Je Chjotaxále Niná jetíbatéxoma kʼoa jeme sindachon sonʼnde. Kataʼyala jmeni xi sʼin je chjotaxá jebi.

1. Jméni xi sʼin je Chjotaxále Niná nga kui xi kixi kʼoakatasʼín je chjota kʼoa nga katasʼe kjoanyʼán

Je Jesús, je xi rey sʼin tíjnale Chjotaxále Niná, sikjeson je chjotatsʼen kao chjotaxá sonʼnde kʼianga kjoaʼaí Armagedón (Apocalipsis 16:​14, 16). Kʼiaa kuitjoson je én xi faʼaitʼa Biblia xi tso: “Tongi choasa nichxin cha kʼoa je xi tsʼen alikui tikoationi” (Salmo 37:​10). Kʼianga koatexoma je Jesús sʼee kjoanyʼán i̱ Sonʼnde kʼoa ñaki kixi jmeni xi sʼin je chjota (tʼexkiai Isaías 11:4).

2. Jókoa̱nchon kʼianga jekʼoakoa̱n josʼin mele Niná i̱ Sonʼnde

Kʼianga jekoatexoma je Chjotaxále Niná, “je xi kixi tsʼee koa̱n sonʼnde kʼoa i koatio ngantsjai nichxin” (Salmo 37:​29). Cha̱niyalai jkui josʼin kuiyoaa kʼianga jenda chjota koa̱n ngatsʼi chjota, nga tsjoake koa̱n je Jeobá kʼoa nga tsjoake koa̱n xínkjín. Nʼiojin naskánakoa̱nchon, aliʼya xi tichʼin sʼe̱nile kʼoa koatio ngantsjai nichxin je chjota.

3. Jmé xi sʼin je Chjotaxále Niná kʼianga jesikjeson je chjotatsʼen

Kʼianga jetjóxin je chjotatsʼen, je Jesús 1,000 nó koatexoma. Je xi 1,000 nó koatexoma je Jesús kao xi 144,000 mani, kuinyakao je chjota nga tobijbi chjotatsje katama. Kʼianga kjoetʼa xi 1,000 nó, je sonʼnde jeʼndenaxó koa̱n kʼoa je chjota xi koatio nʼio tsjoa sa̱tío kon nga̱ sitjoson kjoatéxomale Jeobá. Xijekoa̱n, je Jesús tsjoá ijngokʼanile xále je Jeobá nga je katabatéxoma ijngokʼa. Kʼoa nga kʼia, ñaki jchaxkón je jaʼaínle Niná (Mateo 6:​9, 10). Jchaale nga nʼio nda batéxoma je Jeobá kʼoa nga nʼio nda síkuinda chjotale. Xijekoa̱n, je Jeobá sikʼien je Na̱i kao sénnichxin xi chʼao kjoan, kʼoa toʼyani xi kontra kʼoéjnale je chjotaxále (Apocalipsis 20:​7-​10). Je kjoanda xi kjoaʼaíkao Chjotaxále Niná alikuikʼia kjoetʼa.

 KATAʼYASAI JME XI TÍNCHJA̱NI

4. Je Chjotaxále Niná kjoaʼaxin je chjotaxá sonʼnde

“Je chjota tjíobatéxomale xínkjín nga tjíosíkiʼaon” (Eclesiastés 8:9). Je Jeobá jé chjotaxále sichjén kʼianga kjoaʼaxin je kjoa xi tjíobajngi je chjota kʼianga tjíobatéxomale xínkjín.

Tʼexkiao Daniel 2:​44 kao 2 Tesalonicenses 1:​6-8 kʼoa cho̱bayaño jebi:

• Jméni xi sikao Jeobá kao Jesús je chjotaxá sonʼnde kʼoa kao xi ya tsjoánganʼiole.

• Ánni nga ñaki tjínjngoni tokuin nga ñaki kixi jmeni xi sʼin je Jeobá kao Jesús.

5. Jé Jesús xi ngisasa nda koatexoma

Kʼianga jekoatexoma Jesús tse kjoanichikontʼain so̱kole je chjota. Chótsenlao VIDEO josʼin tsakakó je Jesús nga mele kuinyakao je chjota kʼoa nga koa̱nle kʼoasʼin.

Jmeni xi kisʼin je Jesús kʼianga tsakʼejna i̱ Sonʼnde kui tsakakó jmeni xi sʼin kʼianga jekoatexoma. Jñánile xi faʼaitʼa i̱bi xi ngisa meli nga kʼoakatama. Tʼexkiao ngayeje texto jñani faʼaitʼa je kjoanichikontʼain xi kjoaʼaíkao je Jesús.

6. Nʼio nda kuiyoaa kʼianga koatexoma je Chjotaxále Niná

 XI KACHOTʼAYÁ

Je Chjotaxále Niná kuitjosonle jmeni xi tjínndajinle je Niná. Naskánasichon ngakjijnda Sonʼnde kʼoa je chjota xi koatio jé Jeobá skoe̱xkón tokʼia saʼndani.

Jmé xi kamajinli

• Jméni xi sʼin je Chjotaxále Niná nga kataʼyaxkón je jaʼaínle Jeobá.

• Ánni nga ʼyasíñá nga je Chjotaxále Niná sitjoson jmeni xi tso je Biblia.

• Ngayeje jmeni xi sʼin je Chjotaxále Niná, jñánile xi ngisa meli nga katabitjoson.