1. ʼYá chjotani xi nchja̱ndʼéle Jeobá kʼoa jméni xi sikuindale yaole chjota jebi.

JE Jesús kʼoakitso “nga je xi ñaki kjoakixi bexkón Niná, skoe̱xkón Nʼainá kao ni̱ma̱le kʼoa kao kjoaʼyaxkón xi ñaki kʼoatjín, nga̱ je Nʼainá kʼoati básjai chjota xi kʼoasʼin skoe̱xkón nga je” (Juan 4:23). Kʼianga masjaile Jeobá jngo chjota xi mele skoe̱xkón nchja̱ndʼéle je kʼoa kao ʼNdíle (Juan 6:44). Nʼio tse kjoanda tjínná ñá nga jekinchja̱ndʼéná. Tonga nʼio machjén nga nda “chótʼa[a] je xi sasénkon Nainá” kʼiatsa tsín mená nga ya jtsaoyaa che̱nle je Na̱i, nga̱ je Na̱i nʼio maña josʼin bʼanacha (Efesios 5:10; Apocalipsis 12:9).

2. Jósʼin bekon Jeobá nga kui mʼójin relijión xi kixi jme xi ya nroani relijión ndiso.

² Si̱kjaʼaitsjenjinla jmeni xi koan nichxin kjoatse ya chrian nindo Sinaí. Kʼianga kʼoakitsole Aarón je chjota israelita nga jngo xkóson katasíndale, kisitjosonle naxinandá kʼoa jngo nra̱ja̱ʼndí xi tao̱nsine kisindale. Je Aarón joxi kʼoakitso nga je Jeobá tsoyanile xkóson jebi, nga̱ i kitso: “Sʼuí chʼa̱sjelee Jeobá nyaon”. Tonga a kisasenle Jeobá nga kui kitsʼójin relijión xi kixi jme xi ya nroani relijión ndiso. Majain. Saʼnda kʼoakitso nga katanikʼien chjota xi kui tsakʼétsʼoale, kʼoa janla jmi mani xi kinikʼien (Éxodo 32:1-6, 10, 28). Choa̱ jebi kui bakóyaná nga nʼio machjén nga “nijmejin xi jndí tíjna” si̱koaa kʼoa nga nitsejin kʼoaiʼndee nga kui xi jndí tíjna koaisʼenjin je relijión xi kixi (Isaías 52:11; Ezequiel 44:23; Gálatas 5:9).

3, 4. Ánni nga nʼio machjénsíni nga kao Biblia si̱ngósonkoaa je sʼuí kʼoa kao kostumbre xi tjín ndʼaibi.

³ Kʼianga tjíokonsa je pastro, jé tsakʼéchjoa nga tsín kjoaʼmiya  ndiso jaʼasʼenjin naxinandále Cristo. Tonga nga jekʼien ngatsʼi, tjínkʼa xi tosa kjoandiso koantsjoake kʼoa xi yátsʼi̱n tsakinyále Cristo. Kʼoa kui kisikʼasʼenjin naxinandále Cristo je sʼuí kao kostumbre kʼoa kao nichxin xi tsabexkón je relijión ndiso. Kʼoa je chjota kʼoasʼin makjainle ndʼaibi nga tʼatsʼe Cristo jaʼaini jebi (2 Tesalonicenses 2:7, 10). I̱ kjoaʼmiya jebi kui chótʼaya kʼaa tʼatsʼe je sʼuí kao kostumbre xi tjín ndʼaibi. Jchañá nga tsín nganʼiotsjele Niná síxákao kʼoa nga kui nganʼio xi kijnajtsa sonʼnde bakó. Kʼoati jchaa nga kui símekonná xi chʼaotjín kʼoa nga kjoandiso kao kjoabʼenda kaníbason. Kʼoa ngayeje jebi tsʼení je xi “Babilonia xi nʼio je” tsole Biblia (Apocalipsis 18:2-4, 23). * Je Jeobá nʼio nda be jokji chʼao kisʼin chjota xi relijión ndiso tsakatiojin ngasʼa kʼoa bení nga ya jaʼaini je sʼuí kao kostumbre xi tjín ndʼaibi. Kʼoa je xi ngisa mangínñá kui josʼin síkjaʼaitsjen Jeobá (2 Juan 6, 7).

⁴ Ñá xi chjotale Cristo maa ʼyañá nga tjíokʼa sʼuí xi tsín sasénle Jeobá. Kʼoa ñaki kʼoatjío tokoán nga nitsejinla ya kuinójiaan yaoná. Kuila chótʼayá ndʼaibi ánni nga tsín sasénsínile Niná. Kʼianga jekoa̱njinná anni nga tsín sasénsínile kʼoa nga chʼaosʼin kuiyoaa ngixko̱n kʼiatsa ya kuinójiaan yaoná ngisa kʼoakʼoé tokoán nga ñaki chʼa̱sjengiaa sʼuí jebi.

5. Jósʼin ʼyañá nga tsín tsa 25 sá diciembre kitsin Jesús.

⁵ Alijña kʼoatso Biblia tsa sʼuí chʼa̱sjelee Jesús nichxin nga kitsin, kʼoa likui ʼyaaje̱ kʼiákjoánni kitsin. Jósʼin ʼyañá nga tsín tsa 25 sá diciembre kitsin. * Kuinga nʼio nyʼán ma sá jebi ya  naxinandá Israel kʼoa ya Lucas 2:8-11 kʼoatso nga tjío chjota xi jinsén “[tjío]koʼnda cho̱ xi tiyani nangibe” nichxin nga kitsin Jesús. Je chjota alikuijin ya koʼnda cho̱le ya jinsén nga jngo nó. Tsa tojinsénlani bationtsjai lijmejin xá kui kisʼetʼani ya Biblia. Kʼianga cha̱nnyʼán síkatíoʼya cho̱le, nga̱ ya Belén jtsí bʼa kʼoa saʼnda nyʼán tjon. Xi ijngosani, ánni nga ya Belén kisíni je José kao María. Kuinga je Augusto César, xi tíbatéxoma nga kʼia, kʼoasʼin tsakʼéne nga ngatsʼi chjota katafikáya xo̱n yaole ya ʼndele chjotajchíngale (Lucas 2:1-7). Kʼoa mani nga tjíongijti kon chjota judío kao je chjotaxá romano, je Augusto César alikuijin kʼianga cha̱nnyʼán tsakʼéte chjota judío ya naxinandále.

6, 7. 1) Jñá kinroani jmeni xi sʼín chjota kʼianga Navidad. 2) Jméni xi tsín mangóson je chjota kʼoa kao chjotale Cristo kʼianga tsojmi tsjoákjoatjaole xínkjín.

⁶ Jñáni jaʼaini je Navidad. Yaa jaʼaini je sʼuí xi tsakʼasje chjota xi tsín tsa Jeobá tsakʼétsʼoale. Je Biblia alikui kʼoatso tsakui chʼa̱sjee. Jaola koya si̱kʼaxkiaa jña kiskoenile chjota xi kui sʼuí kisikʼatsen. Xi títjon, yaa kiskoenile sʼuí xi bʼasje ngasʼa je chjota romano kʼianga bexkón je niná xi Saturno kitsole, je niná xi tsʼe tsojmintje. Xi majaoni, nichxin kjoatse je chjota romano sʼuí bʼasjele je Tsʼuí. Je Enciclopedia de la Religión Católica kʼoatso nga kʼoasʼin koankjainle nga 25 sá diciembre tsin je tsʼuí. Kʼoa chjota xi tsakʼétsʼoale je tsʼuí xi Mitra kitsole, nʼio xkón tsabe nichxin jebi. Je libro xi kanikʼaxkiaa kʼoatso nga je relijión católica kui Navidad tsakʼéjnayangajaole sʼuí jebi nga 25 sá diciembre kitsin je Cristo kitso. Kʼoa jela jan siento nó jaʼato nga kinikʼien Cristo nga kʼoakoan.

⁷ Kʼianga tsakatío sʼuí jebi je chjota romano, tsojmi kitsjoakjoatjaole xínkjín kʼoa tsakjensʼuíní. Kʼoa kʼoati sʼín ndʼaibi je chjota kʼianga Navidad. Tonga kʼianga tsojmi tsjoále xínkjín alikui kui fitjenngi jotso 2 Corintios 9:7: “Nga jngójngó katatsjoá josʼin kosonnile ni̱ma̱le, ali kao kjoabajin, nikao kjoanʼiojin, nga̱ Niná tsjoake je xi kao kjoatsjoa tsjoá”. Ñá xi chjotale Cristo maa ñaki ni̱ma̱ná nroajinni  nga jme xi bʼaikjoatjaolee xíngiaa kʼoa ali tsa totsen tíjnajin nichxin nga kʼoanʼia. Kʼoa nikuijinla choyalee nga tjín xi kʼoaingajaoniná (Lucas 14:12-14; tʼexkiai Hechos 20:35). Kʼoa nʼio tsjoa tjíonáje̱ nga tsín tikui nikjáojinñá kʼoa nga tsín tsa titao̱n mjetʼenñá yaoná kʼianga kui nichxin (Mateo 11:28-30; Juan 8:32).

8. Tʼeyanajmílai, a kʼiaa nga kitsin Jesús kichokaokjoatjaole tsojmi je chjotachjine xi niño kotʼayason.

⁸ Tsakui nichxin i̱ kuitso kʼa chjota: “Tonga a tsíkui nga tsojmi kichokaonile Jesús je reyes magos nga tsakʼasjengʼa je nichxin nga kitsin”. Mai. Kuinga tsojmi kichokaonile nga̱ chjotatítjon koa̱n je Jesús. Kʼoasʼin beni chjota nga kui nichxin (1 Reyes 10:1, 2, 10, 13; Mateo 2:2, 11). Kʼoa je chjota xi kichonrʼoe Jesús ya niʼyale niño kotʼayason kʼoa jenkjín sá jaʼato nga kichokonle, ali kʼiajin kichonrʼoe nitje̱n nga kitsin.

9. Jméni xi koan kʼianga tsakatío sʼuíle faraón kao Herodes nga jele nó.

⁹ Nʼio tse kjoatsjoa tjenkao nga jngo ʼndí tsin. Tonga ya Biblia nijngojinla choʼndale Niná síkʼaxki̱ xi sʼuíle tsakʼasje nga jele nó (Salmo 127:3). A tokichajinle xi kiski Biblia nga tsín tsakʼétʼani. Majain. Nga̱ jao chjota síkʼaxki̱ xi sʼuíle tsakʼasje, je faraón kʼoa kao Herodes Antipas, kʼoa likui ndasʼin bʼaxki̱ (tʼexkiai Génesis 40:20-22; * Marcos 6:21-29). Tobʼelañá,  kʼianga tíbʼéjna sʼuíle Herodes jé Juan Bautista tsakichasin.

10, 11. Jósʼin tsabekon je chjotale Cristo xi títjon tsakatio nga sʼuíle tsakʼasje chjota nga jele nó, kʼoa ánni.

¹⁰ Jngo libro kijna xi kʼoatso nga je chjotale Cristo xi títjon tsakatio, alikui ndasʼin tsabekon sʼuí jebi nga̱ yaa kinroani relijión ndiso (Las cosas nuestras de cada día). Tobʼelañá, je chjota griego kao chjota romano kʼoasʼin koankjainle nga jngo espíritu síkuinda nga jngó jngó chjota josaʼnda nga tsin. Kʼoa nga kʼia tjosjele sʼuíle espíritu jebi kʼianga fele nó chjota (Gran Enciclopedia Rialp). Xi ijngosani, jenʼio kjoatse nga je chjota kui kotʼayason josʼin tjío niño nichxin nga tsin jngo chjota, kʼoa yaa bʼangini nga kʼoatso jmeni xi koa̱nle chjota nichxin xi fini.

¹¹ Kuinga tsín sʼuíle tsakʼasjeni je choʼndale Niná nga jele nó nga̱ kjoabʼenda tjenkao sʼuí jebi kʼoa yaa kinroani tʼatsʼe chjota xi tsín je Jeobá tsabexkón. Kʼoa kʼoajinti kui nga tsín kʼoakisʼinni nga̱ nangitokon koan. Alikui ngʼa tsakʼasje yaole kʼoa alikui kʼoasʼin kisikjaʼaitsjen nga sí sʼuí kuitjole jme nichxinni nga kitsin (Miqueas 6:8; Lucas 9:48). * Tojé Jeobá tsakʼasjengʼa nga kʼoasʼin kitsjoale kjoabijnachon (Salmo 8:3, 4; 36:9; Apocalipsis 4:11). *

12. Ánni nga kʼoatsosíni Biblia nga ngisa nda je nichxin nga biya jngo chjota tikʼoajinni nga tsin.

¹² Kʼianga jngo xíngiaa xi nda kafitʼale Niná biya, yaa kjoafaʼaitsjenle Jeobá sʼejnajin. Kʼoa kjoaʼáyanile nga kuichoka nichxin (Job 14:14, 15). Kʼiatsa nda koanngíntʼalee Niná nda kʼoaxkiaa ngixko̱n. Kuinga i̱ tsosíni Eclesiastés 7:1: “Ngisa  nda nga nda bʼaxkiaa tikʼoajinni jngo siti̱ xi nʼio nda, kʼoa ngisa nda je nichxin nga biyaa tikʼoajinni nga tsiaan”. Kuijin nga kʼoatsoni Biblia nga tosa kui kjoabiyale Cristo si̱kjaʼaitsjenya tikʼoajinni nga kitsin, kʼoa je Cristo jngo “jaʼaín” xi nʼio ngʼa tíjna kitsʼaile, kʼoa kao jaʼaín jebi kuitjontjaiñá (Hebreos 1:3, 4; Lucas 22:17-20).

13, 14. Jñá jaʼaini je kostumbre xi sʼín chjota kʼianga Nichxin Xkón.

¹³ Ninga kʼoatso je chjota nga je kjoabiyale kʼoa kao kjoafaʼáyale Jesucristo síkjaʼaitsjenya kʼianga Nichxin Xkón, tonga nʼio nkjín koya jmeni xi sʼín xi ya kinroani tsʼe relijión ndiso, jolani nga kʼoasʼin síkʼandai. Je libro xi Las Grandes Religiones Ilustradas ʼmi kʼoatso nga kʼianga kjesa faʼaijin Cristo, je chjota babilonio “nʼio kisisinle je xkóson xi tsabexkón [...]. Ñaki najño chjí kisikʼakjá xkósonle, tsakʼéngile tofangi, ki̱cha̱ tsakʼékjá ntsja kʼoa tsakʼéyale tao̱njngo; ñaki síxkónkjoan jñani kisikáyoson kʼoa kisikʼandaikao”.

¹⁴ A sasénle Jeobá nga kui mʼójinkao je kostumbrele relijión ndiso kao nichxin nga jaʼáyale je ʼNdíle. Majain (2 Corintios 6:17, 18). Je Énle Niná alijña kʼoatso tsa tjínnele si̱kjaʼaitsjenya nga kui nichxin. Tjín naxinandá jñani saʼnda kui jaʼaín xi ya kinroani relijión ndiso tsjoále je sʼuí xi bʼasje nichxin nga jaʼáyale Cristo, kʼoa jebi ngisa titsengáni jée ngixko̱n Niná.

15. Jñá jaʼaini kostumbre xi tsʼe Sʼuíkʼen.

¹⁵ Jñá jaʼaini kostumbre xi tsʼe Sʼuíkʼen. Jngo libro xi i̱ tso: “Tjínkʼa jmeni xi makjainle chjota kʼianga Sʼuíkʼen xi ya kinroani relijión ndiso kʼoa jenʼio kjoatse tsʼatsen. Kʼoa kuinga kʼoasʼin makjainsínile je xi toxkia ʼndíchjota xi ya tsʼe ya naxinandá jñani katóliko nga kʼia faʼai ʼndíkʼienle jñani tsakatio kʼoa nga kjine tsojmi xi bʼénda je xi tjíokon” (The Encyclopædia Britannica xi kitjo nga nó 1910). Nʼio nkjín chjota  xi kui kostumbre fitjenngi ndʼaibi ninga ya kinroani tsʼe relijión ndiso.

16, 17. 1) Ánni nga nʼio machjénsíni nga Énle Niná katasíngósonkao kostumbre xi tjín ya ʼndele je xíngiaa xi kuixan. 2) Jméni xi kuenta sʼiaan tʼatsʼe je kostumbre xi tjínle chjota kʼianga tjín xi bixan.

¹⁶ Jenʼio chrian tíjna je nichxin nga nijngojinla “jta̱le xʼin kao chjoónle” xi sʼa tjíobixan tikuinóʼyanile ya Babilonia xi nʼioje. Ánni. Kuinga ni̱kjeson (Apocalipsis 18:23). Kʼoa kuinga kʼoakoa̱ntʼainni nga nkjín koya jée tíbajngi ngixko̱n Niná, jolani nga kjoabʼenda sʼín. Kʼoa nkjín koya kjoabʼenda xi jeya kitsʼójinkao kostumbre xi tjínle chjota kʼianga bixan kʼoa tikui jebi síkitsónni je kjoabixan fitsʼiakjoanni nichxin nga bixan (Marcos 10:6-9).

¹⁷ Kjaʼaí kjaʼaí kostumbre tjín nga jngó jngó naxinandá. Tjínkʼa xi kʼoatso nga tjíokʼa kostumbre xi suerte tsjoále je xi tjíobixan kʼoa kao je xi bichókonle. Tsakui nichxin lijme xi tjínle koa̱nná, tonga si̱kjaʼaitsjeen nga tʼatsʼe relijión ndiso jaʼaini (Isaías 65:11). Tobʼelañá, tjín ʼnde jñani arron kʼoa tsa jmesani xi sʼetsaojon je chjota xi tjíobixan. Tsakui nichxin kʼoasʼin koankjainle ngasʼa je chjota nga kao tsojmi xi ma chine ma nikʼéjyoʼani je sénnichxin xi tsín nda, ánni nga tsín jokatasíkaosíni je xi tjíobixan. Xi ijngosani, jenkjín siento nó nga kʼoatso chjota nga je arron kui tsoyanile nga nkjín xti sʼele chjota, nga tsjoa sʼele kʼoa nga tse nichxin male. Kʼiatsa mená nga tosi tonda sʼe̱ná je kjoatsjoachale Niná tjínnele chʼa̱sjengiaa kostumbre jebi, xi jndí tjío ngixko̱n Niná (tʼexkiai 2 Corintios 6:14-18).

18. Jmé kjoafaʼaitsjen xi faʼaitʼa Biblia xi koa̱n koaitjenngi xíngiaa xi jekuixan kʼoa kao xi kuichokonle nga kui nichxin.

¹⁸ Kʼianga bixan choʼndale Jeobá alikui kui kʼoasʼín jmeni xi chʼaosʼin sikʼéjna kjoabixanle kʼoa xi sikaténgi kjoafaʼaitsjenle xi ngikʼa. Aliʼya xi chʼao tso én síchjén kʼianga nchja̱yajinle chjota kʼoa tsakuije̱ én xi totso tomani. Kʼoati tsínkui énská xi chʼao tso nchja̱, nga̱ kaile nga kjoasoa sikatíojin je  xi tjíobixan kʼoa kao je xi ya tjíobasen (Proverbios 26:18, 19; Lucas 6:31; 10:27). Xi ijngosani, kʼianga bixan je choʼndale Jeobá alikui kui sʼuí bʼasje xi “kjoangʼatakon” tjenkao, xi tokui koakoni nga tjínle tao̱n kʼoa nga ngʼa tjío (1 Juan 2:16). Xi mele je Jeobá kuiní nga tsjoa katamale choʼndale kʼianga sikjaʼaitsjen jokoan nga chixan ʼndele nga aon koa̱nle. *

19, 20. Jótso jngo libro, jñá jaʼaini nga kʼoasʼin mʼaonkjao cho̱tsínxánle chjota, kʼoa ánni nga chʼa̱sjengisíñá kostumbre jebi.

¹⁹ Tjín ʼnde jñani cho̱tsínxánle mʼaonkjao chjota kʼianga tjín xi bixan kʼoa tsa kʼiaje̱ nga kjenjtín. Kʼianga nó 1995 jngo libro kitjo xi kʼoakitso nga je kostumbre jebi tsakui nichxin ya kinroani jokisʼin chjota nichxin kjoatse kʼianga njín kʼoa tsa bino kitsjoatʼale je niná xi tsakʼétsʼoale, tojoni nga tjín xi katabʼaingajaonile. Kʼoa kʼianga kʼoakisʼin kui kisijéle ninále nga nda katafile nichxin kʼoa nga tsín chʼin katatsaotʼale (International Handbook on Alcohol and Culture).

²⁰ Kjoaixiní, nkjín chjota xi saʼnda tsín be tsa ya relijión ndiso jaʼaini kostumbre jebi kʼoa tsa ya kinroanije̱ jme xi koankjainle chjota ngasʼa. Tonga nga kʼoasʼin kjomingʼa cho̱tsínxánle chjota joxi kjoandajinni síjéle ngʼajmi. Tonga alijña kʼoatso je Biblia kʼiatsa kʼoasʼiaan kʼianga si̱jélee kjoanichikontʼain je Niná (Juan 14:6; 16:23). *

21. Jmé sʼuíni xi bʼéchjoale yaole je chjotale Cristo, ni ya nroani tsʼe relijión ndiso kʼoa ni mai, kʼoa ánni kʼoasʼínsíni.

²¹ Je chjota alikui tinda tjíofikaoni yaole ndʼaibi. Kui kʼoakjimani  nga je relijión ndiso tjíobʼétejin nga kʼoatjíosʼín, kʼoa tsa maije̱ totsjoáʼndele chjota nga kʼoasʼín josʼin mele. Kʼoa tjínkʼa naxinandá jñani nga je chjotaxá tsjoánganʼio nga bitjo je sʼuí xi Carnaval ʼmi nga xki̱ nó, jñani nga tokjaʼaíngá sʼín je chjota nga te kʼoa jñani nga kui bitjongʼa josʼin tjíofikao yaole je xʼin xi tixʼin xínkjín fayokaoni kʼoa je yánchjín xi tiyánchjín xínkjín fayokaoni. A ndatjín nga kui chótsenlee kʼoa tsa ya koanngián sʼuí jebi ñá xi tsjoachaa je Jeobá. Kʼiatsa kʼoatinʼia, a ñaki jticha kjimaa je xi chʼaotjín (Salmo 1:1, 2; 97:10). Tongisa ndatjín nga kʼoasʼiaan jokisʼin je salmista kʼianga i̱ kitsole Niná nga tsakʼétsʼoale: “Ali bʼaiʼndejin nga kui kotsenle xkoan jme xi tsín jme chjíle” (Salmo 119:37).

22. Kʼiáni nga kui kjoafaʼaitsjenná si̱chjén tsa koa̱n si̱siaan kʼoa tsa mai jngo sʼuí kʼoa tsa kostumbre.

²² Kʼianga jngo sʼuí bitjo xi tsín kixi tíjna machjénní nga si̱kuindaa yaoná nga tsín ya kuinójiaan yaoná. Je pastro Pablo i kitso: “Tsa bicho, kʼoa tsa ʼyo, tsa tojmenibe xi nʼiao, kʼoatʼiaon ngayije xi tʼatsʼe kjoajeyale Niná” (1 Corintios 10:31; chótsenlai rekuadro xi tso: “ Nda si̱kjaʼaitsjeen jme xi sʼiaan”). Kʼoa jósʼiaan tʼatsʼe je kostumbre kʼoa kao je sʼuí xi tsín bʼétʼale je Énle Niná kʼoa likui ya nroani tsʼe relijión ndiso, tsʼe kjoa polítika kʼoa tsa likui naxinandá bʼasjengʼa. Xi tʼatsʼe jebi jé xi kuitsoni nga jngó jngó je chjotale Cristo a sisinní axo mainí. Tonga kʼoati machjén nga kuenta sʼin je kjoafaʼaitsjenle xi ngikʼa nga tsín katasaténgi.

23, 24. Jósʼin koakolee chjota nga kixi tíjna kjoatéxomale Jeobá.

²³ Nkjín chjota xi kʼoasʼin síkjaʼaitsjen nga tokʼia ma batiojtín kao xínkjín kʼoa kao miyole kʼianga sʼuí bitjo. Kʼoa nga tsínkui sʼuí chʼasjee ñá tsakui nichxin kʼoasʼin sikjaʼaitsjen nga toñá kichʼá yaoná kʼoa nga tsín tsjoachaa xíngiaa. Tonga koaan ngasin nganda kʼuínyalee nga kʼoati biyojtián kao  xíngiaa nga jngo nó (Proverbios 11:25; Eclesiastés 3:12, 13; 2 Corintios 9:7). Kʼoakʼuínlee nga likui nda sʼe̱ tokoán kʼiatsa kui kostumbre xi tsín sasénle Niná kʼoa xi kontra tjíole kjoatéxomale cha̱nisʼenjiaan kʼianga biyojtián kao xíngiaa, nga̱ tsa kʼoasʼiaan chʼaosʼin kuiyoaa ngixko̱n (chótsenlai rekuadro xi tso: “ Tojé relijión xi kixi xi nʼio tsjoa fáya tokoán”).

²⁴ Kʼianga jme xi kjonanginá chjota xi tʼatsʼe sʼuí sakʼoaa nda bichómani kʼianga ya bakolee jotso je kjoaʼmiya 16 xi tsʼe libro xi Jmé kjoanni xi bakóya je Biblia ʼmi. * Xi mená kuinga katafaʼasʼenjin ni̱ma̱le chjota je Énle Niná ali tsakuijin nga si̱kinjelee jmeni xi kuitsoná. Kuinga machjénsíni nga kao kjoaxkóntokon kuinókjoaa, nga kui si̱chjén én xi inda tso kʼoa nga kʼoasʼin katamangóson je énná “joni tsa tsojmi xi nda chine” (Colosenses 4:6).

25, 26. Jmé xi sʼiaan nga katamataja kjoamakjainle ʼndíxtiná kʼoa nga ngisasa katamatsjoake Jeobá.

²⁵ Ñá xi testigole Jeobá maa ʼyañá anni nga chʼasjengi kʼañá je kostumbre kʼoa kao sʼuí xi tjín ndʼaibi (Hebreos 5:14). Tonga kʼoati machjén nga katamajinle ʼndíxtiná tʼatsʼe jebi. Kʼianga ʼmiyalee ʼndíxtiná jñani chʼangiñá Énle Niná kʼianga tsín chʼasje kʼaa sʼuí, jan koya josʼin binyakoaa. Nitajañá kjoamakjainle, tiʼmiyalee josʼin sichjén Biblia kʼiatsa jme xi chjónangile tʼatsʼe josʼin makjainle, kʼoa tibinyakaoñá nga tosi tonda katasʼele kjoatsjoachale Jeobá (Isaías 48:17, 18; 1 Pedro 3:15).

²⁶ Je xi bexkón Niná “kao ni̱ma̱le kʼoa kao kjoaʼyaxkón xi ñaki kʼoatjín” ali tsa tokuijin bʼéchjoale yaole je sʼuí xi kontra tjíole Énle Niná (Juan 4: 23). Ya kjoaʼmiya xi fini kui jchaa nga kʼoati nʼio machjén nga ñaki chjotakixi katamaa ngantsjai. Kʼoa ninga nkjín chjota xi kʼoasʼin síkjaʼaitsjen nga tsín skénndiaaná nga kixi koaan, kjoaʼmiya jebi kui koakoyaná nga ngisa nda nga je Niná si̱tjosonlee ngantsjai.