KJOAʼMIYA 15

ʼYáni je Jesus

TINÓʼYALAI NGA ÉN

ʼYáni je Jesus

Jé Jesús xi ngisasa nʼio ʼyale i̱ Sonʼnde. Nʼio nkjín chjota xi be je jaʼaínle tonga alikui be ʼyákjoánni kʼoa kjaʼaí kjaʼaí tso xi tʼatsʼe Jesús. Jótso Biblia xi tʼatsʼe Jesús.

1. ʼYáni je Jesús

Je Jesús yaa ngʼajmi tíjna, espírituní kʼoa tsee nganʼio tjínle. Jé Jesús títjon kisinda je Jeobá tikʼoajinni tojmeni xi tjín. Kuinga kʼoatsoni Biblia nga “je xi tíjnatítjonle ngayije xi kisʼenda” (Colosenses 1:15). Jé Jesús “je xi tojngo ʼndíle” Niná ʼmile nga̱ tojé xi jesoa Jeobá kisinda (Juan 3:16). Je Jesús yaa kisixákao je Nʼaile kʼoa jé tsakasenkao nga kisinda ngayeje jmeni xi tjín (tʼexkiai Proverbios 8:30). Je Jeobá kao Jesús nʼio tsjoake xínkjín. Je Jesús én ʼmile, kui kʼoaʼminile nga je síkʼatoya je énle Nʼaile (Juan 1:14).

2. Jmé xá jaʼaini Jesús i̱ Sonʼnde

Jela 2,000 nó tjínle nga jngo kjoaxkón tsakʼéjna je Jeobá. Kui je nganʼiotsjele kisichjén nga ya tsʼoa̱ María kisikʼéjnaya je kjoabijnachonle Jesús. Kʼoa kʼoakoanni nga jo chjota sʼin kitsinni je Jesús (tʼexkiai Lucas 1:34, 35). Je Jesús kui xá jaʼaini i̱ Sonʼnde nga Mesías kʼoa nga Cristo koa̱n kʼoa nga kʼoasjentjai je chjota sonʼnde. a Jé kisitjoson ngayeje je én xi tongini kinokjoa tʼatsʼe Mesías. Kuinga tsabeni je chjota nga je xi Cristo ma, je “ʼndíle Niná xi tíjnakon” (Mateo 16:16).

3. Jñáni tíjna Jesús ndʼaibi

Je Jesús kinikʼien tonga jaʼáyanile, espíritu koan kʼoa ki ijngokʼani ya ngʼajmi. Kʼianga kicho ya ngʼajmi je Niná “tsʼasjejeya Cristo” (Filipenses 2:9). Ndʼaibi xángʼa tjínle je Jesús, tojé Jeobá xi ngisa tse nganʼio tjínle tikʼoajinni je Jesús.

KATAʼYASAI JME XI TÍNCHJA̱NI

Kataʼyalasa ʼyákjoanni je Jesús kʼoa ánni machjénsíni nga jchaa xi tʼatsʼe.

4. Ali tsa jejin Jesús je Niná xi nʼio tse nganʼio tjínle

Je Biblia kʼoatso nga je Jesús yaa ngʼajmi tíjna, espírituní kʼoa tsee nganʼio tjínle, tonga sítjosonle je Jeobá xi Ninále ma kʼoa xi Nʼaile ma. Ánni kʼoabixónsíñá. Chótsenlao VIDEO ánni koa̱njinsínino jmeni xi tso Biblia nga tsín mangóson je Jesús kao je Niná xi nʼio tse nganʼio tjínle.

VIDEO: A Niná je Jesús (3:22)

Je texto xi faʼaitʼa i̱bi basenkaoná nga majinná nga tsín mangóson je Jeobá kao Jesús. Tʼexkiao nga jngó jngó texto kʼoa cho̱bayaño jebi:

Tʼexkiao Lucas 1:30-32.

Jókitso je ánkje, ʼyá manile Jesús je Niná xi nʼio ngʼa tíjna.

Tʼexkiao Mateo 3:16, 17.

Jókitso je jta̱ xi kinoʼyale ya ngʼajmi kʼianga jekisʼenngindá je Jesús.
Jósingái ji ʼyá tsʼe jta̱ xi kinoʼyale.

Tʼexkiao Juan 14:28.

ʼYáni xi ngisa jchínga kʼoa xi ngisa batéxoma a je xi nʼai ma axo je xi ti ma.
Je Jesús kʼoakitso nga Nʼaile ma je Niná, jméni xi tsoyaná jebi.

Tʼexkiao Juan 12:49.

A kʼoakitso je Jesús nga tijeni xi Nʼai ma. Jósingái ji.

5. Je Jesús tsakakó nga je xi Mesías ma

Ya Biblia nkjín én xi tongini kinokjoa faʼaitʼa xi tsakasenkao je chjota nga tsabe ʼyani xi Mesías koa̱n, xi kʼoasjentjai je chjota. Chótsenlao VIDEO xi faʼaitʼa josʼin kitjoson je én xi tongini kinokjoa xi tʼatsʼe Jesús.

VIDEO: Josʼin kitjoson én xi tongini kinokjoa tʼatsʼe Jesús (3:03)

Tʼexkiao je én xi tongini kinokjoa xi faʼaitʼa ya Biblia kʼoa cho̱bayaño jebi:

Tʼexkiao Miqueas 5:2 jñani kʼoatso jñani jtsín je Mesías. b

A kitjoson én jebi kʼianga kitsin je Jesús (Mateo 2:1).

Tʼexkiao Salmo 34:20 kao Zacarías 12:10 jñani kʼoatso joni̱kao nga ni̱kʼien je Mesías.

A kitjoson én jebi (Juan 19:33-37).
Jósingái ji, a jé Jesús xokisʼin nga kʼoasʼin kitjoson je én xi tongini kinokjoa.
Jmé xi tsoyali jebi xi tʼatsʼe Jesús.

6. Nga ʼyaa xi tʼatsʼe Jesús basenkaoná

Je Biblia kʼoatso jokji chjíle nga jchaa xi tʼatsʼe Jesús kʼoa jme xá xi kitsjoale je Niná. Tʼexkiao Juan 14:6 kao 17:3 kʼoa cho̱bayaño jebi:

Ánni nga nʼio machjénsíni nga jchaa xi tʼatsʼe Jesús.

Je Jesús jéní je ndiaa nga̱ tsakakóyaná jokoa̱n sʼiaan kʼianga miyole Niná koaan. Jéní xi kjoakixi nga̱ kitsoyaná jokjoantjínni xi tʼatsʼe Jeobá. Kʼoa jéní je xi kjoabijnachon nga̱ totʼatsʼee nga koa̱n kuiyoaa ngantsjai nichxin

TJÍNKʼA XI I̱ TSO: “Je testigole Jeobá alikui makjainle xi tʼatsʼe Jesús”.