Machjénní nga “maestro koa̱on” (Heb. 5:12). Jé Jeobá, je maestro xi nʼio nda bakóya kʼoa kʼoatsoná nga kʼuínyalee xi kjaʼaí jmeni xi jeʼyaa xi tʼatsʼe. Nga bakoyalee xi tʼatsʼe Jeobá je familianá, je jtín kʼoa nga ʼmiyasoán, nʼio tse kjoanda tjenkao kʼoa tsee xá tjenkao. Tonga, jméni xi koa̱n sʼiaan nga nda kʼuínyaa.

Je pastro Pablo i kitsole je Timoteo: “Tʼexkiai, tʼenai, takoyai”. Kʼoa i kitsosale: “Nga kʼoanʼiai ngayije jebi, kʼoasʼin kuitjo̱ntjai nga tijini, kʼoati je xi nrʼoéli” (1 Tim. 4:13, 16). Je én xi ʼmiyaa koaan kʼoasjentjai je chjota. Kuinga nʼio tjínnile kjoandosin nga nda katamaná kʼoéxkiaa kʼoa nga nda koakoyaa. Kʼoa je foyeto jebi koasenkaoná. Kataʼyala kʼaa jmeni xi faʼaitʼa.

Jé Jeobá xi “nʼio nda bakóya[ná]” (Is. 30:20). Je foyeto jebi koasenkaoli nga ngisa nda kʼoéxkiai kʼoa nga ngisa nda koakoyai, tonga ali nichajinjin nga je Jeobá xi bakóyaná kʼoa nga je xi tíkjenʼndóbʼakjá je chjota (Juan 6:44). Kuinga machjénsíni nga ntsjaintsjai tijélai je nganʼiotsjele. Kjitʼa tichjain je Biblia. Je Jeobá kuenta tʼiain, ali tojijin ʼmini yaoli. Tisenkoai je xi tjíonrʼoéli nga tsjoake katama je Jeobá.

Jé Niná xotítsoli nga kjoájinkuin je chjota je én xi nʼio tjínle kjoandosin. Tjínjngoo tokuinjin nga kuitjosonli xá jebi kʼiatsa si̱nʼiotʼai je “nganʼio xi tsjoá Niná” (1 Ped. 4:11).

Je ndsʼao xi ñatjen tinixálao Niná,

Cuerpo Gobernante xi tsʼe testigole Jeobá