Ninga nʼio tsjoachai je Jeobá kʼoa ninga tsín meli nga aon kʼoái ni̱ma̱le sakʼoajin so̱kojéeli. Tjín jée xi nʼio ai tjío (1 Corintios 6:​9, 10). Tsa tse jée so̱koli, kuenta tʼiain nga je Jeobá tojo tsjoakeli, kʼoa tíjnandaa nga sichatʼali kʼoa nga koasenkaoli.

1. Jméni xi tjínnele sʼiaan kʼianga sichatʼaná je Jeobá

Kʼianga sokójéele jngo xi tsjoake je Jeobá nʼio ba sʼe kon. Tonga je Jeobá itsole, tojo kitsole je naxinandále nichxin kjoatse: “Ningalani ñaki ní kjoan je jéeno, ñaki koa̱nkjoanxóxó joni tsa nyʼán” (Isaías 1:​18). Tsa kʼoakoa̱nniná je jée xi kabijnyaa, je Jeobá sichatʼaná. Tonga tjínnele nga ñaki kʼoakoa̱nniná kʼoa nga tsín tikʼoasʼianñá, kʼoa kʼoakʼuínlee je Jeobá nga katasíchatʼaná. Kʼoénelee yaoná nga si̱kʼantjaiyaa josʼin nikjaʼaitsjeen, tsín tikui kʼoasʼianñá jmeni xi jée kakaníjinná kʼoa kʼoasʼin koanngínkoaa yaoná jotso je kjoatéxomale Jeobá (tʼexkiai Isaías 55:​6, 7).

2. Kʼianga sokójéená, jósʼin síchjén Jeobá je xi chjotajchínga sʼin tjío

Je Jeobá itso kjoafaʼaitsjen xi tsjoále je xi tse jée kabajngi: “Katanchja̱le chjotajchínga xi tsʼe chjotale Cristo” (tʼexkiai Santiago 5:​14, 15). Chjota jebi tsjoake je Jeobá kʼoa kao je ndsʼee, kʼoa kao nganʼiotsjele Niná kitjoejinni. Kui xá tjíoni nga kuinyakaoná nga koa̱nmiyo ijngokʼá je Niná (Gálatas 6:1).

Jósʼin binyakaoná je xi chjotajchínga sʼin tjío kʼianga tse jée bijnyaa. Tsa jao kʼoa tsa jan koa̱n xi chjotajchínga sʼin tjío xi kuinyakaoná. Kui Biblia sichjén nga koakoyaná ánni nga chʼaotjínni jmeni xi kinʼia. Kʼoati sinʼiojinná kʼoa tsjoáná kjoafaʼaitsjen xi koasenkaoná nga tsín tikui jée kuijnyíñá. Tonga tsa tsín kʼoakoa̱nnile jéele jngo chjota xi tse jée kabajngi, je xi chjotajchínga sʼin tjío k’oasjejin ya jinjtín, nga̱ kʼoasʼin sikuindani je ndsʼee xi ngikʼa ánni nga tsín kʼoatisʼinni tsanda je.

 KATAʼYASAI JME XI TÍNCHJA̱NI

3. Kʼianga bʼejnatseen je jée xi bijnyaa kui xi basenkaoná nga nda biyo ijngokʼá

Tojmeni je jée xi kuijnyá aon sʼe kon je Jeobá, kuinga machjénsíni nga kʼoéyanajmílee kʼiatsa kabijnyijée. Tʼexkiao Salmo 32:​1-5 kʼoa cho̱bayaño jebi:

• Ánni nga ndatjínsíni nga kʼoakʼuínlee je Jeobá je jée xi kabijnyaa ʼndele nga kʼoéʼmaa.

 4. Je Jeobá bakóle kjoamatokon je xi bajngijée

Kʼiatsa jngo xi tse jée kabajngi, kʼoa tsa tsín mele sitjoson je kjoatéxomale Jeobá ch’asjejin jinjtín k’oa alikui tije nimiyoñá. Tʼexkiao 1 Corintios 5:​6, 11 kʼoa cho̱bayaño jebi:

• Nga sísan ngayeje naʼyo̱ ninga tochoa naʼyo̱san. Jósingái ji, a kʼoetʼaná xi ya tiyoaa ya jinjtín kʼiatsa je kjoájtaa je chjota xi tsín kʼoamanile je jée xi kabajngi. Ánni.

Josíkao Jeobá je xi bajngijée, jósʼin bakó nga tjínle kjoamatokon, nga kixi kʼoa nga tsjoakená.

 XI KACHOTʼAYÁ

Tsa nʼio tse jée kabijnyaa tonga tsa kʼoakoa̱nniná jmeni xi kanʼia kʼoa tsa tsín tikʼoasʼianñá, je Jeobá sichatʼaná.

Jmé xi kamajinli

• Ánni nga ndatjínsíni nga kʼoéyanajmílee je Jeobá je jée xi kabijnyaa.

• Jméni xi tjínnele sʼiaan kʼianga sichatʼaná je Jeobá.

• Tsa tse jée kabijnyaa, ánni nga ndatjínsíni nga si̱jélee nganʼio je xi chjotajchínga sʼin tjío.