Kʼianga bixan jngo chjoón jngo xʼin, jngo familia jema. Kjoaixiní nga tojo tjínnele tsjoake koa̱n kʼoa nga tojo skoe̱xkón je xijchále, tonga je xi ngisa nʼio kuenta sʼin jé chjoónle kʼoa tsa xʼinle. Tsakui nichxin ñʼai koa̱nle jebi je xi xínkjín mani. Tonga je kjoafaʼaitsjen xi faʼaitʼa Biblia koasenkao nga ndasʼin kʼoéjna kao xijchále kʼoa nga sa nda sa nda koatiokao xínkjín.

JE BIBLIA ITSO: “Jchaxkuín nʼaili kao na̱li” (Efesios 6:2). Ninga jetjínli nó, tojo machjén nga jchaxkuín je nʼaili kao na̱li. Kʼoati kuenta tʼiain nga je chjoónli kʼoati machjénle nga sikʼayale nichxin je xijchále. Je Biblia itso: “Je kjoatjaocha tsínle kjoaxintakonjin”. Ali machi̱ni̱jin josíkao xijchále (1 Corintios 13:4; Gálatas 5:26).

KOAAN I̱ SʼIAIN:

• Ali i̱jin si: “Je xijcháli ñaki toʼan síkʼaxki̱na ngantsjai”; “Je na̱li nitséjinla nda sʼele jmeni xi sʼian”

• Tikjaʼaitsjain jomale je chjoónli

JE BIBLIA ITSO: “Kuinga je xʼin sikʼéjnasíni je nʼaile kʼoa kao na̱le kʼoa jé chjoónle kʼoéjnakao kʼoa tojngo yao koa̱nni” (Génesis 2:24). Tsakui nichxin tojo je kjoáyojin je xijcháli jmeni xi sʼiain ninga jekabixain kʼoa josʼin tiyo ya yaniʼyano.

Cho̱bayaño nga jao jokji tje̱n koa̱n kjoáyojin je xijcháno jmeni xi sʼiaon kʼoa ngasin nga nda kʼoatʼinlao. Koaan kʼoatʼinkixilao josʼin nikjaʼaitsjaon (Proverbios 15:1). Je xi koasenkaono nga ndasʼin kuiyo kao je xi xíngio mani kui nga sʼe̱no kjoanangitokon, kʼoa nga ndʼé kʼoa tsejta koaon, nga̱ je Biblia itso: “Tikjaínlao xíngio nga tjaochao” (Efesios 4:2).

KOAAN I̱ SʼIAIN:

• Tsa nʼio makjaojinli nga je xijcháno fayojin josʼin tiyo, koaan kʼia cho̱bayaño kao je chjoónli nga ndatjín tokon

• Cho̱bayaño kao je chjoónli jmeni xi koa̱n sʼiaon