1.  ʼYáni je “Babilonia xi nʼio je” ʼmi

2.  Kʼiáni koantsen je Mesías

3.  Josíkao chjinexki je njínle chjota kʼianga tiya

4.  Kʼianga binyaxinle xínkjín je chjota

5.  Sʼuí xi tsín sasénle Niná

6.  Chʼinʼbi xi síkʼienná

7.  Xi tʼatsʼe negocio kʼoa josʼin sʼendajin kjoa ngixko̱n kjoatéxoma

 1. ʼYáni je “Babilonia xi nʼio je” ʼmi

Ánni kʼoabixónsíñá nga je “Babilonia xi nʼio je” kui tsoyanile ngatsʼi je religión ndiso (Apocalipsis 17:5). Janla koya tjínni xi kataʼyaa.

• Tíjnaa kʼoa ʼyale jngo tjíjtsa Sonʼnde. Je Biblia kʼoatso nga je batéxomale “naxinandá” kao “chjotankjín” kʼoa nga kʼoati je batéxomale “chjotatítjon xi tjío sonʼnde” (Apocalipsis 17:15, 18).

• Ali tsa chjota políticojin, ni jejinla chjotanyiná xoʼmile. Je Biblia kʼoatso nga “je chjotatítjonle sonʼnde” kʼoa kao “je chjotakjoama̱ xi baténa” tojo tjíosa nga ni̱kjeson “Babilonia xi nʼio je” (Apocalipsis 18:9, 15).

• Síjndí je jaʼaínle Niná. “Chjoónchajngi” tsole je Biblia nga̱ yaa fákjao jko̱ kao chjotaxá kʼoa to tao̱n xi sʼínnile jmeni xi sʼín (Apocalipsis 17:1, 2). Bʼanachale ngatsʼi chjota xi tjío jngo tjíjtsa Sonʼnde kʼoa totʼatsʼee nga kʼoasikji chjota mʼe (Apocalipsis 18:23, 24).

Chótsen ijngok‘alai kjoa‘miya 13, punto 6

 2. Kʼiáni koantsen je Mesías

Je Biblia tongini kʼoakitso nga 69 xomana kjoaʼato nga jchale ʼyáni je Mesías (tʼexkiai Daniel 9:25).

• Kʼiáni kitsʼia je xi 69 xomana. Kʼiaa nga nó 455 tongini nga nó 1. Nó jebi kʼiaa kicho Nehemías ya Jerusalén nga tsakʼéndaya je naxinandá (Daniel 9:25; Nehemías 2:1, 5-8).

• Jókji tse jaʼato xi 69 xomana. Tjínkʼa je én xi tongini kinokjoa xi faʼaitʼa ya Biblia xi jngo nó tínchja̱ni nga jngo nichxin (Números 14:34; Ezequiel 4:6). Jebi kui xi tsonile nga ñato nó tínchja̱ni nga jngo xomana. Kʼoa je xi 69 xomana tínchja̱ni i̱bi, 483 nó tínchja̱ni (kʼoatjín bichó nga ñato kʼa bʼexkiaa 69).

• Kʼiáni jetʼa xi 69 xomana. Kʼianga bʼexkiaa je xi 483 nó, tsa ya chʼa̱nilee nó 455 tongini nga nó 1 kʼiaa nga nó 29 bichótsjoá. a Kʼoa kʼianga nó 29 kʼiaa kisʼenngindá je Jesús kʼoa kʼiaa Mesías koan (Lucas 3:1, 2, 21, 22, TNM).

Chótsen ijngok‘alai kjoa‘miya 15 punto 5

 3. Josíkao chjinexki je njínle chjota kʼianga tiya

Sakʼoa tikuini je njínle chjota xi katiya síchjén je chjinexki. Tonga je chjotale Cristo alikui totsjoáʼndeyeje jonikao njínle. Tobʼelañá, alikui bʼaiʼndee nga njínná tjosje kʼianga tjín xi xinyále. Kʼoati likui bʼaiʼndee nga xinyátjao njínná ninga tiñá xi̱nyá ijngokʼaniná nga koa̱nskanni (Deuteronomio 15:23).

Tonga kʼoati tjínkʼa xi ñá chósonnilee tsa kʼoaiʼndee kʼoa tsa mai josikao njínná je chjinexki. Tobʼelañá tsa njínná chótʼa, tsa njínná koa̱ntsje, kʼoa tsakui sʼe̱tʼanáje̱ je xi bomba de circulación extracorpórea ʼmi. Nga jngó jngó je chjotale Cristo xi kuitsoni joni̱kao je njínle kʼiatsa títiya, kʼiatsa njínle tíchotʼa, kʼoa tsa koa̱nxkile. Makjoanni nga tsín tongatsʼi je chjinexki nga ngóson sʼin síkao je njínná, kuinga ndatjínni nga kataʼyaa jósikao je njínná kʼiatsa títiyá, kʼiatsa njínná chótʼa kʼoa tsa koa̱nxkiná. Si̱kjaʼaitsjenjiaan jebi:

• Tsa xinlani xi̱nyá ngotjo njínna, kʼoa tsa kuitjojin ngotjo yaona, a tsjoáʼndee kjoafaʼaitsjenna nga tojo tsʼan xínle kʼoa nga tsín machjén nga tosʼe̱jtenjinʼnde (Deuteronomio 12:23, 24).

• A chʼao koa̱nle kjoafaʼaitsjenna axo mai, kʼiatsa tjósjelani choa je njínna, tsa xki kʼójin kʼoa tsa skan xi̱nyá ijngokʼanina.

Chótsen ijngok‘alai kjoa‘miya 39 punto 3

 4. Kʼianga binyaxinle xínkjín je chjota

Je Énle Niná kʼoatso nga tsín koa̱n kuinyaxinle xínkjín xi jekabixan, kʼoa tsa ʼyani xi kʼoasʼin alikui tiʼndele nga kjaʼaí chjota kuixankao (1 Corintios 7:10, 11). Tonga tjínkʼa je xi tse kjoa sʼele kʼoa kui xosíkao nga binyatʼaxinnile xínkjín.

• Tsa kaile nga bajngiʼa familiale: Kʼianga je xʼin ñaki tsín bajngiʼa je familiale kʼoa likui fini ninga tsínle xi tjíokjine (1 Timoteo 5:8).

• Tsa totaon tíʼya: Tjínkʼa chjota xi nʼio tsʼen kʼoa xi saʼnda xkón síkʼéjna kjoabijnachonle chjoónle kʼoa tsa xʼinle (Gálatas 5:19-21).

• Tsa tsín tjoʼndele nga je Jeobá síxále: Tjínkʼa chjota xi nʼio batiochjoa kʼoa ñaki tsín tsjoáʼndele tsa chjoónle kʼoa tsa xʼinle nga je Jeobá sítjosonle kʼoa nga je bexkón (Hechos 5:29).

Chótsen ijngok‘alai kjoa‘miya 42 punto 3

  5. Sʼuí xi tsín sasénle Niná

Ñá xi chjotale Cristo maa alikui nisiaan sʼuí xi tsín sasénle Jeobá. Tonga nga jngó jngoá machjén nga kui kjuintjenngiaa kjoafaʼaitsjen xi tsjoá je Biblia jokuixoán kʼoa josʼiaan kʼianga jme sʼuí bitjo. Kataʼyala kʼa choa̱:

• Tsa ʼya xi “katafili nichxin” kuitsoli kʼoa tsa jmesa xi kuitsoli kʼianga sʼuí tíbitjo. Koaan to “Niná xi katabʼéchjíli” kʼuínlai. Tonga tsa mele chjota jebi nga skoe̱ ánni nga tsín chʼasjeñá sʼuí jebi koaan kʼoakʼuínlai.

• Tsa tsín testigole Jeobá ma je xʼinli kʼoa tsa chjoónli kʼoa tsa kʼoakuitsoli nga ya koanngínkichikao je xínkjín nga sʼuí tíbitjo. Tsa kʼuín koaan tongini kʼoakʼuínlai je xʼinli kʼoa tsa chjoónli nga tsín ya kuinójin yaoli jmeni xi kjima sʼuí jebi kʼiatsa kui kʼoasʼin jme xi tsín kixi tíjna ngixko̱n Niná.

• Tsa tao̱n tsjoá choali je xi tinixákoai kʼianga sʼuí bitjo. Ji xi síni tsa chjoái kʼoa tsa mai. A kʼoasʼin síkjaʼaitsjen je xi naili mani nga jetichʼasjai sʼuí jebi kʼiatsa chjoái je tao̱n xi títsjoáli, axo kuinga nda kinixái nga kui títsjoánili.

• Tsa tjín xi tsjoákjoatjaoli chjota kʼianga sʼuí bʼasje. Tsakui nichxin i̱ kuitsoli je chjota: “Ningalani tsín chʼasjai sʼuí jebi tonga tjín xi mena tsjoakjoatjaole”. Tsakui nichxin kui kʼoasʼinni nga nda chjota. Kʼoa tsa maije̱ tokui xi mele nga skótʼayakao kjoamakjainli. Kʼianga jesi̱kjaʼaitsjenjin anni kʼoatísʼínni, ji xi síni tsa chjoái kʼoa tsa mai je tsojmi xi títsjoáli. Tojmeni xi sʼiain kui chjoéjin je xi nda kʼoe tokuin kʼoa xi koako nga kixi tiʼmitʼalai je Jeobá (Hechos 23:1).

Chótsen ijngok‘alai kjoa‘miya 44 punto 1

 6. Chʼinʼbi xi síkʼienná

Nga tsjoachaa je chjota nda nikuindaa yaoná nga tsín jme chʼin si̱kakinlee. Nʼio nda nikuindaa yaoná tsakui tjínná chʼin xi ʼbi ánni nga tsín kjaʼaí chjota koakinsínile, kʼoati nʼia ninga tobele tokoán nga kui tjínná. Kui kʼoanʼiañá nga̱ nitjosonñá je kjoatéxoma xi faʼaitʼa Biblia nga i̱ tso: “Tsjoacha katamai xíngi joni tsa tijini” (Romanos 13:8-10).

Jósʼin mangíntjenngiaa kjoafaʼaitsjen jebi. Tsa ʼyani xi kui tjínle je chʼin xi ʼbi alikui koa̱n sikao xi ngikʼa, jolani tsa kʼoendsoʼa, tsa tsoa̱kjá kʼoa tsa ntsja tsjoále nga sitiʼnda. Kʼoa alikui koa̱n koa̱njtile tsa tsín kuinchja̱le xi ngikʼa ya ndʼiale. Kʼianga kjesa fisʼenngindájin tjínnele kʼoakuitsole je xi coordinador sʼin tíjnale je xi chjotajchínga sʼin tjío ánni nga skoe̱ni josʼin kʼoa tsín xkón koationi xi ngikʼa. Tsa ʼyani xi bele kon nga kui tsakinle je chʼin xi ʼbi machjén nga katakotʼa njínle kʼiatsa ʼya xi kʼoámjekao. Tsa kʼoasʼiaan kʼoasʼin koakoñá nga mandosinná je xíngiaa kʼoa nga tsín tsa to yaoná mangínñá (Filipenses 2:4).

Chótsen ijngok‘alai kjoa‘miya 56 punto 2

 7. Xi tʼatsʼe negocio kʼoa josʼin sʼendajin kjoa ngixko̱n kjoatéxoma

Alikui kjoa kuiyojiaan tsa jngo xo̱n sʼiaan firma kʼiatsa tao̱n kanikinyaa kʼoa tsa ñá kanikinyaná ningala ndsʼee je xi kanikinyalee kʼoa tsa je kasíkinyaná (Jeremías 32:9-12). Tonga sakʼoa tsínni kʼoasʼin bichómani josʼin kasʼendajin ninga xo̱n kabʼendaa. Tsa kʼoalani koa̱n, machjén nga ngasin nganda cho̱bá kao je ndsʼee, nga tokao je kʼoéndajiaan je kjoa kʼoa nga kjitʼanangi kʼoasʼiaan.

Tonga jósʼin koa̱n sʼe̱ndajin je kjoa xi ai tíjna, jolani tsa xínkjín kasíchétʼale je ndsʼee kʼoa tsa énndiso tjíobáne xínkjín (tʼexkiai Mateo 18:15-17). Je Jesús kʼoakitso nga jan koya tjínni xi sʼiaan.

1. Tojé nga jao xi kjoa kasʼele tjínnele kʼoendajin je kjoale (chótsenlai versículo 15).

2. Kʼoa tsa tsín jme xi sʼe̱ndajinle, koaan tsa jngo kʼoa tsa jao ndsʼee xi jetjínle kjoafaʼaitsjen katafikao (chótsenlai versículo 16).

3. Tsa tojo tsín jme xi sʼendajinle, koaan je kʼoakuitsole je xi chjotajchínga sʼin tjío (chótsenlai versículo 17).

Sakʼoa likui machjén nga ngixko̱n chjotaxá kjuinkoaa je ndsʼee, tsa kʼoasʼiaan jejin jaʼaínle Jeobá chʼaosʼin kʼoaxki̱ kʼoa kao je jtín (1 Corintios 6:1-8). Tonga tjínkʼa je kjoa xi ya ngixko̱n chjotaxá sʼendajin: jolani nga xínkjín tsjion chjota, nga kʼoaʼmile ʼyáni xi sijchá je ʼndíxtile, a je nʼai axo je xi na̱, nga katatsjoá je xi nʼai ma je tao̱n xi koa̱nchjénle je ʼndíxtile, nga bʼaile chjota jotjín tao̱n bʼakaole tsa kasʼechjoa jñani síxá, nga ʼyale ʼyáni xi kanikatíole tsojmile jngo ʼndíkʼien, kʼoa tsakuije̱ nga katabʼaile je tao̱n xi koa̱nchjénle tsa tjín xi kamale kʼiatsa kui tjínle xi seguro ʼmi. Je chjotale Cristo xi ya ngixko̱n kjoatéxoma bʼéndajin kjoa jebi ali tsa tjíofaʼatonejin kjoatéxomale Niná.

Kʼoati tsín kjoatéxomale Niná tífaʼatone je chjotale Cristo kʼiatsa kjoájétʼain tsa ʼya xi nʼio ai jée kabajngi, jolani, tsa ʼya xi kaʼyataon, tsa xtiʼndí kaʼyataon, tsa ʼya xi kanikiʼaon, tsa ʼya xi kasíché kʼoa tsa ʼya xi tjín xi kasíkʼien.

Chótsen ijngok‘alai kjoa‘miya 56 punto 3