KJOAʼMIYA 35
Jméni xi koa̱n sʼiaan kʼianga kui chjoéjiaan xi ndatjín
Nkjín koya jmeni xi chjoejiaan. Kʼoa jmeni xi nʼia sakʼoa bʼetʼale josʼin tiyoaa kʼoa josʼin tiyoaa ngixko̱n Jeobá. Tobʼelañá, tsakui chjoéjiaan jñáni koanngínkiyoaa, jósʼin kuijnyíʼaa yaoná, tsa kuixaan kʼoa tsa mai. Tsa nda chjoéjiaan jmeni xi sʼiaan, tsjoa sʼe̱ tokoán kʼoa kʼoati tsjoa sʼe̱ kon je Jeobá.
1. Jósʼin koasenkaoli je Biblia nga nda chjoéjin jmeni xi sʼiain
Nga kjesa chjoejinjin jmeni xi sʼiain, kʼoatʼinlai je Jeobá nga katabasenkaoli. Kʼoa ya Biblia tjasjaijin jósʼin síkjaʼaitsjen je Jeobá tʼatsʼe jmeni xi chjoéjin (tʼexkiai Proverbios 2:3-6). Sakʼoa ñaki kʼoatsokixiná je Biblia jmeni xi tjínnele sʼiaan, kʼoa tsa tíjna jngo kjoatéxoma xi koa̱n koanngíntjenngiaa nʼiojin nda sʼiaan tsa si̱tjosoán.
Tonga jméni xi koa̱n sʼiain tsa tsín tsoya kixi je Biblia jmeni xi tjínnele sʼiain. Je Jeobá yaa sikasényali “ya ndiaa xi tjínnele kuitómjeyai” (Isaías 48:17). Tsjoáli kjoafaʼaitsjen xi koandiaali. Je kjoafaʼaitsjen jebi, xi faʼaitʼa ya Biblia, basenkaoná nga majinná josʼin síkjaʼaitsjen je Jeobá kʼoa jotjín kon. Kʼoa kʼiaa ʼyaa jebi kʼianga bʼexkiaa je Biblia. Kʼianga ʼyaa josʼin síkjaʼaitsjen je Jeobá, kui xi basenkaoná kʼianga kui chjoejiaan jmeni xi sasénle.
2. Jméni xi tjínnele kuenta sʼiain nga kjesa chjoejinjin jmeni xi nʼiai
Je Biblia kʼoatso nga “je xi sínkjínle kon kosonnile josʼin binyá ndso̱ko̱” (Proverbios 14:15). Jebi kui xi tsonile, nga tjínnele ndakjoanla si̱kjaʼaitsjeen jméni xi koa̱n sʼiaan. Nga kjesa jme xi nʼiajin, tikjaʼaitsjenjin jebi: “Jñánile kjoafaʼaitsjen xi faʼaitʼa Biblia xi kui tínchja̱ni kjoa jebi. Jmeni xi sʼian, jñánile xi ngisa nda kʼoe tokoan. Jósʼin kʼoetʼale xi ngikʼa jmeni xi sʼian. Kʼoa a tsjoa kʼoe kon je Jeobá jmeni xi sʼian” (Deuteronomio 32:29).
Je Niná tiʼndele nga je kʼoakuitsoná jmeni xi ndatjín kʼoa jmeni xi chʼaotjín. Kʼianga ʼyaa je kjoatéxomale kʼoa kao kjoafaʼaitsjen xi faʼaitʼa ya Biblia kʼoa nga nitjosoán, tinichjineñá je kjoafaʼaitsjenná. Je kjoafaʼaitsjenná kʼoatsoná jmeni xi ndatjín kʼoa jmeni xi chʼaotjín (Romanos 2:14, 15). Tsa nda si̱chjén je kjoafaʼaitsjenná koasenkaoná nga nda chjoéjiaan jmeni xi sʼiaan.
KATAʼYASAI JME XI TÍNCHJA̱NI
Kataʼyala jokji chjíle je kjoafaʼaitsjen xi faʼaitʼa je Biblia kʼoa josʼin nichjén je kjoafaʼaitsjenná kʼianga chjoejiaan jmeni xi nʼia.
3. Je Biblia katabándiaali
Jósʼin bándiaaná je kjoafaʼaitsjen xi faʼaitʼa ya Biblia kʼianga chjoejiaan jmeni xi nʼia. Chótsenlao VIDEO kʼoa cho̱bayaño jebi:
-
Jmé kjoanda xi kitsjoaná je Jeobá.
-
Ánni nga kui kjoanda kitsjoaniná je Jeobá nga ñá chjoéjiaan jmeni xi sʼiaan.
-
Jméni xi kitsjoaná Jeobá xi koasenkaoná nga nda chjoéjiaan jmeni xi sʼiaan.
Jngola choa̱ kataʼyaa josʼin basenkaoná kjoafaʼaitsjen xi faʼaitʼa je Biblia. Tʼexkiao Efesios 5:15, 16, TNM kʼoa cho̱bayaño josʼin nga ngisa nda si̱chjén je nichxinná kʼianga...
-
nyaon nyaon kʼoéxkiaa je Biblia.
-
si̱ndayasaa yaoná tsa jechixan, tsa xijchá maa kʼoa tsa ʼndíxti maa.
-
ntsjaintsjai koanngián je kjoajtín xi satíoná.
4. Tisenkoai kjoafaʼaitsjenli ánni koasenkaonili nga nda chjoéjin jmeni xi sʼiain
Kʼianga kʼoatsokixi ya Biblia jmeni xi sʼiaan, ngisaa choa ñʼai maná kʼianga kui chjoejiaan jmeni xi ndatjín. Tonga tsa tsín ya faʼaitʼa, jósʼiaan. Chótsenlao VIDEO kʼoa cho̱bayaño jebi:
-
Tojosʼin kaʼyaa ya video, jméni xi kisʼin je tichjaa kʼianga nda kisinkjínle kon nga kui kiskoéjin jmeni xi sasénle je Jeobá.
Ánni nga tsín koa̱n kjaʼaí xi kʼoakuitsoniná jmeni xi sʼiaan. Tʼexkiao Hebreos 5:14 kʼoa cho̱bayaño jebi:
-
Ningalani ngisa choa ñʼai maná nga kjaʼaí xi kʼoatsoná jmeni xi nʼia, ánni nga machjénni nga katamaná nga ñá chjoéjiaan je xi ndatjín.
-
Jméni xi koasenkaoná kʼianga nda chjoéjiaan jmeni xi sʼiaan.
Je kjoafaʼaitsjenná yaa mangóson jngo mapa, basenkaoná nga ʼyaa josʼin mangínkoaa yaoná
5. Jchaxkuín josʼin síkjaʼaitsjen xi ngikʼa
Makjoanni nga kjaʼaí kjaʼaísʼin nikjaʼaitsjeen alikui mangóson jmeni xi nʼia. Jósʼin koakoá nga ʼyaxkoán je kjoafaʼaitsjenle xi ngikʼa. Jaola koya kataʼyaa:
Xi títjon: Jngo tichjaa xi nʼio tsjoake nga síkʼi nkjaín, yaa fikʼejna jngo ʼnde jñani tsín sasénle chjota nga síkʼi yaole je xi yánchjín.
Tʼexkiao Romanos 15:1 kao 1 Corintios 10:23, 24 kʼoa cho̱bayaño jebi:
-
Tojo tso je texto xi kabʼexkiaa, jméni xi tjínnele sʼin je tichjaa. Kʼoa ji, jméni xi sʼiain kʼiatsa sikaténgi je kjoafaʼaitsjenle chjota jmeni xi tsín síkaténgi kjoafaʼaitsjenli ji.
Xi majaoni: Jngo ndsʼee xi tosa ñaki tsín ʼbi ningalani be nga tsín chʼaotjín nga ʼyo choaa xi xán tjínle. Kʼoa ñandia nga ya fi jñani sʼuí tíjnale ndsʼee kʼoa be nga tjíoʼbi.
Tʼexkiao Eclesiastés 7:16 kao Romanos 14:1, 10 kʼoa cho̱bayaño jebi:
-
Tojo tso je texto xi kabʼexkiaa, jméni xi tjínnele sʼin je ndsʼee. Kʼoa ji, jméni xi sʼiain tsa ʼyani xi kui kʼoatjíosʼín jmeni xi tsín tsjoáʼndeli kjoafaʼaitsjenli.
Xi koasenkaoli nga nda chjoéjin jmeni xi sʼiain
1. Tijélai Jeobá nga katabasenkaoli nga nda chjoéjin jmeni xi sʼiain (Santiago 1:5).
2. Tjasjaijin ya Biblia kʼoa kao je xo̱n xi Énle Niná yʼangini je kjoafaʼaitsjen xi koasenkaoli nga nda chjoéjin jmeni xi sʼiain. Kʼoati koa̱n chjónangilai je ndsʼee xi jetjínle kjoafaʼaitsjen.
3. Kuenta tʼiain josʼe̱ je kjoafaʼaitsjenli kʼoa kao tsʼe xi ngikʼa jmeni xi chjoéjin.
TJÍNKʼA XI I̱ TSO: “Tiʼndeli nga kʼoasʼiain jmeni xi meli. Ali kuentajin nʼiai josʼin síkjaʼaitsjen xi ngikʼa”.
-
Ánni nga kuenta sʼiansíñá josʼin síkjaʼaitsjen Niná kʼoa kao xíngiaa.
XI KACHOTʼAYÁ
Kʼianga kuenta nʼia josʼin síkjaʼaitsjen je Jeobá, nda chjoejiaan jmeni xi nʼia kʼoa kʼoati kuenta nʼia tsa koasenkao kʼoa tsa sikiʼaon xi kjaʼaí.
Jmé xi kamajinli
-
Jókoa̱n sʼiain nga kui chjoéjin jmeni xi sasénle je Jeobá.
-
Jméni xi sʼiain nga koa̱nli kui chjoéjin je xi ndatjín.
-
Jósʼin koakoá nga ʼyaxkoán josʼin síkjaʼaitsjen xi ngikʼa.
XI KOASENKAOSALI
Jmé xi koa̱n sʼiain nga kui chjoéjin je xi koasenkaoli nga ngisa koa̱nmiyui je Niná.
“Kui chjoéjiaan jmeni xi sasénle je Niná” (La Atalaya, 15 de abril de 2011)
Kataʼyai josʼin tsjoáná kjoafaʼaitsjen je Jeobá.
Kataʼyai jméni xi tsakasenkao jngo chjota nga nda kiskoéjin jmeni xi kisʼin.
Kataʼyai jókoa̱n sʼiain nga kjoáyatsjoai ni̱ma̱le Jeobá, ninga tsínkjoan tsoya kixi ya Biblia je kjoatéxoma xi kʼuíntjenngi.
Tsa kʼoati meli jchai xi tʼatsʼe jebi
XI NʼIO KJONANGI CHJOTA
Jósʼin bakoyalaijin Énle Niná je chjota
Nga kʼuínyali Biblia koaan si̱chjain tojñanile Biblia xi kijnali, koaan kʼoakʼuínlai familiali, miyoli kʼoa toʼyani xi meli.
