Kʼiatsa sa jekʼien jngo xíngi tsakui nichxin i̱ kisi: “Jméni xi maná kʼianga jebiyaa. A skoe ijngokʼa je xíngia xi jekʼien”. I̱ kjoaʼmiya jebi kʼoa kao xi ijngo kui jchaa jmeni xi bakóya je Biblia.

1. Jméni xi maná kʼianga jebiyaa

Je Jesús kʼoasʼin kisingósonkao je kjoabiya tojo ma kʼianga nʼio sʼefé. Jngo chjota xi nʼio tjain nijñá bajna, alikui be tsa jme xi kjima. Kʼoati ma kʼianga biyaa. Kʼianga jemʼe jngo chjota alikui titsen manile kʼoa alikui tikjoañʼai faʼáni. Je Biblia kʼoatso nga “je xi jekʼien nijmejin xi tibeni” (tʼexkiai Eclesiastés 9:5).

2. Jósʼin basenkaoná nga ʼyaa joma kʼianga jebiyaa

Nkjín chjota xi tsokjónle kjoabiya kʼoa xi tsokjónle je kʼien. Tonga nga ʼyaa jmeni xi tso Biblia tʼatsʼe kjoabiya nda bʼé tokoán. Je Jesús i kitso: “Je xi kjoakixi sikatíondaíno” (Juan 8:​32). Je Biblia alikui kʼoatso jotso kʼa je religión nga batiokon je ni̱ma̱le chjota nga jebiya. Alikui ʼya xi kjoañʼai faʼá kʼianga jemʼe. Je xi jekʼien alikui tijme xi beni kʼoa alikui koa̱nle nga tjín xi sikaoná. Kuinga tsín machjénni nga kjoachikon kʼoéxkiatʼeen, nga kʼoéchjoaʼaa kʼoa tsa kʼoétsʼoalee.

Tjínkʼa xi kʼoatso nga male fákao kʼien, tonga alikui kʼoatjín. Tojo sʼin kaʼyaa, je xi jekʼien “nijmejin xi tibeni”. Je xi kʼoatso nga fákao ʼndíkʼienle, jé sénnichxin xi chʼao kjoan fákao nga̱ jé xi kui síkʼóya yaole. Nga ʼyaa jokjoantjínni xi tʼatsʼe kjoabiya alikui tije sénnichxin xi chʼao kjoan bʼanachaniná. Je Jeobá kʼoatsoná nga tsín kʼien chja̱koaa, nga̱ be nga xkón tíjna tsa je sénnichxin xi chʼao kjoan chja̱koaa (tʼexkiai Deuteronomio 18:​10-​12).

3. Jmeni xi ma kʼianga jebiyaa

Kjaʼaí kjaʼaísʼin makjainle chjota joma kʼianga jebiyaa. Tonga alikui kʼoatjín ngayeje josʼin makjainle.

• Jósʼin makjainle je chjota ya ʼndeli.

 4. Nga ʼyaa jokjoantjínni xi tʼatsʼe kjoabiya alikui tinokjonñá

Nga ʼyaa jokjoantjínni xi tʼatsʼe kjoabiya, alikui tinokjonnilee xi jekʼien. Tʼexkiao Eclesiastés 9:​10 kʼoa cho̱bayaño jebi:

• A koaanle josikaoná je kʼien.

Nga jeʼyaa jmeni xi tso je Biblia alikui tikʼoasʼin makjainniná nga tjínnele kʼoéchjoaʼaa kʼoa tsa kʼoétsʼoalee je ʼndíkʼien. Tʼexkiao Isaías 8:​19 kao Apocalipsis 4:​11 kʼoa cho̱bayaño jebi:

• Jósingái ji, jósʼe kon je Jeobá kʼianga kʼien bʼétsʼoale je chjota kʼoa kʼianga nganʼio síjéle je kʼien.

5. Nga ʼyaa jokjoantjínni xi tʼatsʼe kjoabiya nda sʼe tokoán

Nkjín chjota xi kʼoasʼin ʼmiyale nga kjoañʼai kjoaʼa kʼianga jekuiyá kʼiatsa chʼao kasʼín. Tonga nda sʼe tokoán nga ʼyaa nga liʼya xi kjoañʼai faʼá kʼianga jebiya, nijejinla chjota xi nʼio chʼao kisʼin. Tʼexkiao Romanos 6:7 kʼoa cho̱bayaño jebi:

• Je Biblia kʼoatso nga kʼianga jemʼe jngo chjota, jekachatʼa je jéele. Nga kʼoatso én jebi, a koaan kʼoakuixoán nga kjoañʼai tjíofaʼá xi totʼatsʼe jée xi tsakajngi.

Kʼianga ngisasa ʼyaa jokjoan je Jeobá, majinná nga tsín jokjini nga kjoañʼai sikjaʼá xi jekʼien. Tʼexkiao Deuteronomio 32:4 kao 1 Juan 4:8 kʼoa cho̱bayaño jebi:

• Jngo Niná xi kʼoakjoan jotso texto jebi, a tsjoáʼnde nga kjoañʼai kjoaʼa je xi jekʼien.

• Jósingái ji, a nda bʼé tokoán nga ʼyaa jokjoantjínni xi tʼatsʼe kjoabiya. Ánni.

 XI KACHOTʼAYÁ

Kʼianga mʼe jngo chjota, alikui tijme xi beni. Je xi jekʼien alikui kjoañʼai tjíofaʼá kʼoa alikui josikaoná.

Jmé xi kamajinli

• Jmé xi maná kʼianga jebiyaa.

• Jméni xi tsín timakjainniná nga jeʼyaa jokjoantjínni xi tʼatsʼe kjoabiya.

• Ánni nga nda sʼeni tokoán nga jeʼyaa jokjoantjínni xi tʼatsʼe kjoabiya.