Saludo xi tsʼe bandera. Ñá xi testigole Jeobá maa kʼoabixoán nga jngoyale sʼetsʼoale je bandera kʼianga ma saludar kʼoa nga jndakaonile. Ánni. Kuinga je tjosjengʼa naxinandá kʼoa kao chjotatítjonle kʼianga kʼoaʼmile nga je bʼasjentjai chjota, ʼndele nga Niná chʼa̱sjengʼa (Isaías 43:11; 1 Corintios 10:14; 1 Juan 5:21). Je rey Nabucodonosor, xi tsakatéxoma ya Babilonia nichxin kjoatse, kʼoasʼin kichʼasjengʼa. Rey jebi kui koanmele koakole je chjota xi tíbatéxomale jokji jeya tíjna kʼoa nga nʼio bexkón ninále. Jngo xkóson xi nʼioje kji kisinda kʼoa kʼoasʼin tsakʼénele ngatsʼi je chjota nga xkóle katabinyále kʼianga tínikjanekaonile xkóson jebi. Tonga jan xti hebreo xi tsín kʼoakisʼin ninga kʼoatsakʼinle nga si̱kʼien, jé xi Sadrac, Mesac kʼoa Abednego tsakʼin (Daniel, kapítulo 3).

Kʼoa jósʼin tsoyanile nichxin xi tiyoaa ndʼai nga kʼoasʼin ma saludar je bandera. Jngo libro xi itso: “Je xi ngisa bexkón je chjota kui banderale naxinandále. [...] Je chjota bʼajenle xombele kʼianga faʼa je bandera; tjínkʼa xi kansion kjile nga bʼasjengʼa kʼoa je xtiʼndí sele” (El nacionalismo: una religión, Carlton Hayes). Xi ijngosani, je chjota kʼoati tjínle nichxin nga sʼuí bʼasjele naxinandále, jolani nga 16 sá septiembre, nichxin nga ndaí tsakʼejna naxinandá México. Je chjota kʼoati sínda xkósonle chjota xi kisitoánntjai naxinandále, kʼoa saʼnda tjínle ʼnde jñani bexkón. Kʼoa je xo̱n xi Diario Oficial de la Federación ʼmi, xi tsʼe México, kʼoatso nga “je Bandera kao Escudole kʼoa kao je Himno Nacional, kao kui ʼyanile je naxinandá” kʼoa kʼoatso nga kataʼyaxkón. Kʼoa jenkjín nó nga jngo libro kitjo xi kʼoatso nga “kʼoati kji xkón tíjna je bandera jokji xkón tíjna je kro” (The Encyclopedia Americana).

Libro jebi kʼoati kitso chriansʼa nga je himno nacional xi tjínle nga jngó jngó naxinandá kui nchja̱ni jokji tsjoake  chjota je naxinandále kʼoa nga je Niná katabándiaale kʼoa katasíkuinda naxinandále kao chjotaxále. Ñá xi testigole Jeobá maa alikui toxokʼoabixoán nga kʼoati ya mangóson je relijión je sʼuí xi satíole je naxinandá, nga ma saludar je bandera kʼoa nga jnda je himno nacional. Jngo libro kitjo xi kui kinchja̱ni josʼin kichomani je kjoale xti xi Testigole Jeobá ma xi tsín kisʼin saludar je bandera xi tsʼe Estados Unidos kʼoa xi tojyó tsakatio kʼianga tísʼejnale je juramento. Kʼoa kʼoakitso nga je chjota xi xángʼa tjínle xi bʼéndajin kjoa ya naxinandá jebi jenkjín kjoa tsakʼéndajin xi tʼatsʼe bandera jñani kʼoakitso nga kʼoati relijión ngayeje jmeni xi nikao je bandera (Genio y figura del norteamericano, D. W. Brogan).

Ñá xi testigole Jeobá maa alikui joʼmilee je chjota nga kʼoasʼin sʼín saludar je bandera kʼoa nga sele ninga tsín kʼoanʼiañá, nga̱ ʼyañá nga kontra tíjnale jotso Biblia. Kʼoati likui chʼao ʼmilee je bandera kʼoa nitjosonlee je “chjota xi xá tjínle”, nga̱ jngoyale jé Niná tjíosíxále (Romanos 13:1-4). Kʼoati nitjosoán kjoafaʼaitsjen xi faʼaitʼa ya Biblia nga bʼetsʼoaa “xi tʼatsʼe chjotatítjon kao ngatsʼi xi ngʼa tjío”. Tonga kui kʼoanʼiañá “jméni nga nyʼán kuiyosínía, kʼoa jméni nga tojbi koangínkaosínía yaoná nga jchaxkoán Niná” (1 Timoteo 2:2).

Nga ma botar. Je xi ñaki chjotale Cristo ma bexkónní josʼín nga jngó jngó chjota, alikui kʼoabʼematsole chjota nga tsín katafisʼín botar. Kʼoa sítjosonle je chjota xi xá tjoé. Tonga alikui kjoa polítika tsjonjin yaole (Mateo 22:21; 1 Pedro 3:16). Tonga jósʼin tsa kjoanʼio sʼe̱nele ya naxinandále nga sʼin botar kʼoa tsa saʼnda kjoa sʼe̱le tsa tsín sitjoson. Kʼiatsa tsjoáʼndele kjoafaʼaitsjenle koaan koai ya jñani tjío casilla tonga alikui sʼin botar, tojo kisʼin je Sadrac, Mesac kao Abednego, nga ki ya ʼnde xi Dura ʼmi kʼianga tsaʼyaxkón je xkóson xi kisinda Nabucodonosor. Tonga jaon koya kjoafaʼaitsjen xi tjínnele nga kuenta sʼin kʼianga tsín kjoaʼatone kjoatéxomale Niná:

1.   Ñá xi chjotale Jesús maa alikui i̱ sonʼnde nojiaan yaoná (Juan 15:19).

2. Je xi bʼainganʼiolee jé Cristo kʼoa kao Kjoatéxomale (Juan 18:36; 2 Corintios 5:20).

3. Ngatsʼiaa xi ya naxinandále Niná tiyojiaan, kui kjoamakjainná kʼoa kao kjoatsjoacha xi tjínná xi jtín síkatíoná (1 Corintios 1:10; Colosenses 3:14).

4. ʼYani xi kʼoasʼin sʼín botar kʼoati je kjinele jmeni xi sʼin je xi tjoé xá (chótʼajin jotso ya 1 Samuel 8:5, 10-18 kao 1 Timoteo 5:22 kʼoa tikjaʼaitsjenjin jmeni xi bakóyaná).

5. Je Jeobá alikui kisasenle nga jngo rey kisijé je chjota israelita nga̱ jékjoánni xi tsakʼasjengi nga tíbatéxomale (1 Samuel 8:7).

6. Kʼianga tsín jme partido tiyojiaan ma ʼmiyalee toʼya chjotani tʼatsʼe Chjotaxále Niná (Mateo 24:14; 28:19, 20; Hebreos 10:35).

Servicio civil. Tjín naxinandá jñani kjaʼaí xá bʼaingajaole ʼyani xi tsín sítjoson je servicio militar kʼoa kui xi servicio civil ʼmi. Jméni xi sʼiaan ñá kʼiatsa kui kjoa tiyojiaan. Je Jeobá kʼoétsʼoalee kʼoa nda kuijnatsʼinyaa tʼatsʼe kjoa jebi kʼoa koaan si̱jélee kjoafaʼaitsjen jngo ndsʼee xi ngisa tjínle kjoafaʼaitsjen. Kʼiatsa kʼoasʼiaan jchañá josʼiaan (Proverbios 2:1-5; Filipenses 4:5).

Je Énle Niná kʼoatsoná nga si̱tjosonlee je “chjotatítjon kao chjotaxá” kʼoa nga kuiyondaa “tojme xáni xi nda”, kʼoa nga chósonnilee jmeni xi sʼiaan (Tito 3:1, 2). Kuinga chjónangisínilee yaoná: “Kʼiatsa kui sitjosoan je xi servicio civil ʼmi, a kjoa polítika tsjónjinna axo kui relijión ndiso tsjónjinna” (Miqueas 4:3, 5; 2 Corintios 6:16, 17). “A ñʼai koa̱nna axo ñaki tsín tikʼoakoa̱nnina nga sitjosoan je xá xi títsjoána Niná.” (Mateo 28:19, 20; Efesios 6:4; Hebreos 10:24, 25.) “A ngisa tse nichxin sʼe̱na nga sixále Niná, jolani tsa precursor koa̱n.” (Hebreos 6:11, 12.)

 Kʼiatsa jngo ndsʼee xi tsjoáʼndele kjoafaʼaitsjenle nga sitjoson je xi servicio civil ʼmi ʼndele nga ndoyá koai, je ndsʼee xi ngikʼa alikui koa̱n jokuitsole (Romanos 14:10, TNM). Kʼoa kʼoati likui koa̱n jokuitsole kʼiatsa tsín sitjoson xá jebi (1 Corintios 10:29; 2 Corintios 1:24).