KJOAʼMIYA 04
ʼYáni Niná
Saʼnda nichxin kjoatse je chjota nkjín niná bʼétsʼoale. Ya Biblia síkʼaxki jngo Niná xi ngisasa nʼio ʼyale xi tsín mangóson je niná xi bʼétsʼoale je chjota (2 Crónicas 2:5). ʼYáni Niná jebi. Ánni nga tsín mangósonni kao je niná xi bʼétsʼoale je chjota. I̱ kjoaʼmiya jebi jchaní jmeni xi mele Niná nga kataʼyai xi tʼatsʼe.
1. Jóʼmi je Niná kʼoa jómani ʼyaa nga mele nga jchaa joʼmi
Ya Biblia je Niná kʼoatso joʼmi, itso: “Anña Jeobá. Kui jebi jaʼaínna” (tʼexkiai Isaías 42:5, 8). Nga én hebreo je jaʼaín xi Jeobá sʼin jaʼatoya isʼin tsoyanile: “Jé xosʼín nga kʼoama”. Je Jeobá kui xi mele nga jchaa je jaʼaínle (Éxodo 3:15). Jómani ʼyaa nga kui xi mele. Kuinga kʼoasʼin koanmele nga tsʼato 7,000 kʼa faʼaitʼa je jaʼaínle ya Biblia. a Jé “Jeobá xi ñaki Niná sʼin tíjna ya ngʼajmi kao i̱ sonʼnde” (Deuteronomio 4:39).
2. Jótso Biblia xi tʼatsʼe Jeobá
Je Biblia kʼoatso nga je Jeobá xi ñaki Niná kjoaixi ninga nkjín niná bʼétsʼoale je chjota. Nkjín koya tjínni anni nga kʼoabixónñá. Tobʼelañá, jé Jeobá xi nʼio ngʼa tíjnale “jngo tjíjtsa sonʼnde” (tʼexkiai Salmo 83:18). Jé Jeobá xi ngisasa tse nganʼio tjínle, xi tsonile nga koa̱nle kʼoasʼin tojmeni. Xi ijngosani, jé Jeobá kisinda ngayeje je tsojmi xi tjín sonʼnde kao ya ngʼajmi (Apocalipsis 4:8, 11). Je Jeobá tíjna ngantsjai kʼoa kʼoéjna tokʼia saʼndani (Salmo 90:2).
KATAʼYASAI JME XI TÍNCHJA̱NI
Nkjín koya josʼin ʼmile je Niná, tonga kataʼyala nga tsín mangóson kao xi ñaki jaʼaínle kʼoa nga tojé xi bakinle jaʼaín jebi. Kʼoati jchaa jósʼin tsoyaná je jaʼaínle kʼoa ánni nga menile nga jchaa joʼmi.
3. Nkjín koya joʼmile Niná tonga tojngo mani xi ñaki jaʼaínle
Nga koa̱njinná nga tsín mangóson joʼmile jngo chjota kʼoa kao xi ñaki jaʼaínle, chótsenlao VIDEO kʼoa cho̱bayaño jebi:
-
Tobʼelañá kʼianga señor bixoán, jósʼin nga tsín mangóson kao jngo xi ñaki jaʼaín.
Je Biblia kʼoatso nga nkjín xi niná kao xi nai tsole je chjota. Tʼexkiao Salmo 136:1-3 kʼoa cho̱bayaño jebi:
-
ʼYáni xi ñaki Niná tikʼoajinni niná xi ngikʼa, kʼoa ʼyáni xi “naitítjonle xi nai ma”.
4. Je Jeobá kui xi mele nga kataʼyai jaʼaínle kʼoa nga si̱chjain
Jómani ʼyaa nga kui xi mele je Jeobá nga kataʼyaa je jaʼaínle. Chótsenlao VIDEO kʼoa cho̱bayaño jebi:
-
Jósingái ji, ánni menile Jeobá nga kataʼyale jaʼaínle.
Je Jeobá kui xi mele nga katasíchjén je chjota je jaʼaínle. Tʼexkiao Romanos 10:13 kʼoa cho̱bayaño jebi:
-
Ánni nga nʼio chjínile nga si̱chjén je jaʼaínle Niná.
-
Jósʼe tokuin ji nga ʼya xi nchja̱jaʼaínli.
-
Jósingái ji, jósʼe kon je Jeobá kʼianga nichjain je jaʼaínle.
5. Je Jeobá kui xi mele nga miyole katamai
Jngo chjoón xi ya Camboya tsʼe, xi Soten ʼmi kʼoatso nga kuisa xi ngisa nda bʼé tokoán nga ʼyaa je jaʼaínle Niná. Chótsenlao VIDEO kʼoa cho̱bayaño jebi:
-
Tojosʼin kaʼyaa video, jósʼin tsakasenkao je Soten nga tsabe je jaʼaínle Niná.
Kʼianga mamiyoaa jngo chjota machjén nga jchaa joʼmi. Tʼexkiao Santiago 4:8a kʼoa cho̱bayaño jebi:
-
Jméni xi mele je Jeobá nga sʼiain.
-
Jósingái ji, a koa̱nchriantʼalee je Niná tsa jchaa kʼoa tsa si̱chjén je jaʼaínle. Ánni.
TJÍNKʼA XI I̱ TSO: “Nga tojngo mani je Niná, koaan tojosʼin kuinókjoajaʼaínlee”.
-
Jósingái ji, a Jeobá ʼmi kjoaixi je Niná.
-
Tsakuilani kʼuínyalai xi kjaʼaí nga mele Niná nga si̱chjén jaʼaínle, jókʼuínlai.
XI KACHOTʼAYÁ
Je jaʼaínle Niná, Jeobá ʼmi. Kui xi mele nga jchaa jaʼaínle kʼoa nga si̱chjén ánni nga miyole koa̱nñá.
Jmé xi kamajinli
-
Ánni tsín mangósonni je Jeobá kao je niná xi bʼétsʼoale je chjota.
-
Ánni tjínnenile si̱chjén je jaʼaínle Niná.
-
Jómani ʼyai nga mele Jeobá nga miyole koai̱n.
XI KOASENKAOSALI
Aon koya xi bakó nga tíjna kjoaixi je Niná.
“A tíjna kjoaixi je Niná” (Yaa faʼaitʼa ya Internet ya jw.org)
Kataʼyai ánni kʼoabixónsíñá nga tíjna saʼnda ngasʼa je Niná.
“ʼYáni xi kisinda je Niná” (Xo̱n xi Bájinkonná, 1 sá agosto nó 2014)
Ánni tjínnenile nga si̱chjén je jaʼaínle Niná ninga tsín ʼyaa jokjoansʼin nokjoajaʼaínle ngasʼa.
A machjén nga ñaki si̱chjén je jaʼaínle Niná. Kataʼyai xi ñaki jaʼaínle Niná.
“Jótjín mani je jaʼaínle Niná” (Yaa faʼaitʼa ya Internet ya jw.org)
a Ya Xo̱n xi basenkaoná nga chotʼayajiaan Énle Niná yaa koa̱nsjaitʼasali josʼin tsoyanile je jaʼaínle Niná kʼoa kʼoati tsoya anni nga tsín faʼaitʼa kʼani Biblia jaʼaín jebi.
Tsa kʼoati meli jchai xi tʼatsʼe jebi
XI NʼIO KJONANGI CHJOTA
Jósʼin bakoyalaijin Énle Niná je chjota
Nga kʼuínyali Biblia koaan si̱chjain tojñanile Biblia xi kijnali, koaan kʼoakʼuínlai familiali, miyoli kʼoa toʼyani xi meli.
