Ngayeje Biblia kui tínchja̱ni tʼatsʼe Reino de Dios. Kʼoa kui Reino jebi sichjén je Jeobá nga sindachon je sonʼnde. Jméni xi Reino ʼmi, jósʼin ʼyañá nga jetíbatéxoma. Jméni xi jetísʼín ndʼaibi kʼoa jméni xi sʼin nichxin xi sʼa nroa. I kjoaʼmiya jebi kuitsoya kʼoa kao kjoaʼmiya xi ngi jao xi sʼa chótʼayá.

1. Jméni xi Reino de Dios ʼmi kʼoa ʼyáni xi Rey sʼin tíjna

Je xi Reino de Dios ʼmi jngoo chjotaxá xi je Jeobá tsakasénnda. Je xi Rey sʼin tíjnale jé Jesucristo kʼoa yaa tjen ngʼajmi koatexomani (Mateo 4:​17; Juan 18:​36). Je Biblia kʼoatso nga je Jesús “jé koatexoma ntsjaile chjota [...]. Kʼoa je kjoatéxomale likui kjoetʼa” (Lucas 1:​32, 33). Nga je Jesús xi Rey sʼin tíjnale Chjotaxále Niná, jé koatexomale ngatsʼi chjota.

2. ʼYáni xi koatexomakao Jesús

Je Jesús ali tsa tojejin koatexoma. Jé koatexomakao je chjota xi ya kitjoejinni “ngayije ntje̱, ngayije én, ngayije naxinandá, ngayije ʼnde” (Apocalipsis 5:​9, 10). Jótjín mani xi ya koatexomakao Cristo. Saʼnda nga jaʼai Jesús i̱ Sonʼnde, millón chjota xi chjotatjenngile kjima. Tonga to 144,000 mani xi ya koatexomakao ya ngʼajmi (tʼexkiai Apocalipsis 14:​1-4). Ngatsʼi je chjotale Cristo xi ngikʼa, i koatio i̱ Sonʼnde (Salmo 37:​29).

3. Ánni nga ngisa nda koatexomasíni je Chjotaxále Niná tikʼoajinni je chjotaxá sonʼnde

Ningalani tjín chjotaxá xi mele nda sʼin, tonga alikui bichó nganʼiole nga kʼoasʼín. Kʼoa xijema, sakʼoa je batioyangajaole je chjotaxá xi tsín mandosinle je naxinandá. Tonga je Jesús, je Chjotaxále Niná, aliʼya xi koatexomangajaole. Je chjotaxá xi tsakasénnda Niná “nikʼiajin tjóxin” (Daniel 2:​44). Jé Jesús koatexoma jngo tjíjtsa Sonʼnde kʼoa alikui tokjoaʼajin je chjota xi koasenkao. Je Jesús kixi, ndʼéní kʼoa nda chjota, kʼoa kuitsoyale je chjota nga kʼoati katamakjoan tsanda je (tʼexkiai Isaías 11:9).

7. Je kjoatéxoma xi tjínle je Chjotaxále Niná ngisaa nda tikʼoajinni tsʼe chjotaxá sonʼnde

Je chjotaxá kui xá bʼasjeni kjoatéxoma nga kuinyakao kʼoa nga sikuinda je naxinandá. Je Chjotaxále Niná kʼoati tjínle kjoatéxoma kʼoa machjén nga sitjoson je naxinandále. Tʼexkiao 1 Corintios 6:​9-​11 kʼoa cho̱bayaño jebi:

• Jósingái ji, jósʼin kuiyoaa kʼianga sitjoson ngatsʼi chjota je kjoatéxomale Niná. a

• Jósingái ji, a kixi tíjna nga kʼoatsoná je Jeobá nga tjínnele si̱tjosoán je kjoatéxomale tsa mená nga je chjotaxále koatexomaná. Ánni.

• Jómani ʼyaa nga koa̱n sikʼantjaiya yaole je chjota xi chʼao sʼín (chótsenlao versículo 11).

 XI KACHOTʼAYÁ

Je xi Reino de Dios ʼmi jngoo chjotaxá xi ya tíjna ngʼajmi xi koatexoma jngo tjíjtsa Sonʼnde.

Jmé xi kamajinli

• ʼYáni je xi Rey tíjnale Chjotaxále Niná kʼoa jótjín mani xi ya koatexomakao.

• Ánni nga ngisa nda koatexomani je Chjotaxále Niná tikʼoajinni je chjotaxá sonʼnde.

• Jméni xi sʼiaan tsa mená nga je Chjotaxále Niná koatexomaná.