Je xi kʼoasʼin ntsja sítjosjeyanile yaole alikui ndasʼin bʼejna ngixko̱n Niná, nga̱ je xi kʼoasʼín to yaole fini kʼoa síkitsón kjoafaʼaitsjenle. Xi ijngosani, tsakui nichxin jetongoyale jngo tsojmi xi koa̱n siñakonni yaole sʼin skoe̱kon xi ngikʼa. Je chjota xi kʼoasʼín tsínle kjoatsjoacha, kʼoa tokui fini jmeni xi koa̱nñakon ngotjoni yaole. Chjota jebi alikui masinle yaole, tosa kui mamesale je “kjoachajngi, kjoajndí, kjoachi̱nga̱, kjoa [...] xi chʼao tjío” (Colosenses 3:5).

Je pastro Pablo kitso: “Jon xi tsjoake̱no [...], si̱tsjeyalee yaoná ngayije xi chʼao kjoan xi tsʼe yaoná, kʼoa xi tsʼe espírituná, nga ñaki si̱jngoaa xi koa̱ntsjenía nga xkónchaa Niná” (2 Corintios 7:1). Tjínkʼa xíngiaa xi nʼio ñʼai male nga sítjoson én jebi, tonga likui koa̱n sikinroajen kon nga̱ je Jeobá tíjnanda nga síchatʼaná kʼoa basenkaoná (Salmo 86:5; Lucas 11:9-13). Tsakui nichxin jetikʼoatjíosʼínngáni nga skoe̱, tonga bʼénele yaole nga tsín tikʼoasʼínni kʼoa kʼoamanile kjoafaʼaitsjenle. Alikui koa̱n si̱chajiaan kʼianga “ngisa ngʼa tíjna Niná kaoni tsa ni̱ma̱ná. Je ñaki be ngayije kjoa” (1 Juan 3:20). Je Niná ali tsakui jéená kotsenle, kui kotsenle jotjío ni̱ma̱ná. Mani nga nʼio nda bená Niná mamakená kʼianga nijélee kjoanichatʼa. Kuinga nʼio kʼoétsʼoasínilee tojo sʼín jngo tiʼndí nga síjéle nganʼio je nʼaile. Je Jeobá koaanle sitsje kjoafaʼaitsjenná (Salmo 51:1-12, 17; Isaías 1:18). Tonga ali tsa tokuijin  xi koasenkaoná nga kʼoétsʼoaa, kʼoati machjén nga kʼoasʼiaan jmeni xi kaʼmilee je Niná kʼoa nga tsín tsa pornografía chótsenlee kʼoa tsín toʼya chjota si̱miyoaa. *

Kʼiatsa jngo xi tsín male tsjiontʼa kjoa jebi katafákao nʼaile kʼoa tsa na̱le kʼoa tsa maije̱ jngo ndsʼee kʼoa tsa jngo tichjaa xi tjínle kjoafaʼaitsjen kʼoa mele koasenkao (Proverbios 1:8, 9; 1 Tesalonicenses 5:14; Tito 2:3-5). *