KJOAʼMIYA 17

Jókjoan je Jesús

TINÓʼYALAI NGA ÉN

Jókjoan je Jesús

Kʼianga ʼyaa jmeni xi kisʼin, jmeni xi kitso kʼoa jokoankjoan je Jesús nga tsakʼejna i̱ Sonʼnde, ngisaa mamiyoaa je kʼoa kao je Jeobá. Kataʼyala kʼa jókoankjoan je Jesús kʼoa jméni xi tjínnele sʼiaan nga kʼoati koa̱nkjoaan tsanda ñá.

1. Jósʼin mangóson Jesús je Nʼaile

Je Jesús jemillón nó tjínle nga ya tíjnakao Nʼaile ya ngʼajmi, tíbe jokjoan kʼoa kʼoati kjoan tsanda je. Kuinga kʼoatisʼin síkjaʼaitsjenni, nga kʼoati tjínni kon kʼoa nga kʼoati sʼínni josʼín je Jeobá (tʼexkiai Juan 5:19). Je Jesús kʼoakjoán tikjoan jokjoan je Nʼaile, kʼoa i kitso: “Je xi tsabena nga an, tsabe Nʼainá” (Juan 14:9). Tsa jchasaa jokjoan je Jesús kʼoati jchasaa jokjoan je Jeobá. Tobʼelañá, nga koanmake Jesús je chjota, kui bakó nga mandosinle Jeobá xi tʼatsi.

2. Jósʼin tsakakó je Jesús nga tsjoake je Nʼaile

Je Jesús i kitso: “Kʼoasʼin sʼian josʼin nga Nʼainá kitsjoana kjoatéxoma, jméni nga kʼoasʼin katabeni sonʼndebi nga tsjoake̱ Nʼainá” (Juan 14:31). Kʼianga tsakʼejna Jesús i̱ Sonʼnde, tsakakó jokji tsjoake je Nʼaile kʼoa kisitjosonle ninga kʼianga ñʼai tjín kjoa jaʼatojin. Xi ijngosani, je Jesús nʼio tsjoake koan nga kui kinchja̱ni xi tʼatsʼe Nʼaile kʼoa tsakasenkao je chjota nga miyole Niná koan (Juan 14:23).

3. Jósʼin tíbakó je Jesús nga tsjoake je chjota

Je Biblia kʼoatso nga je Jesús nʼio tsjoake “koan je chjota sonʼnde” (Proverbios 8:31). Tsakakó nga tsjoake je chjota kʼianga kisinʼiojin kʼoa nga tsakasenkao kʼoa alikui kui kiskoyale nga kʼoati koa̱ntʼainngajaoni tsanda je. Kʼianga tsakatío kjoaxkón je Jesús, ali tsa tokuijin tsakakó je nganʼio xi tjínle, kʼoati kui tsakakó nga koanmake je chjota (Marcos 1:40-42). Nʼio ndʼé koan kʼoa alikui ʼya chjota tsakjaʼájin. Je chjota xi kinrʼoéle nda kisatio kon kʼoa kisʼele kjoachoya. Nga tsjoakená je Jesús ngatsʼiaa, tsakjaʼántjainá je kjoañʼai kʼoa kinikʼien xi totʼatsaan. Tonga ngisaa tsjoake je chjota xi sítjoson jmeni xi kitsoya (tʼexkiai Juan 15:13, 14).

KATAʼYASAI JME XI TÍNCHJA̱NI

Kataʼyalasa jokjoan je Jesús kʼoa jósʼin chjénngiaa je kjoatsjoacha xi tsakakó kʼoa nga nʼio kitjotʼa.

4. Je Jesús tsjoake je Nʼaile

Jmeni xi kisʼin je Jesús jngo choa̱ tsakʼéjnaná josʼin koakolee Niná nga tsjoachaa. Tʼexkiao Lucas 6:12; Juan 15:10 kao 17:26. Kʼianga jekʼoéxkiao nga jngó jngó texto, cho̱bayaño jebi:

Tojo kisʼin je Jesús, jósʼin koakolee je Jeobá nga tsjoachaa.

Nga jaʼai i̱ Sonʼnde, je Jesús tsakakó nga tsjoake je Nʼaile kʼoa kjitʼaa tsakʼétsʼoale

5. Je Jesús mandosinle je xi nganʼio machjénle

Je Jesús ngisaa koanndosinle je xi kjaʼaí tikʼoajinni yaole. Tsakʼasjeʼa nichxinle kʼoa tsakasenkao xi kjaʼaí ninga jenʼio aonyale. Tʼexkiao Marcos 6:30-44 kʼoa cho̱bayaño jebi:

Tojo tso texto jebi, jósʼin tsakakó je Jesús nga koanndosinle xi kjaʼaí (chótsenlao versículo 31, 34, 41 kao 42).
Ánni tsakasenkaoni Jesús chjota jebi (chótsenlao versículo 34).
Nga kui bakó je Jesús jokjoan je Nʼaile, jméni xi bakóyali jebi tʼatsʼe Jeobá.
Jósʼin koakoá nga mandosinná xi kjaʼaí tojo kisʼin je Jesús.

6. Je Jesús nʼio kitjotʼa

Je Jesús kitjotʼaa jmeni xi kisʼele ninga tsín nʼio nkjín tsojmi kisʼele kʼoa kui xi mele nga kʼoati sʼiaan tsanda ñá. Tʼexkiao Hechos 20:35 kʼoa cho̱bayaño jebi:

Tojo kitso je Jesús, jméni xi tsjoa bʼé je tokoán.

Chótsenlao VIDEO kʼoa cho̱bayaño jebi:

VIDEO: Tongisaa ndani nga kʼoee kaoni tsa nga chjoé (video xi tochoa tíjna) (4:00)

Jméni xi koa̱n kʼoee ninga tsín nanda tsojmi tjínná.

A ʼyaní

Je Biblia kʼoatso nga kao jaʼaínle Jesús si̱jénilee je Jeobá jme xi ʼmilee kʼianga bʼetsʼoalee (tʼexkiai Juan 16:23, 24). Tsa kʼoasʼiaan kʼoasʼin koakoñá nga chjí ʼyaa jmeni xi kisʼin je Jesús nga koa̱n miyole Jeobá koaan.

TJÍNKʼA XI I̱ TSO: “Likuila mandosinle Niná nga kjoañʼai chjaʼá”.

Nga kʼoati kjoan je Jesús jokjoan je Nʼaile, jósʼin bakó jmeni xi kisʼin nga mandosinle Jeobá xi tʼatsaan.

XI KACHOTʼAYÁ

Je Jesús tsjoake je Jeobá kʼoa kʼoati tsjoake je chjota. Je Jesús kʼoati kjoan jokoan je Nʼaile. Nga jchasai xi tʼatsʼe Jesús ngisaa nda jchai jokjoan je Jeobá.