KJOAʼMIYA 06
Jókoanni kisʼe kjoabijnachon
Je Biblia itso xi tʼatsʼe Niná: “Tʼatsi tínroani je kjoabijnachon” (Salmo 36:9). A makjainli nga kʼoatjín jotso én jebi. Tjín chjota xi kʼoasʼin makjainle nga tsín ʼya xi kisindaná kʼoa nga toje koantsen jmeni xi tjín, tsa kʼoalani, toxitsjoajin nga i̱ tiyoaa. Tonga tsa je Jeobá kitsjoaná kjoabijnachon tjínjin xá kisindaniná. a Chótʼayajinla jótso je Biblia tʼatsʼe jñá kinroani je kjoabijnachon kʼoa ánni kʼoabixónsíñá nga ñaki kʼoatjín.
1. Jósʼin kitsʼiani ngʼajmi kao Sonʼnde
Je Biblia itso: “Nga sʼa kitsʼia, Niná kisinda ngʼajmi kao sonʼnde” (Génesis 1:1). Je chjota científico kʼoatso jojekji tse tjínle nga tjío ngʼajmi kao Sonʼnde. Jósʼin kisinda Niná ngʼajmi kao Sonʼnde. Kui je nganʼiotsjele kisichjén nga kisinda ngayeje jmeni xi tjín, jolani: galaxia, niño, planeta kʼoa jmesani xi tjín (Génesis 1:2).
2. Jmé xá kisindani Niná je Sonʼnde
Je Jeobá “tsín tsa tokjoatjao kisinda [je Sonʼnde] kui xá kisindani nga chjota koatioson” (Isaías 45:18). Je Jeobá naskánakisichon Sonʼnde kʼoa kui xá kisindani nga koa̱n i̱ kuiyoaa ngantsjai nichxin (tʼexkiai Isaías 40:28 kao 42:5). Je chjota científico kʼoatso nga tsín mangóson je Sonʼnde kao xi kjaʼaí planeta, nga̱ toʼi Sonʼnde nga tjín kjoabijnachon.
3. Ánni nga tsín mangósonni je chjota kao je cho̱
Kʼianga jekisinda Sonʼnde je Jeobá, kʼiaa kisinda ngatsʼi xi tjíokon. Kui títjon je yá kʼoa kao je cho̱ kisinda. Kʼoa xijekoan, “je Niná kʼoasʼin kisinda chjota jokji je. Sénle kisikʼa nga kisinda” (tʼexkiai Génesis 1:27). Ánni tsín mangósonñá kao je cho̱. Je Niná kʼoasʼin kisindaná nga koa̱n chjénngiaa jokjoan je. Tobʼelañá, nga tjínle kjoatsjoacha kʼoa kao kjoatéxoma. Kʼoati kʼoasʼin kisindaná nga koa̱n nkjín én kuinókjoaa, nga chótsenlee ʼnde jña naskánachon kʼoa nga tsjoacha koaan je música. Ijngosa koya josʼin nga tsín mangósoán kao je cho̱, kuinga ma ʼyaxkoán je Niná.
KATAʼYASAI JME XI TÍNCHJA̱NI
Kataʼyala kʼa je choa̱ xi bakó nga je Jeobá kitsjoa kjoabijnachon kʼoa nga ñaki kʼoatjín jmeni xi tso je Biblia tʼatsʼe jmeni xi koannda. Kʼoalati kataʼyaa nga kui bakóyaná tʼatsʼe Niná jokjoaan xi chjota.
4. Ngatsʼi je xi tjíokon tjín xi kisinda
Kʼianga tjín xi sínda je chjota kui kjenngile jme xi koannda kʼoa nda bʼaxki̱. Tonga ʼyá xi bʼasjengʼa xi kisinda kjoanni tsojmi jebi. Chótsenlao VIDEO kʼoa cho̱bayaño jebi:
-
Tikʼaxki̱ kʼai jmeni xi kisinda je chjota, xi ya kiskenngile jmeni xi kisinda je Niná.
Je ndʼia tjín xi bʼénda, tonga ʼyáni xi kisinda ngayeje jmeni xi tjín Sonʼnde. Tʼexkiao Hebreos 3:4 kʼoa cho̱bayaño jebi:
-
Jméni xi tokʼoamali nga ʼyai jmeni xi koannda.
-
A kixi tíjna nga kʼoasʼin nikjaʼaitsjeen nga tjín xi kisinda ngayeje jmeni xi tjín ngʼajmi kao i̱ Sonʼnde. Ánni.
A ʼyaní
Tjasjaisai tʼatsʼe jebi ya jw.org jñani tso “A tjín xi kisinda” kʼoa kao “Xi tso kʼa tʼatsʼe josʼin kinroani kjoabijnachon”.
“Ngayije ndʼia tjín jngo xi bʼénda, tonga je xi tsakʼénda ngayije, jé Niná”
5. Je Biblia tsoya josʼin koannda jmeni xi tjín
Ya capítulo 1 xi tsʼe Génesis kʼoatso josʼin kitsʼiani nga koannda je Sonʼnde kao ngayeje jmeni xi tjín. A ñaki kʼoatjín jmeni xi tso axo to cuentoní. Chótsenlao VIDEO kʼoa cho̱bayaño jebi:
-
Nga kʼoatso Biblia nga jaon nichxin koanndani Sonʼnde kao ngayeje jmeni xi tjín, a to jaon nichxin tínchja̱ni.
-
A kʼoatjín jmeni xi tso Biblia josʼin kisinda Niná jmeni xi tjín, jósingái ji. Ánni.
Tʼexkiao Génesis 1:1 kʼoa cho̱bayaño jebi:
-
Je chjota científico kʼoatso jojetjín nó tjínle je Sonʼnde, nga kʼoatso kui xi tsonile nga tjínle josʼin kitsʼiani je Sonʼnde. A mangóson jmeni xi tso je chjota científico kao jmeni xi kabʼexkiaa ya Biblia.
Tjínkʼa chjota xi kʼoatso nga tobijbi tsʼantjaiya jmeni xi kisinda je Niná. Tʼexkiao Génesis 1:21, 25, 27 kʼoa cho̱bayaño jebi:
-
A kʼoatso je Biblia nga skan tsʼantjaiya jmeni xi kisinda je Niná, nga tobijbi jti̱ koan, nga tobijbi cho̱ koan kʼoa nga tobijbi chjota koan. Axo toxá kʼoasʼin kisindani nga jngó jngó koya jmeni xi tjín.
6. Ñá xi chjota alikui mangósoán kao ngayeje jmeni xi kisinda je Niná
Ñá xi chjota alikui mangósoán kao je cho̱. Tʼexkiao Génesis 1:26 kʼoa cho̱bayaño jebi:
-
Ñá xi chjota bakoñá kjoatsjoacha kʼoa kao kjoamatokon nga̱ kʼoasʼin koanndaa jokjoan je Niná. Tsa ñá xi kʼoakjoaan, jókjoan je Jeobá, jósingái ji.
TJÍNKʼA XI I̱ TSO: “To cuento jmeni xi tso je Biblia josʼin koannda jmeni xi tjín”.
-
Jósʼin nikjaʼaitsjenngái ji. Ánni.
XI KACHOTʼAYÁ
Jé Jeobá kisinda ngayeje jmeni xi tjín Sonʼnde kao ya ngʼajmi.
Jmé xi kamajinli
-
Jósʼin tsoya Biblia josʼin koannda ngʼajmi kao Sonʼnde.
-
A skan bijbi tsʼantjaiya jmeni xi kisinda je Niná axo toxá kʼoasʼin kisindani nga jngó jngó koya jmeni xi tjín.
-
Ánni nga tsín mangósonñá kao je cho̱.
XI KOASENKAOSALI
Kataʼyai nga tíjna je xi kisinda jmeni xi tjín Sonʼnde.
“Jméni xi bakóyaná jmeni xi tjín Sonʼnde” (¡Despertad!, septiembre 2006)
Chótsenlai jósʼín jngo nʼai nga tsoyale je tiʼndíle josʼin koannda jmeni xi tjín.
Kataʼyai a mangóson jmeni xi tso je evolución kʼoa kao jmeni xi tso je Biblia.
Kataʼyai jmeni xi tso je chjota xi nindale cho̱ kotʼayason kʼoa kao je chjota científico tsa totsʼatsen jmeni xi tjín kʼoa tsa tjín xi kisinda.
Jókoanni kisʼe kjoabijnachon. Aon koya tjínni xi machjén nga chótʼayajiaan (folleto)
a Ya kjoaʼmiya 25 kui nchja̱ni jmeni xi tjínndajinle Niná kao je chjota.
Tsa kʼoati meli jchai xi tʼatsʼe jebi
XI NʼIO KJONANGI CHJOTA
Jósʼin bakoyalaijin Énle Niná je chjota
Nga kʼuínyali Biblia koaan si̱chjain tojñanile Biblia xi kijnali, koaan kʼoakʼuínlai familiali, miyoli kʼoa toʼyani xi meli.
