KJOAʼMIYA 03
A koaan koa̱nkjainná jmeni xi tso Biblia
Ya Biblia nkjín kjoafaʼaitsjen tsjoáná kʼoa kʼoatsoná jmeni xi koa̱n nichxin xi sʼa nroa. Tsakui nichxin meli jchai jmesa xi tsoya. Tonga sakʼoajin jao sʼe tokuin jmeni xi tso. A koaan koa̱nkjainná jmeni xi tso je Biblia ninga jekjoatse kichji. A koaan koa̱nkjainná nga kʼoatso nga koa̱n nda kuiyoaa ndʼaibi kʼoa kao nichxin xi nroaján. Nkjín chjota xi makjainle. Machjén nga jisoa kataʼyai ánni nga kʼoasʼin síkjaʼaitsjenni je chjota.
1. A ñaki kʼoakoa̱n kjoaixi jmeni xi tso je Biblia
Je Biblia kui faʼaitʼa je “én xi ñaki kʼoatjín” (Eclesiastés 12:10). Jmeni xi tso ñaki kʼoatjín kʼoa ñaki tsakatio je chjota xi síkʼaxki̱ (tʼexkiai Lucas 1:3 kao 3:1, 2). Je chjota xi kui kotʼayason jmeni xi koan ngasʼa kjimajinle nga ñaki kʼoatjín jmeni xi tso je Biblia. Tobʼelañá, kjimasjaile jaʼaínle chjota xi kʼia tsakatio, tjíobe kʼiáni kʼoakoan, kjimasjaile ʼnde xi síkʼaxki̱ kʼoa jmeni xi koan nga kʼia.
2. Ánni makjainniná jmeni xi tso je Biblia ninga jekjoatse kijna
Ninga jekjoatse kichji je Biblia tokʼoa jeya faʼaitʼa jmeni xi tsín be chjota ngasʼa. Tobʼelañá, nchjani xi tʼatsʼe ciencia. Kʼoa kjaʼaí kjaʼaísʼin síkjaʼaitsjen je chjota xi tʼatsʼe ciencia kʼianga kichji je Biblia. Tonga ndʼaibi, je chjota científico kʼoatso nga ñaki kʼoatjín jmeni xi tso je Biblia. Jmeni xi tso je Biblia “kixiní ndʼaibi kʼoa tokʼia saʼndani” (Salmo 111:8).
3. Ánni makjainniná jmeni xi tso je Biblia tʼatsʼe nichxin xi sʼa nroa
Je Biblia faʼaitʼa je én xi tongini kinokjoa a “xi kjesa kʼoamajin” (Isaías 46:10). Nkjín nó tongini kʼoakitso je Biblia jmeni xi koan nichxin kjoatse. Kʼoa kʼoati tsoya jmeni xi kjima nichxin xi tiyoaa ndʼaibi. I̱ kjoaʼmiya jebi kui chótʼayajin kʼa je én xi tongini kinokjoa xi faʼaitʼa ya Biblia kʼoa jchañá nga ñaki kʼoakjoansʼin kitjoson.
KATAʼYASAI JME XI TÍNCHJA̱NI
Kataʼyala nga mangóson jmeni xi tso je chjota científico kʼoa kao je Biblia kʼoa chótʼayajinla kʼa je én xi tongini kinokjoa xi faʼaitʼa ya Biblia.
4. Je chjota científico kʼoatso nga ñaki kʼoatjín jmeni xi tso je Biblia
Nichxin kjoatse je chjota kʼoatso nga tjín xi yʼangi je Sonʼnde. Chótsenlao VIDEO.
Kataʼyala jmeni xi tso je librole Job, jela 3,500 nó tjínle nga kichji. Tʼexkiao Job 26:7 kʼoa cho̱bayaño jebi:
-
Ánni nga tokʼoamaniná nga kʼoatso je Biblia nga totíjnajinsén je Sonʼnde.
Tosʼala 200 nó tjínle nga koanjinle je chjota joma je nandá nga jtsí ma ijngokʼa. Tonga jejmi nó tjínle nga i̱ tso xi kichji ya Biblia. Tʼexkiao Job 36:27, 28 kʼoa cho̱bayaño jebi:
-
Jméni xi tokʼoamali jotso texto jebi nga je nandá jtsí mʼóya ijngokʼa.
-
Nga kui texto jebi kabʼexkiaa, a ngisaa bʼéjngo tokuin jmeni xi tso je Biblia.
5. Je Biblia tongini kʼoakitso jmeni xi koa̱n
Tʼexkiao Isaías 44:27-45:2 kʼoa cho̱bayaño jebi:
-
Jao siento nó tongini nga kjesa nikjesonjin Babilonia, jméni xi tongini kitso Biblia nga koa̱n.
Nga nó 539 tongini nga nó 1, ñaki kʼoakoan kjoaixi nga jngo rey xi ya tsʼe Persia xi Ciro tsakʼin kichosíkjeson Babilonia. Kisixiya je xo̱ngá xi ya kijna kʼoa nga totixʼa xo̱ntjoale naxinandá Babilonia, koan jaʼasʼen kʼoa kisikjeson. Jetsʼato 2,500 nó tjínle nga kʼoakoan jebi, kʼoa toxkoa̱lesa nya naxinandá Babilonia ndʼaibi. Kataʼyala jmeni xi tongini kitso Biblia.
Tʼexkiao Isaías 13:19, 20 kʼoa cho̱bayaño jebi:
-
Jósʼin kitjoson én jebi.
Xkoa̱le Babilonia ya Irak
6. Je Biblia tongini kʼoakitso jmeni xi kjima ndʼaibi
Je Biblia nichxin fetʼa tsole nichxin xi tiyoaa ndʼaibi (2 Timoteo 3:1). Kataʼyala jmeni xi tongini kitso jokoa̱n.
Tʼexkiao Mateo 24:6, 7 kʼoa cho̱bayaño jebi:
-
Jméni xi tongini kitso Biblia jokoa̱n nichxin fetʼa xi tiyoaa ndʼaibi.
Tʼexkiao 2 Timoteo 3:1-5 kʼoa cho̱bayaño jebi:
-
Tojo tso je Biblia, jókoa̱nkjoan je chjota nichxin fetʼa xi tiyoaa ndʼaibi.
-
Jméni xi tiʼyai ji jokjimakjoan je chjota.
TJÍNKʼA XI I̱ TSO: “To cuento jmeni xi tso je Biblia”.
-
Jméni xi bʼéjngo tokuin nga ñaki kʼoatjín jmeni xi tso je Biblia.
XI KACHOTʼAYÁ
Je ciencia kao xi koan ngasʼa, kʼoa nga bitjoson je én xi tongini tso je Biblia kui bakó nga koa̱n koa̱nkjainná jmeni xi tso.
Jmé xi kamajinli
-
A ñaki kʼoakoan jmeni xi tso je Biblia axo to cuento.
-
Jósʼin bakó je ciencia nga ñaki kʼoatjín jmeni xi tso je Biblia.
-
Jósingái ji, a faʼaitʼa ya Biblia jmeni xi koa̱n nichxin xi sʼa nroa. Ánni nga kʼoasʼin nikjaʼaitsjenni.
XI KOASENKAOSALI
A mangóson jotso je chjota científico kʼoa kao jotso je Biblia.
Jméni xi bakó nga nichxin fetʼa tiyoaa ndʼaibi.
“Jaon koya én xi tongini kinokjoa xi ndʼai tíbitjoson” (La Atalaya, 1 de mayo de 2011)
Kataʼyai josʼin kitjoson je én xi tongini kinokjoa tʼatsʼe chjotaxá xi Grecia tsʼe xi nkjín ʼnde tsakánentsja.
Kataʼyai josʼin tsakasenkao je én xi tongini kinokjoa jngo chjota xi tsín makjainle tʼatsʼe Biblia tsakai.
“Alikui makjainna tsakai xi tʼatsʼe Niná” (La Atalaya, núm. 5 2017)
a Je én xi tongini kinokjoa kuiní xi tongini kitso Niná kʼoa skan bitjoson.
Tsa kʼoati meli jchai xi tʼatsʼe jebi
XI NʼIO KJONANGI CHJOTA
Jósʼin bakoyalaijin Énle Niná je chjota
Nga kʼuínyali Biblia koaan si̱chjain tojñanile Biblia xi kijnali, koaan kʼoakʼuínlai familiali, miyoli kʼoa toʼyani xi meli.
