KJOAʼMIYA 16

Jmé xi kisʼin je Jesús nga tsakʼejna i̱ Sonʼnde

TINÓʼYALAI NGA ÉN

Kʼianga nrʼoé je chjota tʼatsʼe Jesús sakʼoa tokui fiya jko̱ nga sʼa ʼndílee, kʼoa tjínkʼa xi kui fiya jko̱ jngo profeta xi chjine koan kʼoa tsa maije̱ kui fiya jko̱ jngo chjota xi tojeme mʼe. Tonga ngisaa nda jchaxkoaan je Jesús tsa jchaa jmeni xi kisʼin kʼianga tsakʼejna i̱ Sonʼnde. I̱ kjoaʼmiya jebi kui chótʼayajiaan jme xi kisʼin je Jesús kʼoa jósʼin koasenkaoná.

1. Jmé xá xi ngisa tjínle kjoandosin kisʼin je Jesús

Je xá xi ngisa kisʼin je Jesús kuinga kitsoyason, i kitso: “Machjén nga kuinchjaya je énnda xi tʼatsʼe kjoatéxomale Niná” (tʼexkiai Lucas 4:43). Kui kitsoyason nga jngo chjotaxá koasennda je Niná, kʼoa nga je chjotaxá jebi kʼoendajin je kjoa xi tjín i̱ Sonʼnde. a Jan nó basen nga ñaki tokui xá kisʼin je Jesús nga kʼoasʼin kitsoyason (Mateo 9:35).

2. Jmé xi tsakakó je kjoaxkón xi tsakatío je Jesús

Je Biblia kʼoatso nga je Niná jé Jesús kisichjén kʼianga tsakakó “nganʼiole, kao kjoaxkón, kao choa̱” (Hechos 2:22). Nga nganʼiole Niná kisichjén je Jesús koan kisikʼéjnajyo je jtsínʼio, koan nga jmi chjota kisikjen, koan kisindaya je xi tjíomʼe kʼoa saʼnda kisikjaʼáya kʼale je chjota xi jekʼien (Mateo 8:23-27; 14:15-21; Marcos 6:56; Lucas 7:11-17). Je kjoaxkón xi tsakatío je Jesús kui tsakakó nga je Niná kisikasén. Kʼoa kʼoati kui tsakakó nga toje Jeobá xi koa̱nle kjoaʼaxin ngayeje je kjoa xi tjín i̱ Sonʼnde.

3. Jmé xi bakóyaná josʼin kikao yaole je Jesús

Je Jesús kisitjosonle ngantsjai je Jeobá (tʼexkiai Juan 8:29). Kixi koan saʼnda nga kinikʼien kʼoa kʼoakisʼin jmeni xi kitsole je Nʼaile ninga nkjín koan je chjota xi tsakatiochjoale. Tsakakó nga koa̱n kixi kjuintʼalee je Niná ninga nʼio tse kjoa kuitjátojiaan. Je Jesús “tsakʼéjnachoyaná ndiaa xi tsʼe”, jméni nga kʼoatisʼin kuimasíñá “josʼin tsakʼamje nga je” (1 Pedro 2:21).

KATAʼYASAI JME XI TÍNCHJA̱NI

Kataʼyala jmé xi kisʼin je Jesús nga kitsoyason kʼoa nga tsakatío je kjoaxkón.

4. Je Jesús kitsoyason je énnda xi tʼatsʼe Niná

Je Jesús kjin tsakʼamjeni ndso̱ko̱ nga kitsoyale je énnda xi tʼatsʼe Niná tojokji chjotani. Tʼexkiao Lucas 8:1 kʼoa cho̱bayaño jebi:

A tojé kitsoyale Jesús je chjota xi ya kichonrʼoe.
Jókji kjoama̱ tsakʼéngi je Jesús nga kitsoyasonle je chjota.

Je Niná tongini kʼoakitso nga énnda kuitsoyason je Mesías. Tʼexkiao Isaías 61:1, 2 kʼoa cho̱bayaño jebi:

Jósʼin kisitjoson én jebi je Jesús.
Jósingái ji, a kʼoati machjénle je chjota xi tjín ndʼaibi nga kjuinrʼoé én jebi.

5. Nʼio chjíle jmeni xi tsakakóya je Jesús

Ninga kui kitsoya je Jesús je énnda xi tʼatsʼe Niná, kʼoati kitsjoa je kjoafaʼaitsjen xi basenkaoná. Kataʼyala kʼa jmeni xi kitsoya ya jngo sonnindo. Tʼexkiao Mateo 6:14, 34 kao 7:12 kʼoa cho̱bayaño jebi:

Jmé kjoafaʼaitsjen xi kitsjoa je Jesús.
Jósingái ji, a koasenkao kjoafaʼaitsjen jebi je chjota xi tjín ndʼaibi.

6. Je Jesús tsakatío kjoaxkón

Je Jeobá kitsjoale nganʼio je Jesús nga tsakatío je kjoaxkón. Jngola choa̱ kataʼyaa. Tʼexkiao Marcos 5:25-34 kʼoa tsa maije̱ chótsenlao VIDEO. Xijekoa̱n, cho̱bayaño jebi:

VIDEO: Josʼin koanndaya jngo chjoón xi tímʼe (5:10)

Tojosʼin kaʼyaa ya video, jmé xi tsín jao tsakʼé kon je chjoón xi tímʼe.
Jméni xi ngisa kasasénli tʼatsʼe kjoaxkón jebi.

Tʼexkiao Juan 5:36 kʼoa cho̱bayaño jebi:

Jmé xi bakó je kjoaxkón xi tsakatío je Jesús.

A ʼyaní

Ngayeje jmeni xi ʼyaa xi tʼatsʼe Jesús yaa faʼaitʼa nga ño Evangelio. Evangelio jebi jé kiski Mateo, Marcos, Lucas kao Juan, kʼoa nga nijngotʼalee xínkjín nga jngó jngó jmeni xi kiski chjota jebi, ngisaa nda ʼyaa je Jesús.

MATEO

jé kiski xi títjon Evangelio. Jmeni xi kiski kui ngisa tsoya jmeni xi tsakakóya je Jesús, jolani xi tʼatsʼe Chjotaxále Niná.
MARCOS

jé kiski je Evangelio xi ngisa ʼndí kji. Kʼoa tokʼoamaná jmeni xi bʼéyanajmí xi tʼatsʼe Jesús.
LUCAS

kui tsoya nga chjí tsabe je Jesús nga tsakʼétsʼoa kʼoa nga chjí tsabekon je yánchjín.
JUAN

kui kʼoatso jmeni xi tsakjákaoni je Jesús je miyole kʼoa kao chjota xi kjaʼaí, kʼoa jebi kui tsoyaná jokoankjoan je Jesús.