Je Jesús kʼoakitso nga tjínnele koanngínsʼenngindá tsa mená nga chjotale koaan (tʼexkiai Mateo 28:19, 20, TNM). Jmé xi tsoyanile nga mangínsʼenngindá. Kʼoa jméni xi tjínnele sʼin je xi mele koaisʼenngindá.

1. Jósʼin mangínsʼenngindá

Je Jesús yaa xo̱ngá Jordán kisʼenngindá kʼoa xijekoan jitjokajinni nandá (Marcos 1:9, 10, TNM). Kʼoati sʼín je xi ñaki chjotale Cristo ma. Kʼianga fisʼenngindá ñaki chanisʼenngindá ngakjijngo yaole.

2. Jmé xi bakó je chjota kʼianga fisʼenngindá

Kui bakó nga jekatsjoátʼale yaole je Jeobá. Jmé xi sʼín kʼianga tsjoátʼale yaole je Jeobá. Jngo kjoabʼetsʼoa bʼéjnale je Niná jñani kʼoatsole nga ñaki toje sixále tokʼia saʼndani. Kʼoa kʼiaa kʼoasʼín nga kjesa fisʼenngindájin. Kʼianga bʼétsʼoale Jeobá kʼoatsole nga ñaki toje skoe̱xkón kʼoa nga tokui kʼoasʼin josʼin mele Jeobá. Kui jefitjenngi choa̱le Jesús kʼoa sítjoson jmeni xi kitsoya. Je Jesús i kitso: “Toʼyanibe xi mele nga chjotana koa̱n, katatsjionkon yaole [...] kʼoa nda katafitʼana” (Mateo 16:24). Kʼianga jetsjoátʼale yaole Niná kʼoa nga jefisʼenngindá, ngisaa mamiyo je Niná kʼoa kao chjota xi bexkón.

3. Jméni xi tjínnele sʼin je xi mele koaisʼenngindá

Kʼiatsa meli kʼuínsʼenngindái títjonkjoanla machjén nga kataʼyai xi tʼatsʼe Jeobá kʼoa nga katasʼeli kjoamakjain (tʼexkiai Hebreos 11:6). Nga ngisasa koa̱njinli kʼoa sʼe̱li kjoamakjain ngisaa tsjoacha koai̱n je Jeobá. Tikui koasenkaonili nga koa̱nmeli kʼuínyasuin kʼoa nga koa̱nmeli si̱tjosuin jotso je kjoatéxomale (2 Timoteo 4:2; 1 Juan 5:3). Kʼianga jngo chjota xi jekʼoasʼin fikao yaole josʼin bakinle nga sijchá yaole je chjotale Nainá jekoa̱n tsjoátʼale yaole Niná kʼoa jekoa̱n koaisʼenngindá (Colosenses 1:9, 10). a

 KATAʼYASAI JME XI TÍNCHJA̱NI

4. Jméni xi bakóyaná nga kisʼenngindá je Jesús

Kataʼyala josʼin kisʼenngindá je Jesús. Tʼexkiao Mateo 3:​13-​17, TNM kʼoa cho̱bayaño jebi:

• A sʼaa ʼndílee nga kisʼenngindá je Jesús.

• A toyaa jko̱ kisʼejtenson choa je nandá. Jókinikao nga kisʼenngindá.

Kʼianga jekisʼenngindá je Jesús, kʼiaa tsakʼétsʼiakao je xá xi tsakánele je Niná. Tʼexkiao Lucas 3:​21-​23 TNM kao Juan 6:​38 kʼoa cho̱bayaño jebi:

• Kʼianga jekisʼenngindá je Jesús, jmé xá xi ngisa kitsjoale kjoandosin.

5. Koaan kʼuínsʼenngindái tsa ji xi meli

Tsakui nichxin likui tso tokuin nga kʼoaitʼalai yaoli je Niná kʼoa nga kʼuínsʼenngindái. Tonga tsa ngisa nda jchaxkuin je Jeobá ngisaa tsjoacha koai̱n kʼoa kui xi koasenkaoli nga koa̱nmenili kʼuínsʼenngindái. Nga jcha kʼai je chjota xi kʼoakisʼin, chótsenlao VIDEO.

Tʼexkiao Juan 17:3 kao Santiago 1:5 kʼoa cho̱bayaño jebi:

• Jméni xi koasenkao jngo chjota nga koa̱nmenile koaisʼenngindá.

1. Kʼianga bʼaitʼalee yaoná je Jeobá, kʼiaa nga kʼoaʼmilee nga ñaki toje si̱xálee tokʼia saʼndani

2. Nga mangínsʼenngindá kʼoasʼin bakonilee ngatsʼi nga jetsakʼaitʼalee yaoná je Niná

 6. Kʼianga mangínsʼenngindá yaa tojngo maa je naxinandále Jeobá

Kʼianga jekamangínsʼenngindá yaa tojngo maa ngatsʼi xi ya tjíojin je naxinandále Niná. Tojñani tsaan kʼoa tojñani kitjenñá, ngatsʼiaa xi testigole Jeobá maa, tongóson sʼin makjainná kʼoa tongóson sʼin mangíntjenngiaa je kjoatéxoma xi faʼaitʼa Biblia. Tʼexkiao Salmo 25:14 kao 1 Pedro 2:​17 kʼoa cho̱bayaño jebi:

• Kʼianga jekamangínsʼenngindá jósʼin biyoaa kao Jeobá kʼoa kao je chjota xi kʼoati je bexkón.

 XI KACHOTʼAYÁ

Je Jesús kʼoakitso nga machjén nga koanngínsʼenngindá nga chjotale koaan. Kʼoa nga koa̱n koanngínsʼenngindá machjén nga koa̱nkjainná xi tʼatsʼe Jeobá, nga si̱tjosoán je kjoatéxomale kʼoa nga kʼoaitʼalee yaoná.

Jmé xi kamajinli

• Jósʼin mangínsʼenngindá kʼoa ánni nga nʼio chjínile nga kʼoasʼiaan.

• Ánni nga nʼio chjínile nga bʼaitʼalee yaoná je Jeobá kʼoa nga mangínsʼenngindá.

• Jméni xi tjínnele sʼin jngo chjota nga kjesa tsjoátʼajinle yaole je Jeobá kʼoa nga kjesa fisʼenngindájin.