Je xti jngoo kjoatjao xi tʼatsʼe Jeobá tínroani. Kʼoa Jeobá kui xi mele nga je xi xijchá ma nda katasíkuinda je ʼndíxtile. Kuinga tsjoánile kjoafaʼaitsjen xi kuinyakao. Kʼoa kʼoati tsjoále kjoafaʼaitsjen je ʼndíxti nga nda koatiokao je xijchále.

1. Jmé kjoafaʼaitsjen xi tsjoále Jeobá je xi xijchá ma

Je Jeobá kui xi mele nga je xi nʼai ma kʼoa kao je xi na̱ ma nga tsjoake katama je ʼndíxtile kʼoa nga katasíkʼayale je nichxin xi machjénle. Kʼoati mele nga katasíkuinda tʼatsʼe jmeni xi xkón sikatío kʼoa nga katatsoyale je kjoafaʼaitsjen xi tsjoá je Biblia (Proverbios 1:8). Itso kjoafaʼaitsjen xi tsjoále Niná je xi nʼai ma: “Tokʼoasʼin tijcháo nga sin nga nda koakolao koakoyandalao kjoa xi tsoya Niná” (tʼexkiai Efesios 6:4). Je Jeobá nʼio tsjoa sʼe kon kʼianga je xi xijchá ma kʼoasʼin síjchá je ʼndíxtile jotso je kjoatéxomale kʼoa nga tsín kjaʼaí xi bánele xá jebi.

2. Jmé kjoafaʼaitsjen xi tsjoále Jeobá je xi ʼndíxti ma

Je Jeobá itsole je ʼndíxti: “Titjosonlao xijcháno” (tʼexkiai Colosenses 3:​20). Tsa skoe̱xkón xijchále je xi ʼndíxti ma kʼoa tsa sitjosonle, nʼio tsjoa sa̱tío kon je xijchále kʼoa kao je Jeobá (Proverbios 23:​22-​25). Nga sʼa tiʼndí je Jesús nʼio nda choa̱ tsakʼéjna, ningalani chjotatsje koan kisitjosonle kʼoa tsabexkón je xijchále ningalani chjotajée xi je (Lucas 2:​51, 52).

3. Jméni xi koa̱n sʼin je xi tjío ya yaniʼya nga ngisa koa̱nchriantʼale je Jeobá

Tsa tjínli je ʼndíxti, mejinli nga kʼoati kji tsjoake katama Jeobá jokji tsjoachai ji. Jmé xi koa̱n sʼiain. Tʼintjenngi kjoafaʼaitsjen jebi: “Tjínneli nga ngotjo ngosa kʼoakʼuínnilai [jme xi tso Jeobá] je xtili kʼoa nga kui cho̱bayaño kʼianga tijnai niʼyali, kʼianga ndiaa titomjeyai” (Deuteronomio 6:7). Tsakui nichxin jeʼyai nga tjínnele ngotjo ngosa kʼoaʼminile je ʼndíxti tsa jmeni ánni nga tsín chajinnile. Kʼoa kui xi tso texto jebi nga kjitʼa chja̱kaoni je ʼndíxtili xi tʼatsʼe Jeobá. Xi ijngosani, kʼoati machjén nga chʼa̱sjeʼao nichxin nga xki̱ xomana nga chótʼayao je Biblia ngatsʼio. Ninga tsínli ʼndíxti kʼoati koa̱n chótʼayai je Énle Niná nga xki̱ xomana nga̱ nʼio koasenkaoli.

 KATAʼYASAI JME XI TÍNCHJA̱NI

 6. Jchaxkuín je xijcháli

 XI KACHOTʼAYÁ

Je Jeobá kui xi mele nga je xi xijchá ma tsjoake katama ʼndíxtile, nga katabakóyale kʼoa nga katasíkuinda. Kʼoa je xi ʼndíxti ma nga katabexkón xijchále kʼoa nga katasítjosonle, kʼoa nga je Jeobá katabexkón ngatsʼi.

Jmé xi kamajinli

• Jókoa̱n sʼin je xi xijchá ma nga koakoyale kʼoa nga sikuinda je ʼndíxtile.

• Jósʼin koako je xti nga bexkón je xijchále.

• Jmé kjoanda xi tjenkao nga chʼasjeʼa jngo nichxiaan nga xki̱ xomana nga chotʼayajtían Énle Niná.