso nga nʼio machjén nga ñaki nda katama je xkoaan. Kui xi kitsonile nga tsínkui kjoásjee jmeni xi tsínkjoanni nʼio machjénná. Je xi ngisa títjon si̱kʼéjnaa ñá xi chjotale Cristo maa kui je xá xi tsʼe Niná. Tsa kʼoasʼiaan alikui kui nʼio si̱metokoán nga tse tao̱n kuinje̱ná kʼoa tsa nkjín tsojmi sʼe̱ná. Kʼoati tsín tokui kjuintjenngiaa tsojmi xi sʼa tjíobʼasje chjota, jolani xi bʼaxki̱ ya telebisión, xi kʼoatso nga kui tjínnele sʼe̱ná ánni nga tsjoa sʼe̱síni tokoán. Jméni xi koasenkaoná nga kui títjon si̱kʼéjnaa xále Niná. Alikui koa̱n nga tokjoatjao tao̱n kjoéntʼeen yaoná. Alikui koa̱n nga kui kʼoéxkoá tsojmi xi tse nichxin fáʼaná. Tojo tso ya Biblia, tokatamaniná “tsa tjínná xi chinee kao najño xi chʼakjá” (1 Timoteo 6:8). Machjénní nga tokatamaniná nga tochoa tsojmi katasʼená.

21. Ánni nga nda si̱kjaʼaitsjensíñá jmeni xi títjon si̱kʼéjnaa, kʼoa jméni xi títjon si̱kʼéjnaa tikʼoajinni tojmeni.

²¹ Kui títjon si̱kʼéjnaa xi tʼatsʼe Niná. Mani nga tsín tse nichxin tjínná machjénní nga nda si̱kjaʼaitsjeen jmeni xi títjon si̱kʼéjnaa. Tsa tsín kʼoasʼiaan tokʼoajinsʼin jcha nichxinná kʼoa tojchajinjin jmeni xi títjon tíjna. Jméni xi títjon tíjna. Je Jesús kʼoakitso nga kui títjon kuijnyísjee “je kjoatéxomale Niná”. Je chjota xi tjín ndʼai kui ngisa fitjenngi nga skuelangʼa skótʼaya kʼoa nga kui sʼe̱le xá xi nʼio nda kuinje̱le (Mateo 6:33). Tonga ñá xi chjotale Cristo maa kui títjon nikʼéjnaa Kjoatéxomale Niná. Jósʼin bakoá nga ngisa chjí ʼyatokoán je Kjoatéxomale Niná kʼoa kao xá xi títsjoáná tikʼoajinni je tsojmi xi tjín sonʼnde. Yaa bakoñá jmeni xi chjoéjiaan, jmeni xi fasjee kʼoa jmeni xi nʼia.

22, 23. 1) Jmé xáni xi ngisa títjon nikʼéjnaa, kʼoa jósʼin bakoá nga kui títjon nikʼéjnaa (chótsenlai rekuadro xi tso: “ Nʼio tse kjoanichikontʼain tísʼena nga kui xá jebi kiskoejian”). 2) Jméni xi tsín kʼoaiʼndee nga kʼoechjoaná je xáná.

²² Ñá xi choʼndale Niná maa ʼyañá nga jenʼio kjimachrianle nga kjoetʼa je nichxin xi tiyoaa ndʼai. Kuinga kui ngisa títjon nikʼéjnasíñá nga ʼmiyasoán tʼatsʼe Kjoatéxomale Niná kʼoa nga binyakoaa chjota nga chjotale Cristo katama (Mateo 24:14; 28:19, 20). Tojo kisʼin Jesucristo kʼoati kui títjon tinikʼéjnaa xá jebi nga̱ kui xi kʼoasjentjai chjota. Jmé xi tjíosʼín je ndsʼee kʼoa kao tichjaa nga kui xá jebi títjon tjíosíkatío. Tjíobʼénele yaole nga nʼio tjíotsoyason. Tjín xi precursor sʼin tjíosíxá kʼoa tjín xi misionero kjima. Kʼoa nʼio nkjín mani je xijchá xi kui kjoafaʼaitsjen tsjoále ʼndíxtile nga nʼio katasíxále Jeobá, jolani nga precursor sʼin katasíxá kʼoa tsa jñasanile xá xi tjín i̱ jinnaxinandále Niná. Nga kʼoasʼin nʼio tiʼmiyasoán ñá xi chjotale Cristo maa, jmé kjoanda xi tísokóná. Nʼio tsjoa tjío tokoán, kʼoa nʼio tse kjoanichikontʼain tísʼená nga kʼoasʼin je Jeobá tinixálee kao ngayeje ni̱ma̱ná kʼoa kao ngayeje nganʼioná (tʼexkiai Proverbios 10:22). *

²³ Nʼio nkjín mani je ndsʼee xi tse nichxin machjénle je xá xi sʼín kʼianga bajngiʼa familiale. Ninga kʼoalani, je Jeobá mele nga ñaki tsjoa katasatío tokoán nga kʼoasʼiaan je xáná. Tsa koanngíntjenngiaa je kjoafaʼaitsjen xi tsjoáná tsjoa sʼe̱ná nga si̱xá. Tonga alikui koa̱n kʼoaiʼndee nga je xáná kʼoechjoaná nga kʼuínyasoán énnda chjotse, nga̱ kui xi ngisa títjon tíjna. Tsakui títjon si̱kʼéjnaa xá xi tsʼe Niná kʼoasʼin koakoñá nga tsjoachaa kʼoa nga mená nga tosi tonda sʼe̱ná kjoatsjoachale.