KJOAʼMIYA 11

Jósʼiaan kʼianga koasenkaoná nga kʼoéxkiaa je Biblia

TINÓʼYALAI NGA ÉN

Kʼianga jngo xá tsakʼetsʼiakoai, tsakui nichxin kʼoasʼin kinikjaʼaitsjain nga ñʼai koa̱njngonili. Nga tsín ñʼai koanli, tsakui nichxin choa choa kʼoakinikoai. Kʼoakjoán tima kʼianga bʼexkiaa je Biblia. Tsakui nichxin i̱si: “Jñáni kʼoetsʼiakaoña”. I̱ kjoaʼmiya jebi jchaa kʼa je kjoafaʼaitsjen xi koasenkaoná jókoa̱n sʼiaan kʼianga kʼoéxkiaa kʼoa nga chótʼayá je Biblia.

1. Ánni machjénni nga nyaon nyaon kʼoéxkiaa je Biblia

Je chjota xi nyaon nyaon bʼéxkia “je kjoatéxomale Jeobá”, xi tsonile je Biblia, tsjoa sʼe̱ kon kʼoa tojmeni xi sʼin nda kuichotsjoá (tʼexkiai Salmo 1:1-3). Nga tokʼia kʼoétsʼiakoai koaan tojngo jao minuto kʼoéxkiai nga nyaon nyaon. Kʼianga jekoa̱nngali ngisaa koa̱nmeli nga kʼoéxkiai.

2. Jméni xi koasenkaoli nga ngisa nda koa̱njinli kʼianga kʼoéxkiai je Biblia

Kʼianga ngisa nda koa̱njinli tjínnele nga si̱kjaʼaitsjenjinkaoni jmeni xi tibʼexkiai. Je Biblia itso: “Tjínnele nga ntsjaintsjai kʼoéxkiai [...] kʼoa si̱kjaʼaitsjenjin jmeni xi tso” (Josué 1:8). Kʼianga kʼoéxkiai tikjaʼaitsjenjin jebi: “Jméni xi bakóyana tʼatsʼe Jeobá versículo jebi. Jósʼin sitjosoan jmeni xi tso. Jósʼin sichjén texto jebi nga koasenkoa xi kjaʼaí”.

3. Kʼiáni koa̱n kʼoéxkiai je Biblia

A sakʼoa tsín maʼali nga bʼexkiai je Biblia. Sakʼoa kʼoama. Tonga je Biblia itso: “Ali nichxinjin nichalao yaono”, xi tsonile nga tjínnele nda si̱chjén je nichxinná (Efesios 5:16). Koaan chjoéjin jóchon kʼoéxkiai je Biblia nga nyaon nyaon. Tjínkʼa xi kʼia bʼéxkiaa nga tanjio. Tjínkʼa xi kʼia bʼéxkia nga batiokjáya ngotjo, jolani nga kjen kʼoa tjínkʼa xi kʼia bʼéxkia nga jemanjio nga toje sikjáya. Jósingái ji, kʼiáni koa̱n kʼoéxkiai je Biblia.

KATAʼYASAI JME XI TÍNCHJA̱NI

Kataʼyala jmé xi koa̱n sʼiaan nga tsjoacha koaan nga kʼoéxkiaa je Biblia. I̱ kjoaʼmiya jebi kui jchaa jósʼiaan nga tongini kuiyondaa nga ñandia ñandia kʼuínyaná. Kʼoa jósʼiaan nga koasenkaoná jmeni xi sa̱kóyaná.

Tojo ma nga tobijbi matsjoachaa je tsojmi xi chinee, kʼoati ma nga bʼexkiaa je Biblia tobijbi matsjoachaa

4. Jósʼiain nga tsjoacha koai̱n kʼianga kʼoéxkiai je Biblia

Alikui choa ñʼai maná nga tokʼia bʼexkia títjoán je Biblia. Tojo ma nga tokʼia chine títjoán tsojmi xi tsín ʼyaa, tobijbi nda chinená nga jefi nichxin. Kʼoakjoán tima xi kao Biblia, tobijbi matsjoachaa nga bʼexkiaa. Tʼexkiao 1 Pedro 2:2 kʼoa cho̱bayaño jebi:

Jósingái ji, tsa nyaon nyaon kʼoéxkiai je Biblia, a chaan koa̱ntsjoachai kʼoa a chaan koa̱nmeli nga ngisa tse kʼoéxkiai.

Chótsenlao VIDEO kʼoa kataʼyao jokisʼin kʼa xti nga ngisa koantsjoake nga tsakʼéxkia je Biblia. Xijekoa̱n, cho̱bayaño jebi:

VIDEO: Xti xi tsjoake kjima nga tjíobʼéxkia je Énle Niná (5:33)

Jméni xi ñʼai koanle nga tokʼia tsakʼéxkia Biblia je xti xi faʼa ya video.
Jméni xi tsakinyakao nga ntsjaintsjai tsakʼéxkia je Biblia.
Jméni xi kisʼin nga ngisa tsjoake koan nga tsakʼéxkia je Biblia.

Jokoa̱n sʼiain nga kʼoéxkiai:

Kui tʼexkiai Biblia xi ndasʼin jaʼatoya kʼoa xi nda koa̱njinli. Kui Traducción del Nuevo Mundo tʼexkiai tsa majinli kastía.
Kui títjon tʼexkiai je librole Biblia xi ngisa tsjoachai. Koa̱nsjaisali jokoa̱n sʼiain jñani i̱ tso “Josʼin koa̱n kʼoéxkiai je Biblia”.
Tʼetʼaxuin jñani kʼoéxkiai nga ñandia ñandia. Tichjain jñani tso “Jña jekichokoa nga tibʼexkia Biblia”, xi faʼaitʼa xo̱n jebi.
Tichjain JW Library^®. Tsa ya teléfonoli kʼoa tsa ya tabletali chʼa̱jain aplicación jebi, koaan kʼoéxkiai kʼoa koaan kuinóʼyalai je Biblia tojñani.
Tichjain jmesani xi faʼaitʼa ya Traducción del Nuevo Mundo. Faʼaitʼa mapa, tabla kao glosario xi koasenkaoli nga ngisa koa̱nmeli kʼoéxkiai je Biblia.

5. Tongini tijnandai nga ñandia ñandia sa̱kóyali

Tʼexkiao Salmo 119:34 kʼoa cho̱bayaño jebi:

Ánni machjénsíni nga kʼoétsʼoai tongini nga kje bʼexkiajin je Bibliali kʼoa nga kuijnandalai jme xi sa̱kóyali.

Jókoa̱n sʼiain nga koasenkaoli jmeni xi tíʼmiyali. Kʼianga ñandia ñandia chótʼayai nga jngó jngó kjoaʼmiya xi sa̱kóyali, koaan i̱ sʼiain:

Tʼexkiai ngayeje párrafo xi faʼaitʼa jña fitsʼiani nga jngó jngó kjoaʼmiya.
Tjasjai kʼoa tʼexkiai texto xi faʼaitʼa kʼoa tingósonkoai jmeni xi tichotʼayai.
Tjandiaangilai je én xi ngisa tínchja̱ni je kjoachjonangi xi faʼaitʼa, kui xi koasenkaoli kʼianga jechótʼayai kao je xi títsoyali.

A ʼyaní

Jin xi testigole Jeobá maijin nkjín Biblia kinichjainjin, tonga ndʼai kui je Traducción del Nuevo Mundo nichjainjin, nga̱ ngisaa ndasʼin jaʼatoya kʼoa ngisaa majinná jotso kʼoa faʼaitʼa je jaʼaínle Niná (chótʼai artículo xi faʼaitʼa ya Internet ya jw.org, jñani tso: “A tsen kijnale je testigole Jeobá je Biblia xi tsʼe”).

TJÍNKʼA XI I̱ TSO: “Ñʼai mana kʼianga Biblia kotʼaya. Alikui tsona kʼoa alikui maʼana”.

Jósingái ji.

XI KACHOTʼAYÁ

Nga koasenkaoli jmeni xi tso je Biblia, jngo hora chjoéjin jochon nga kʼoéxkiai, tʼetsʼoalai Niná nga katabasenkaoli nga koa̱njinli jmeni xi kʼoéxkiai kʼoa tijnandai nga ñandia ñandia sa̱kóyali.