Jon xi tsjoachao je Jeobá:

Je Jesús i kitso: “Jchanío xi kjoakixi, kʼoa je xi kjoakixi sikatíondaíno” (Juan 8:32). Ñaki nda bʼé tokoán én jebi. Ánni. Kuinga koa̱n jchaa jokjoantjínni je kjoakixi xi tsʼe Niná ningalani nʼio tjín énndiso nichxin fetʼa xi tiyoaa ndʼaibi (2 Timoteo 3:1). Faʼaitsjenjinná jokji tsjoa kisʼená nga tsaʼyaa jokjoantjínni je Énle Niná.

Tonga ali tsa tokuijin xi machjén nga kataʼyaa jokjoantjínni xi tʼatsʼe Niná kʼoa nga kjitʼa kʼuínyasoán. Tjínnele kʼoasʼin koanngínkoaa yaoná jotso Biblia, kʼoa kuinga machjénsíni nga tosi tonda katasʼená je kjoatsjoachale Niná. Jméni xi sʼiaan nga tsín si̱chaa kjoatsjoachale Niná. Kui jmeni xi kitsole Jesús je pastrole nga kjesa ndoajin: “Tsa si̱kitjoson kjoatéxomana, kuiyokao[ñó] kjoatsjoachana, josʼin nga an kisikitjosoan je kjoatéxomale Nʼaina, kʼoa tijnakoa kjoatsjoachale” (Juan 15:10).

Tojo tso én jebi, jméni xi kisʼin Jesús nga tosi tonda kisʼele kjoatsjoachale Niná. Kisitjoson je kjoatéxomale Nʼaile. Kʼoati tjínnele sʼiaan tsanda ñá. Kʼiatsa mená nga tosi tonda sʼe̱ná je kjoatsjoachale Niná, machjénní nga ñaki kuenta sʼiaan je Énle tojmeyejeni xi sʼiaan. Je Jesús kʼoati i̱ kitso: “Tsa ʼyanío kjoa jebi, jó tondano tsa kʼoasʼiaon” (Juan 13:17).

Je xi mená kuinga katabasenkaoná ngatsʼiaa libro jebi nga tosi tonda kʼoasʼiaan jmeni xi tso je Biblia, ánni nga tosi tonda sʼe̱síniná je “kjoatsjoachale Niná” kʼoa kuichotjenngisíñá “je kjoabijnachon xi tsínkʼia fetʼa” (Judas 21, TNM).