KJOAʼMIYA 55

Tʼainganʼiui ya jtín jñani ʼmi

TINÓʼYALAI NGA ÉN

Jngo tjíjtsa Sonʼnde, millón mani je chjota xi nʼio tsjoa tjío kon nga tjíosíxále je Jeobá ya jtín jñani tjío. Je ndsʼee jebi nʼio bechjí josʼin sʼendiaale kʼoa josʼin sakóyale. Kʼoa nkjín koya josʼin tsjoánganʼio ya jtín jñani tjío. A kʼoati tsjoa tjín tokuin tsanda ji nga ya tijnai ya jinjtín, a ʼyachjíní jme xi sakóya kʼoa a meli nga kʼoainganʼiui.

1. Jméni xi koa̱n sʼiain nga si̱chjain nichxinli kao nganʼioli ya jinjtín

Ngatsʼiñá nga koa̱n kʼoainganʼioá ya jtín jñani tiyoaa. Tobʼelañá, tsa tjío je ndsʼee xi jekoanjchínga kʼoa tsa xi chʼin tjínle ya jtín jñani tijnai, koaan ji kʼuínchʼai nga kʼuínkoai kjoajtín. Kʼoati koa̱n kuisenkoai tsa kʼuínkindálai tsojmi xi machjénle kʼoa tsa kuisenkoaije̱ jme xá xi tjínle ya yandʼia (tʼexkiai Santiago 1:27). Xi ijngosani, kʼoati koa̱n kʼoainganʼioá kʼianga matsje ya Ndʼia jña chotʼayá. Tiyondañá nga kʼoanʼia nga̱ tsjoachañá je Jeobá kao je ndsʼee (Salmo 110:3).

Je ndsʼee xi jekisʼenngindá kʼoati koa̱n nkjín koya josʼin tsjoánganʼio ya jinjtín. Je ndsʼee xi sítjoson jmeni xi tso Biblia koaan tsa siervo ministerial koa̱n kʼoa xijekoa̱n, koaan chjotajchínga sʼin koatio. Kʼoa ngatsʼi, xi xʼin kao xi yánchjín koaan tsjoánganʼio nga ngisasa tse kuitsoyason tsa precursor koa̱n. Kʼoati tjínkʼa xi ya fitsjoánganʼio nga sʼenda ndʼia jña ʼyaxkón je Niná kʼoa tjínkʼa xi xin ʼnde fitsjoánganʼio, jñani tjío jtín xi nganʼio machjénle.

2. Jósʼin si̱chjén je tao̱nná kʼoa kao jmeni xi tjínná nga kʼoainganʼioá ya jinjtín

Je Biblia itso: “Chʼa̱sjengʼai Jeobá kao tsojmichjí xi tjínli” (Proverbios 3:9). Nʼio tse kjoanda tjínná nga ma bʼainganʼioá kao tao̱nná kʼoa kao jmeni xi tjínná ya jtín jñani tiyoaa. Nga kʼoanʼia, bʼainganʼioñá nga tosi tonda kataʼmiyason jngo tjíjtsa Sonʼnde (tʼexkiai 2 Corintios 9:7). Je tao̱n xi batioá kʼoati ya machjén jñani kjoaxkón bichó. Nkjín ndsʼee xi kʼoasʼin ngale nga batíotʼaxin choa je tao̱nle nga ya tsjoá ya jinjtín (tʼexkiai 1 Corintios 16:2). Koaan ya si̱kʼatsaoyaa ya kaxa̱ xi tjío ya Ndʼia jña chotʼayá kʼoa tsa maije̱ ya tjen si̱kasénñá ya página xi tíjnaná ya Internet ya donate.pr418.com. Kʼianga bʼé je tao̱n kʼoa tsa jmeni xi tjínná kʼoasʼin bakonilee je Jeobá nga tsjoachaa.

KATAʼYASAI JME XI TÍNCHJA̱NI

Kataʼyala jókoa̱n sʼiain nga kʼoainganʼiui ya jinjtín.

3. Koaan kʼoai jmeni xi tjínli

Je Jeobá kao Jesús tsjoake je chjota xi ñaki kao kjoatsjoa tsjoá. Je Jesús kuenta kisʼin jngo ʼndíchjoónkʼan xi ma̱ tísíjchá yaole kʼianga kitsjoa jmeni xi tjínle. Tʼexkiao Lucas 21:1-4 kʼoa cho̱bayaño jebi:

Jósingái ji, a machjén nga tse tao̱n kʼoee nga nda sʼe̱ kon je Jeobá.
Jósʼe kon je Jeobá kao Jesús nga ñaki ni̱ma̱ná nroajinni nga bʼé je tao̱n.

Nga jchai josʼin machjén je tao̱n xi batioá, chótsenlao VIDEO kʼoa cho̱bayaño jebi:

VIDEO: Kuinyakitsee ya ndsaa tsojmi xi kʼoaikjoatjaolee Jeobá (4:47)

Jósʼin binyakao je jtín xi tjío jngo tjíjtsa Sonʼnde je tao̱n xi batioá.

4. Koaan kʼoainganʼioá

Je choʼndale Niná xi tsakatio nichxin kjoatse kao kjoatsjoa kitsjoanganʼio nga kisʼendaya jña tsaʼyaxkón je Jeobá kʼoa ali tsa totao̱njin xi kitsjoa. Tʼexkiao 2 Crónicas 34:9-11 kʼoa cho̱bayaño jebi:

Jméni xi kisʼin je chjota israelita nga kisikuinda je ndʼia jña tsaʼyaxkón je Jeobá.

Kataʼyai jósʼin fitjenngi choa̱ jebi je testigole Jeobá. Chótsenlao VIDEO kʼoa cho̱bayaño jebi:

VIDEO: Ni̱kuindaa ndʼia jña ʼyaxkoán Niná (3:31)

Ánni nga nʼio chjísínile nga tsje si̱choaan ya Ndʼia jña chotʼayá kʼoa nga ndasʼin katamatsen.
Jósʼin koa̱n kʼoainganʼiui.

5. Je ndsʼee koaan kʼoenele yaole nga ngisasa tse xá kuichotjenngi

Je Biblia kʼoatsole je ndsʼee nga ngisasa katabʼénele yaole nga katatsjoánganʼio ya jinjtín. Kataʼyala jokisʼin jngo ndsʼee. Chótsenlao VIDEO kʼoa cho̱bayaño jebi:

VIDEO: Ndsʼe, tʼenelao yaono nga ngisasa tse xá kuichotjenngio (5:19)

Jméni xi kisʼin je Ryan nga ngisa tse kitsjoanganʼio ya jinjtín.

Ya Biblia kʼoatso jméni xi tjínnele sʼin je ndsʼee kʼiatsa mele nga siervo ministerial koa̱n kʼoa tsa chjotajchínga sʼin kʼoéjna. Tʼexkiao 1 Timoteo 3:1-13 kʼoa cho̱bayaño jebi:

Jmé xi tjínnele sʼin jngo ndsʼee tsa mele nga siervo ministerial koa̱n kʼoa tsa mele nga chjotajchínga sʼin kʼoéjna.
Jméni xi tjínnele sʼin je familiale (chótsenlao versículo 4 kao 11).
Tsa kʼoenele yaole ndsʼee jebi nga sitjoson jmeni xi tso je Biblia, jósʼin koasenkao je ndsʼee xi tjío ya jinjtín.