Kʼianga jebixan jngo chjoón jngo xʼin nkjín koya kjoa sʼele. Tsakui nichxin ya nroani nga tsín tongóson sʼin síkjaʼaitsjen, nga kjaʼaí kjaʼaí satío kon kʼoa nga kjaʼaísʼin koanjchínga. Kʼoati sakʼoa kjaʼaí chjota bajnginá je kjoa kʼoa tsa maije̱ toxijña faʼainená.

Tsakui nichxin kʼoasʼin si̱kjaʼaitsjain nga ngisa nda nga tsín kuenta sʼiain je kjoa xi tísʼeno. Tonga je Biblia kʼoatso nga tosa tʼendajion (Mateo 5:23, 24). Kʼoa ngisa nda sʼe̱ndajin je kjoa xi tjínno tsakui koanngíntjenngio je kjoafaʼaitsjen xi tsjoá Biblia.

JE BIBLIA ITSO: “Tsen tjínle nichxin [...] nga nokjoaa” (Eclesiastés 3:1, 7). Chʼa̱sjeʼai nichxin nga cho̱bayaño kao chjoónli je kjoa xi tísʼeno. Kʼoatʼinkixilai jomali kʼoa jósʼin nikjaʼaitsjain. Kui “cho̱bakao xíngio xi kjoakixi” ngantsjai (Efesios 4:25). Kʼoa ninga jti kjimali, ali nokjoatijin. Tsa én xi inda tso kuinókjoai, alikuijin kjoabixkan kuichomani je kjoa xi tísʼeno (Proverbios 15:4; 26:20).

Kʼoa ninga tsín koa̱nngóson kjoafaʼaitsjenno, tojo ndʼé sʼin tinókjoai. Tosi tonda takolao xíngio kjoatsjoacha kao kjoaxkóntokon (Colosenses 4:6). Ali nikʼachxinjion nga kʼoéndajion kjoano, kʼoa ali nijchánkaojion xíngio (Efesios 4:26).

KOAAN I̱ SʼIAIN:

• Chósonnilai kʼiáni nga koa̱n kʼoakʼuínlai je chjoónli je kjoa xi tísʼe

• Kʼiatsa je chjoónli xi tínchja̱, ali jijin nokjoachjoalai. Kʼoati kʼoakaoli tsanda ji nga kuinókjoai

JE BIBLIA ITSO: “Katamatsjoachao xíngio joni nga ndsʼao. Ngisa títjon jchaxkón xikʼa joni tsa tijonnio” (Romanos 12:10). Nʼio machjén nga nda kuinóʼyalai je chjoónli kʼoa nga si̱choyalai yaoli ánni nga kʼoasʼin síkjaʼaitsjenni. “Katamajinno jomale xíngio” kʼoa “katasʼeno kjoanangitokon” (1 Pedro 3:8, TNM; Santiago 1:19). Tasenño kjoaixilai kʼianga tínchja̱. Tsa koa̱n, tikʼéjnalai jmeni xi tinʼiai kʼoa nda tinóʼyalai jmeni xi kuitsoli. Tsa maije̱, koaan kʼoakʼuínlai tsa koa̱n skan cho̱banajmío. Tsa kʼoasʼin si̱kjaʼaitsjain nga tsín kontrali ma je chjoónli, nga tosa je xi koa̱n koasenkaoli, alikuijin ndi̱to̱n si̱jtilai yaoli kʼiatsa jme xi kuitsoli (Eclesiastés 7:9).

KOAAN I̱ SʼIAIN:

• Nda tinóʼyai jmeni xi títsoli je chjoónli ninga tsín sa̱sénli

• Tinkjínlai tokuin ánni nga kʼoatítsoni. Nda tinóʼyai jotso énle, nda chótsenlai josʼín kʼoa jofá nkjaín

JE BIBLIA ITSO: “Kjoanda kitjenkao tojme xá xi tse kjoama̱ sʼengi, tonga je xi to én likui jme xi bichómani” (Proverbios 14:23). Ali tsa toyajin tje̱n tíjna nga jchao josʼin kʼoéndajion je kjoano. Tjínnele nga ñaki kʼoasʼiaon. Tsakui nichxin tse kjoama̱ sʼe̱ngino, tonga tse kjoanda so̱kono (Proverbios 10:4). Kʼiatsa kuisenkaongañáo xíngio ndasʼin kuiyo (Eclesiastés 4:9).

KOAAN I̱ SʼIAIN:

• Tikjaʼaitsjenjion nga jngó jngó jméni xi koa̱n sʼiaon nga sʼe̱ndajin je kjoa xi tísʼeno

• Sakʼoa tikjaʼaitsjenjion tsa jekjimano tibʼendajion je kjoa xi sʼeno