Jojekjitse jetichotʼayai nʼio tse jmeni xi kjimajinli xi tʼatsʼe Jeobá. Ngisaa tsjoacha kjimai kʼoa tsakui nichxin jetsakʼaitʼalai yaoli kʼoa jekʼinsʼenngindái. Kʼoa tsa kje kʼoanʼiajin tsakui nichxin jetinikjaʼaitsjain nga kʼoasʼiain. Ningalani jekʼuínsʼenngindái tojo machjén nga tosi tonda si̱chriantʼalai je Niná. Kʼoa koaan kʼoasʼiain tokʼia saʼndani. Kataʼyala jókoa̱n sʼiain.

1. Ánni machjénsíni nga tosi tonda si̱miyoaa je Jeobá

Tjínnele nga tosi tonda kʼoénelee yaoná nga si̱miyoaa je Jeobá “jméni nga tsín tsa xin ndiaa koanngínsínía” kʼoa ánni nga tsín si̱kjinnilee (Hebreos 2:1). Jméni xi koasenkaoná nga tosi tonda kixi kjuintʼalee je Jeobá. Xi koasenkaoná kuinga ntsjaintsjai kʼuínyasoán kʼoa nga kjoásjailee josasʼin nga koa̱n si̱xálee (tʼexkiai Filipenses 3:​16). Je xi ngisasa nda sʼiaan kuinga je Jeobá si̱xálee (Salmo 84:​10).

2. Jméni xi machjén nga tosi tonda kʼoasʼiain

Ningalani jetífetʼali nga tichotʼayai libro jebi tjínsa jmeni xi machjén nga sʼiain. Je Biblia kʼoatso nga je chjotale Cristo tjínnele sikʼantjaiya yaole, tjínnele koa̱nchjotseya (Efesios 4:​23, 24). Tsa tosi tonda chótʼayai je Énle Niná kʼoa kʼuín je kjoajtín xi satíoná ngisasa tse koa̱njinli xi tʼatsʼe Jeobá kʼoa kao jokjoan. Tikjaʼaitsjain jókoa̱n sʼiain nga kʼoati katamakjoain jokjoan je Niná. Tosi tonda tikʼantjaiyai yaoli, ánni nga tsjoa kjoáyani kon je Jeobá.

3. Jósʼin koasenkaoli Jeobá nga tosi tonda koa̱nchriantʼalai

Je Biblia itso: “Je soa Niná sindayano, sikʼéjnandano, tsjoáno nganʼio, nda sikʼéyono” (1 Pedro 5:​10). Ngatsʼiñá nga che̱n satíobasenná tonga jé Jeobá basenkaoná nga tsín ya tsaoyaa (Salmo 139:​23, 24). Je Jeobá kʼoatsoná nga je tsjoáná nganʼio nga kixi kjuintʼalee kʼoa nga kui si̱metokoán nga je si̱xálee (tʼexkiai Filipenses 2:​13).

 KATAʼYASAI JME XI TÍNCHJA̱NI

4. Tosi tonda chja̱kaonajmí kʼoa tinóʼyalai je Jeobá

Nga ntsjaintsjai bʼetsʼoai kʼoa nga ntsjaintsjai chotʼayai je Biblia kui xi tíbasenkaoli nga kjimamiyui je Jeobá. Jósʼin koasenkaoli kʼiatsa tosi tonda kʼoasʼiain.

Tʼexkiao Salmo 62:8 kʼoa cho̱bayaño jebi:

• Nga ngisa nda kʼoétsʼoalai je Jeobá ngisaa koa̱nmiyui, jókoa̱n sʼiain nga ngisasa nda kʼoétsʼoalai.

Tʼexkiao Salmo 1:2 kʼoa cho̱bayaño jebi:

• Nga ngisasa nda koa̱nmiyui je Jeobá, jméni xi tjínnele sʼiain nga ngisa nda koa̱njinli jmeni xi tso je Biblia.

Jméni xi koasenkaoli nga ngisa nda koa̱njinli je Biblia kʼianga toji chotʼayai. Nga jchai josʼín kʼa, chótsenlao VIDEO kʼoa cho̱bayaño jebi:

• Jñánile kjoafaʼaitsjen xi bakó je video xi meli si̱chjain.

• Jmé tʼatsʼeni xi meli chótʼayajin.

 XI KACHOTʼAYÁ

Tosi tonda timiyui je Jeobá kʼoa tikjaʼaitsjain josasʼin koa̱n si̱xálai, tsa kʼoasʼiain nda kuijnai ngantsjai nichxin.

Jmé xi kamajinli

• Ánni nga tjínjngosíni tokuin nga je Jeobá koasenkaoli nga kixi kʼuíntʼalai.

• Jméni xi koa̱n sʼiain nga ngisa koa̱nmiyui je Jeobá.

• Ánni machjénsíni nga si̱kjaʼaitsjain josasʼin si̱xálai Jeobá tsa meli nga tosi tonda koa̱nchriantʼasalai.