Ngakjijnda Sonʼnde kjaʼaí kjaʼaí sʼín je chjota. Tjínkʼa xi tosakʼoa ʼbi kao miyole. Tjínkʼa xi ñaki tsín ʼbi. Kʼoa tjínkʼa xi ñaki síchʼi̱ yaole. Jótso je Biblia xi tʼatsʼe xán.

1. A chʼaotjín kʼianga xán ʼyoá

Je Biblia alikui kʼoatso kʼiatsa chʼaotjín nga xán ʼyoá. Je Biblia kʼoatso nga nkjín kjoatjao kitsjoaná je Jeobá, jolani je vino xi sítsjoaya je ni̱ma̱le chjota (Salmo 104:​14, 15). Xi ijngosani, je Biblia kʼoati síkʼaxki̱, xi xʼin kao xi yánchjín xi kixi kitʼale je Jeobá xi kʼoati tsakʼi xi xán tjínle (1 Timoteo 5:​23).

2. Jmé kjoafaʼaitsjen tsjoále je Biblia xi mele nga xán skʼuí

Je Jeobá ali tsa tokuijin bʼéchjoa nga katasíchʼi̱ yaole chjota, kʼoati kui xi mele nga tsín sikʼatone choa̱le (Gálatas 5:​21). Je Biblia itso: “Ali jejin fajtai je xi síkʼatone choa̱le nga ʼbi je vino” (Proverbios 23:​20). Kʼiatsa kui sʼioaa je xi xán tjínle nga toñá tiyoaa kʼoa tsa kʼiaje̱ nga ya tiyokoaa je miyoná, alikui koa̱n nga si̱kʼatoné choa̱le jokji sʼioaa, tsa tokuixón tomasaa kʼoa tsa tokjaʼaíngása sʼiaan. Kʼoa tsa si̱kʼatoné choa̱le jokji sʼioaa sikiʼaonná je xán. Tsa tsín maná chjoéxkoá yaoná, ngisaa nda nga tsín tixán sʼioñá.

3. Jósʼin koakoá nga ʼyaxkoán josʼin síkjaʼaitsjen xíngiaa

Nga jngó jngoá xi kuixónñá tsa sʼioaa je xi xán tjínle kʼoa tsa mai. Alikui koa̱n chʼaosʼin si̱kʼaxkiaa xíngiaa je xi kosonnile jokji xán ʼbi. Kʼoa kʼoati tsín koa̱n nga kjoanʼio kʼoénelee je xi tsín mele nga kui skʼuí (Romanos 14:​10). Kʼoati tsín koa̱n kui sʼioaa tsa tsín sasénle xi ngikʼa (tʼexkiai Romanos 14:​21). Ñá xi chjotale Cristo maa alikui to yaoná mangínñá kʼoati kuenta nʼia josʼin síkjaʼaitsjen xi ngikʼa (tʼexkiai 1 Corintios 10:​23, 24).

 KATAʼYASAI JME XI TÍNCHJA̱NI

4. Ji xi síni tsa sʼui̱ kʼoa tsa mai

Jókitso je Jesús tʼatsʼe nga xán ʼyoá. Kataʼyala jokisʼin kʼianga tsakʼéjna títjon jngo kjoaxkón. Tʼexkiao Juan 2:​1-​11 kʼoa cho̱bayaño jebi:

• Jméni xi bakóyaná texto jebi, jósʼin síkjaʼaitsjen je Jesús xi tʼatsʼe xán kao tʼatsʼe xi kui ʼbi.

• Je Jesús alikui tsakʼéchjoale ʼyani xi xán tsakʼi, jméni xi tjínnele sʼin jngo chjotale Cristo tsa ʼyani xi mele nga xán skʼuí.

Ninga koa̱n skʼuí jngo chjotale Cristo, ali tsakuijin xi tsonile nga koa̱n skʼuí tokʼiani mele. Tʼexkiao Proverbios 22:3 kʼoa cho̱bayaño tsa ndatjín nga xán sʼui̱:

• kʼiatsa carro tinixákoai.

• kʼiatsa ʼndí tjínli.

• kʼiatsa kʼoakitsoli je chjinexki nga tsín xán sʼui̱.

• kʼiatsa tsín mali chjoéxkui yaoli kʼianga xán ʼyui.

• kʼiatsa tsín tsjoáʼnde kjoatéxoma nga xán sʼui̱.

• kʼiatsa ya tijnakoai jngo chjota xi ñʼai koanle nga kisikʼéjna je xán.

A koaan sʼe̱ xán kʼiatsa tjín xi tíbixan kʼoa tsa jme sʼuí tísʼejna. Nga jchai jméni xi machjén nga kuenta sʼiain, chótsenlao VIDEO.

Tʼexkiao Romanos 13:​13 kao 1 Corintios 10:​31, 32. Kʼianga jekʼoéxkiao nga jngó jngó texto, cho̱bayaño jebi:

• Jósʼin koasenkaoli kjoafaʼaitsjen jebi nga kui chjoéjin jmeni xi tsjoa kʼoe kon je Jeobá.

 5. Jókji sʼui̱

Ningalani tsín bʼéchjoaná je Jeobá nga xán sʼioaa, tonga ánni tsín sasénnile kʼianga nikʼatoné choa̱le. Tʼexkiao Oseas 4:​11, 18 kʼoa cho̱bayaño jebi:

• Jóma je chjota kʼianga nʼio tse xán ʼbi.

Jméni xi koasenkaoná nga tsín si̱kʼatoné choa̱le. Machjén nga nangitokon koaan, nga jchaa jókji sʼioaa. Tʼexkiao Proverbios 11:2 kʼoa cho̱bayaño jebi:

• Ánni ndatjínsíni kʼiatsa kʼoéjnachoa̱lai yaoli jokji xán sʼui̱.

6. Jméni xi koasenkaoli nga si̱kʼéjnai je xán

 XI KACHOTʼAYÁ

Je Jeobá alikui bʼéchjoaná nga xán sʼioaa, tonga je xi bʼéchjoaná kuinga si̱chʼiaa yaoná kʼoa tsa si̱kʼatoné choa̱le.

Jmé xi kamajinli

• Jótso je Biblia xi tʼatsʼe xán.

• Jósʼin bichómani kʼianga nʼio ʼyoá xán.

• Jósʼin koakoñá nga ʼyaxkoán josʼin síkjaʼaitsjen xi ngikʼa tsa skʼuí kʼoa tsa mai.